Read Thado Chin Mathew 11 Bible Online

Mathew 11 - Thado Chin bible

Mathew 11

¹Hitichun Jesu'n aseijui somleni ho chu thu apeh jouvin, chukom mun'a kon chun akhotin uva thu hille dingle seiphongle dingin achetan ahi.

²Chuin John'in songkulah Christa thilbol umchan thu ajan ahileh, aseijui mini asolin,

³Chule ajah-a, Ahung dinga chu nangma nahimong hinam, ole achom dang khat kanga dinguham? agatisah-in ahi.

⁴Chuin Jesu'n adonbutnin, ajah lhona, Nangni chelhonin lang nathujah chengse lhon le nathilmu chengse lhon hi John jah-a gasei lhontan:

⁵ Mitchon kho amutai, elbaijin lam ajottai, miphah suhthengin aumin, chule na-ngongin kho ajatan, mi thisa kaithouvin aumtai, chule mivaichate Kipana Thupha akiseipeh tai.

⁶Chule koi hijongle keija kipal lhuhna nei lou chu anunnom ahi, ati.

⁷Chuin amani chu ache nungin aman mipi jah-a chun, John thudol asei panin, Ipi ve dinga gamthipma chu nachedoh-uham? Huijin peng amut lingham?

⁸Achutile ipi ve dingaba chedoh nahiuvem? Ponnem kisil mi ham? Veuvin, ponnem sil hokhu leng in'a um ahiuve.

⁹Ibola nachedoh uham? Themgao ve dinga ong? Ahi, kaseipeh nahiuve, themgao sanga chungnungjo ahi.

¹⁰ Ven, keiman kasottol namasang sanga kasole; Aman namasang sanga nalampi asem ding ahi, tia kisun chu ama hi ahi.

¹¹Najah uva tahbeh-a kasei ahi, Numei sunga peng lah-a John Baptist sanga lenjo koima asohdoh khapoi, ahivangin van lenggama aneojo chu ama sanga lenjo ahi.

¹² Chule John Baptist nikho-a pat tugeija hi van lenggam hin gimbolna athoh ahin, chule mi gimbol hochun pumhatnin alauvin ahi.

¹³Ijeh-inem itile themgaoho jouse le danthun John phat geija chu gaothu aseiju ahitai.

¹⁴ Chule nanghon hiche hi sanding nanop uva ahile, amachu ahung dinga kisei Elijah chu ahi.

¹⁵Angaina ding na neijan ngaihen.

¹⁶Tu khanga mite hi koitoh katekah tadem? Chapangho kaithel tolla touva, aloiho kou-a,

¹⁷Ajah uva, kuli kamutpeh-ule nalam hih-un; kakaule na-op nabeng pouve, tia seiho tobang nahiuve.

¹⁸Ijeh-inem itile John ahungin ne lou don lou ahin, hichun mihon thilhavop ahi, atiuvin ahi.

¹⁹Mihem Chapa ahungin anen adonin ahile, Veuvin, nehhat le julop, kaidongho le mi chonseho jolle gol ahi, atiuve. Ahinla chihna chu anatoh hon them achanan ahi, ati.

²⁰Chuphatnin thilbol kidang ahabol dehna khoho chun alung ahei lou jeh-u chun, aphohsal pantan ahi.

²¹ Ohe Chorazin, nada ahi! Ohe Bethsaida, nada ahi! Ijeh-inem itile nalah uva thilbol thahatna kidang kibol chengse chu, Tyre le Sidon khopi-a kibol hile, sotpia pat chun achenghon khaodip pon kisilpum le vut kinu pumin alungu heitao vinte.

²²Ahinla keiman kasei peh nahiuve, Thupi tan nikho le nangho thoh ding sanga Tyre le Sidon thoh ding oljo ding ahi.

²³ Chule vangeija choisanga uma nang Capernaum, damuna notlhah-a umding nahi; ijeh-inem itile nalah uva thil kidang kibol chengse hi Sodom kho-a kibol hileh, tugei hin umnalai jinte.

²⁴ Chujongle tahbeh-a kaseipeh nahiuve, Thupi tan nile nangho thoh ding sanga Sodam thoh ding oljo ding ahi, ati.

²⁵Hiche pet chun Jesu apaovin, Vo ka Pa vanle lei Pakai, nangman michingte le lungthim themho hengah hicheng thuhi na-ima, naocha ho henga naphondoh jeh hin nangma kathangvah-e.

²⁶Ahi, Pa, hiti chu nangma lunglhaina lam ahi.

²⁷ Imajouse ka-Pan keima eipehdohsoh ahitai; chule Pa tailou Chapa chu koimachan ahepoi; chule Chapa tailoule aman aphondoh nomnapa tailou koimachan Pa chu ahepoi.

²⁸Tong gimte le pohgih te, kahenga hungun; keiman nangho cholngah sah-unge.

²⁹ Keima lungneng tah le nunnem tah kahi; hijeh chun kanamkoljon laovin lang keima-a kihilun; chutile nalunguva olna namu dingu ahi.

³⁰Ijeh-inem itile kanamkoljon nomtah ahin, kapoh jong jangtah ahi, ati.