Read Thado Chin Mathew 12 Bible Online

Mathew 12 - Thado Chin bible

Mathew 12

¹ Hichelai chun cholngah nin Jesu'n changlei lai ajotnin; aseijuite agil keltaovin ahile, changvui asih-un, anepan taovin ahi.

²Ahin Pharisai hon hichu amuvin, ama jah-a, Vetan, naseijui ten cholngah ni-a bol ngai lou abolui, atiuve.

³ Chuin aman ajah uva, David'in aloitetoh agilkel uva abol chu nasim khah lou uham?

⁴ Pathen houin'a alutna, thempu tailou aman jong, aloiten jong neh ngai lou, vetsahna changlhah to aneh jengu chu!

⁵ Ahiloule houin'a um thempuhon cholngah ni nit louva aum jongun themmo achang pouvin ahi, tia danthubua kisei chu nasimdoh khah lou uham?

⁶Ahin nangho kaseipeh nahiuve, Hikoma hin houin sanga chungnungjo khat aume.

⁷ Chule, Keiman gana lhai kangehpoi, lungsetnabou kangeh-e, tia kisei hi ipi kiseina ahi anaheleu chun, themona nei louho chu nanathemmo sahlou dingu ahi.

⁸Ijeh-inem itile Mihem Chapa chu cholngah ni Pakai jong ahi, ati.

⁹Chuin chua konin achedoh-in akikhopnao in'ah alut-in ahi.

¹⁰Chuin, veuvin, hia chun mi akhutngoi khat aumin ahi. Chuin ahehset theina dingun, Cholngah ni-a hi boldam dan ngai hina hilouham, tin Jesu adongun ahi.

¹¹ Chuin Aman ajah uva, Nalah uva khattouvin kelngoi khat neihenlang, hichu cholngah nin kokhuh-a lhaluttaleh, gamana galoidoh lou ding koi naum uvem?

¹²Chuti chu ahile kelngoi sanga mihem iti manlutjoh hitam! Hiche jeh chun cholngah ni-a thilpha bol angai ahi, ati.

¹³Chuphatnin mipa jah-a chun, Nakhut lhangin, ati. Mipa chun akhut alhangin ahile, alang khat bangin adamheltai.

¹⁴Ahin Pharisai ho apotdoh-un ama suhmangna thei ngaiton akihoukhom taovin ahi.

¹⁵Ahivangin Jesu'n hichu ahet phatnin, chukoma kon chun achemang tai. Chuin mi tamtah-in anung ajuijun, Aman abonchauvin aboldam sohkeijin;

¹⁶chule, ama aphondoh louna dinguvin amaho chu akhamin ahi.

¹⁷Isaiah themgaovin asei:

¹⁸ Veuvin, kalhentum kasottol, kadeitah achunga kalung lhainapa khu, Keiman achunga kalhagao kakoi ding, chule ama chidang namdangte henga dandih-a thutan na aphondoh ding ahi.

¹⁹Aman mi anel lou ding, aw sanga thu asei lou ding, Khosung lamlena koi man a-aw ajah louhel ding ahi.

²⁰Ajosoh keija dandih-a thutan achaisoh masangse-a, pumpeng kihehchip kihehbong pai lou ding, chule thaomei pat khao jong athamit lou ding ahi.

²¹Chule Ama min chu chidang namdang ten Kinepna-a anei dingu ahi, ati chu guilhuna dinga chuti ahi, ati.

²²Hichepet chun thilhan avop jeh-a paomo le mitcho khat ahenga ahinpuijun; Aman aboldamin ahile, paomopa chu apao theijin, kho jong amutai.

²³Chuin mipi chengse chun kidang asa lheh-un, Ama hi David Chapa hilouham, atiuvin ahi.

²⁴ Ahin Pharisai ho vang chun hichu aja-un, thilhaho lengpa Beelzabul toh kitho louvin hichepan thilha anodohpoi, atiuvin ahi.

²⁵Chuin Jesu'n alunggelu chu ahen, ajah uva, Gamsung khat amale ama kidoutoa kichom khenchan chu amangthah jin, chule khopi khat hijongle insung khat hijongle kidoutoa kichom khenchan jong chu dingdoh lou ding ahi.

²⁶Chule Satan'in Satan anodoh-a ahile, amale ama kidouva kichom khen ahin; achutile agam iti dingdoh dingham?

²⁷Chujongle keiman Beelzabul vanga thilhaho kanodoh ahile, nachateovin koi vanga anodohjiu hintem? Hijeh-a chu amaho cheng chu nangho thutana pang ding ahiuve.

²⁸Ahin Keima Pathen Lhagao vanga thilhaho nodohji-a kahivangle, Pathen lenggam chu nahengu hung lhunga ahitai.

²⁹Chuti ahi loule kon mihat chu kan masa louva a-in'a lutna, iti achom thei ngaijem? Akan masah-a chutengle achom jibou ahi.

³⁰ Koi hile keima lama panglou chu eidouva ahi; chule eikhop khompi lou chu athecheh ahi.

³¹Hijeh chun kaseipeh nahiuve, mihemte achonsetnao le Pathen ataitom nao jouse kingaidam ding ahi; Lhagao Theng taitoma vang chu kingaidam lou ding ahi.

³² Chule koi hijongle Mihem Chapa douna-a thuseija chu kingaidam ding ahi; Lhagao Theng douna-a thuseija vang chu, tu hinlaijin jong, khonunga hinkho hung lhung dinga jong kingaidam louding ahi.

³³ Thingphung chu aphai nati ule, aga jong aphai tingalun, thingphung aphapoi nati ule, aga jong aphapoi tiuvin; ijeh-inem itile thingphung chu agan akihei.

³⁴ Vo gulse sonho, nanghon nagitlou pumpiuva thupha iti nasei thei dinguham? Ijeh-inem itile lung sunga aletna kona kamin aseidohji ahi.

³⁵Miphan thilpha bom lungthima konin thilpha asodoh-in, chule misen thilse boma konin thilse asodohjin ahi.

³⁶Ahin kaseipeh nahiuve, Mihemin manlou ding thu asei chengse hi, thupi kitan nile asuhto cheh dingu ahi.

³⁷Nangma nathun them nachansah ding ahin, chule nathu maman themmo nachansah ding ahi, ati.

³⁸ Chuphatnin danthu sunho le Pharisai ho phabep khatnin adonbutnun, Houhil, nanga konin melchihna kamu nomuve, atiuvin ahi.

³⁹ Ahin Aman adonbutnin, ajah uva, Migilou le mijong khanga miten melchihna aholui, ahinla Jonah themgao melchihna tailou adang kipe lou ding ahi.

⁴⁰ Ijeh-inem itile, Jonah ni thum le jan thum ngapi oisunga aum banga, mihem chapa jonghi ni thum le jan thum leigila umding ahi.

⁴¹ Nineveh khopi-a miho chu thupi tanna-a tulai khang mite toh hung ding khoma, tulai khang hi themmo ahinchan dingu ahi; ijeh-inem itile amahon Jonah thuhil chun alung aheijun ahi; ahin, veuvin, Jonah sanga chungnungjo hikoma aume.

⁴² Lhanglam gam lengnu chu thupi tanna-a tulai khang mite toh hung ding khoma, tulai khang hi themmo ahinchan ding ahi; ijeh-inem itile aman kolmanga konin Solomon chihna thu ngai dingin ahungin ahi; ahin, veuvin, Solomon sanga chungnungjo hikoma aume.

⁴³Lhagao boh chu mi sunga kona apotdoh tengle, twi beina muntin-ah avahle avahlen, cholngahna aholin, mula amujipoi.

⁴⁴Chutengle aman, Kahung potdohna ka-in mama-a chun chekit tange, atin; chuin ahunga ahile, hichu agohkeo, akitheh ngim, chule akijephoi chu amun;

⁴⁵Chuin achen, ama sanga giloujo lhagao dang sagi agapuijin, chule amaho chua chun alutnun, acheng taove; chuin mipa umchan chu amasa sangin anununga akhohjo chehtan ahi. Tulai khang migiloute chunga jong hi chutobang ding ahi, ati.

⁴⁶Aman mipi lah-a thu aseina laijin, veuvin, anule asopiten ama hou nom-in aholun, inpo-ah adingun ahi.

⁴⁷Chuin mikhatnin ajah-a, Ven, nanu le nasopite nangma hou nom-in naholun, inpo-ah ading jinguve, ati.

⁴⁸Ahin Aman chutia seipa chu adonbutnin, Kanu koiham? chule koiham kasopi? ati.

⁴⁹Chuin aseijuite lama akhut ajah-in, Veuvin, hiteho hi kanule kasopite ahiuve!

⁵⁰Ijeh-inem itile van'a um ka Pa lung lama chonna chu, amatah chu kasopipa le kasopinu, chule kanu ahi, ati.