Read Thado Chin Mathew 13 Bible Online

Mathew 13 - Thado Chin bible

Mathew 13

¹Hiche nikho mama chun Jesu in'a konin apotdoh-in, dil pangah atouvin ahi.

² Chuin ahengah mipi tamtah ahung khomun, hijeh chun ama kong khatnah alutnin atoutai; chule mipi chengse chu vaokamah adingun ahi.

³Chuin amaho chu thulemin thu tamtah ahilin, Ngaijun, muchi thepa khat muchi the dingin achen,

⁴Athe atheleh muchi chu abang lamsih-a achun ahile, vachaten ahung lohgam taove.

⁵Abang songlheo chung leipatna-ah achun, alei asa lou jeh-in akehdohpai jengin;

⁶Ahivangin nisa ahung soh-in ahile, asanggon; jung anei lou jeh-in agoptan ahi.

⁷Abang ling lah-a achun, aling chu ahung khangin adepmang tai.

⁸Adangho vang lei pha laijah achun, abang ajat jakhat, abang ajat somgup, abang ajat somthumin agan ahi.

⁹Angaina ding na neijan ngaihen, ati.

¹⁰Chuin aseijuite ahenga ahungun ajah-a, Ibola amaho jah-a chu thulema naseiham, atiuvin ahi.

¹¹Jesu'n adonbutnin, Nangho vang van lenggam thuguh chu nahet dinguva kipe-a nahitaove; ahin amaho hi kipe lou ahiuve.

¹² Ijeh-inem itile koi hijongle aneija chu kipehbentin anei letset ding ahi, aneilouva chu aneichasun jong chu ama-a kona kilahpeh ding ahi.

¹³Hiche jeh-a hi ajah uva thulema kasei ahi; ijeh-inem itile amahon amu vangun amu hih-un, ana-a ajah vangun aja hih-un, angainaje jong ahepouve.

¹⁴ Chule Isaiah themgaovin khonunga thusoh ding asei: Nanghon ja vang janaovin natin, angainaje nahet lou dingu, mu vang munao vin natin, nahetdoh lou dingu ahi.

¹⁵Ijeh-inem itile hiche nam mite hin Amitnuva amuva, anauva ajah uva, alunga jong ahetdoh uva, chule ahung kihei kit uva, keiman amaho chu kadamsah louna dinga, alungu thaovin atoma, chule akolseh uva, chule amit asinu ahi, tia asei chu achunguva guilhunga ahi.

¹⁶ Nangho mitnin vang amu jeh-in mit nunnom ahin, nanau vin jong ajah jeh-in nakol nunnom ahi.

¹⁷Ijeh-inem itile tahbeh-a kaseipeh nahiuve, Themgao tamtah le michonpha tamtah-in nangho thilmu hi mu atup lhehji uvin, ahivangin amupouvin ahi; chule nathu jah chengseu hi jah atupmun, ahinla ajapouvin ahi.

¹⁸Hiche jeh chun muchi thepa thulem chu ngaijun.

¹⁹Koi hile gamsung thu ajah tenga angainaje helou chu, hiche pettah chun agilou chu ahungin, alung sunga kithesa chengse chu alah mangpeh jitan ahi. Hichepa chu akithe lamsih-a chua chu ahi.

²⁰Akithea songlheo chunga leipatna-a chua chu, thu ajah jah-a thanom tah-a joppai jenga chu ahi;

²¹Ahivangin alung sunga ajung anei lou jeh-in, ni chomkhat aumjibouve; ijeh inem itile thu jeh-a genthei hesohna le bolsetna aum phat phatle, alhupai jitai.

²²Chule akithea linglah-a chua chu ahile, thu chu ajan, hinla leiset hinkho lungkhamna le lheplhahna dimset haona lungthim chun thu chu adeplihjin, ga louvin aumjitai.

²³Chule a kithe-a leipha laija chua vang chu, thu ja-a, angainaje he-a chu ahi; ama chu aga tahbeh-in, chule abang ajat jakhat, abang ajat somgup, abang ajat somthumin aga pungjin ahi.

²⁴Aman amaho jah uva chun thulem chomkhat asei kitnin, van lenggam chu mi khat aloulaija muchipha the-a toh kitekah ahi.

²⁵Ahin miho imut petnin, amelma chu ahungin, achang lah-a chun changlhem athepeh-in, achemang tan ahi.

²⁶Chuin chang kung chu ahung khangtouvin, avui adoh-in ahile, chuphatnin changlhem jong chu akilahdoh-in ahi.

²⁷Chuin aneipa sohte ahenga ahungun ajah-a, Hepu, nalouva khu muchi pha nathe louham? Ahile hoilam kona changlhem kehham, atiuve.

²⁸Aman ajah uva, Melma khattou bol hija chu, ati. Chuin asohten ajah-a, Achutile cheovinlang changlhem chengse gachom khom leuveng nalungham? atiuve.

²⁹Ahin aman adonbutnin, Angaipoi, chutile changlhem nabodoh khomna lamuvin, changtah jong bodohtha getnun nate.

³⁰A-at phat kahsen khantha nante, chang at tengle keiman chang at dingho jah-a, Changlhem chu govam dingin khomun lang kankhomun, changtah vang chu kachang pangah koilut taovin, tinange, ati, tin aseije.

³¹Thulem dang khat ajah uva asei kitnin, van lenggam chu mikhatnin alah-a, chule alouva athe, ankam mu tobang ahi.

³²Hichu muchi dang dang sangin aneopenin, ahivangin akedoh-a akhandoh phatnin, hampa dang sangin aphung lenjon, thing asohtan, chutichun chunga leng vachaho abah lah-a ahung gehjitai, ati.

³³Amaho jah-a thulem khatma asei kitnin, van lenggam chu numei khatnin alah-a, chule changbong dan thum lah-a avuija, aboncha apomsoh kahse-a abil, chol tobang ahi.

³⁴Jesu'n mipi jah-a hichengse chu abonchan thulemin aseijin; chule thulem louvin ajah uva imacha aseipon ahi.

³⁵ Themgao thu seisa, Keiman thulem seinan kakam kangting leiset kisemtila patna thuguh chengse kaphondoh ding ahi, ati chu guilhuna dinga chuti ahi.

³⁶Chujouvin Jesu'n mipi chu asolmangin, chuin insunga alut tan ahi. Chuin aseijuite ahenga ahungun, loulaija changlhem ke thulem chu neiseidoh peh-un ahungtiuve.

³⁷Chuin Aman adonbutnin, Muchi pha the-a chu Mihem Chapa ahi;

³⁸Lou chu vannoi leiset ahi; muchi pha chu lenggam chate ahiuvin; changlhem chu migiloupa chate ahiuve;

³⁹Melma athea chu diabol ahi; changkhop phat chu vannoi leiset kichai ni ahin, chang atteho chu vantilte ahiuve.

⁴⁰Hijeh-a chu changlhem chengse achop khomuva meija ago banguva chu, vannoi leiset kichai ni jongle chuti ding ahi.

⁴¹Mihem Chapan avantilte solintin, chule amahon gamsunga konin midoudal te chengse le akhang giloute jouse chomkhom untin,

⁴²Lhum sunga aselut dingu ahi; hikoma chu kale hagel umding ahi.

⁴³Chutengle michonpha te chengse a-Pau lenggama nisa banga vah ding ahiuve. Angaina ding na nei neijan ngaihen.

⁴⁴Chujongle van lenggam chu loulaija kiselgu thillu tobang ahi: hichu mi khattouvin amudoh-in, aselgun; chule kipahtah-in achen anei jouse ajoh-in, hiche louchu achon ahi.

⁴⁵Chule van lenggam chu sumkolvei mi twikokchang phatah hola toh abange.

⁴⁶Ama chun twikokchang man tamtah khat amun, chuin achen anei jouse ajoh-in hichu achon ahi.

⁴⁷Chule van lenggam chu len khat twikhanglen'a kisep ngatin ngatang huikhoma tobang ahi.

⁴⁸Hiche len chu adim phatnin, mihon vaokamah akaidoh-un; hikoma chun atouvun, apha chacha alheng khomun bomah akhumun, aphalou chengse apaitauve.

⁴⁹Hiche banga chu vannoi leiset kichai ni jongle chuti ding ahi: vantilte hunguntin, michonpha lah-a konin michonse lakhenuntin, amaho chu lhum sunga aselut dingu ahi.

⁵⁰Hikoma chu kale hagel umding ahi, ati.

⁵¹Jesu'n ajah uva, hicheng chu angaije nahettah uvem? tin adongin ahi. Chuin amahon ajah-a, Henge, Pakai, atiuve.

⁵²Chuin Aman ajah uva, Chuti ahi jeh chun danthusun van lenggam seijui chengse chu, athil manlu lah-a kona thil athahle alui sodoh-ah inneipu khat tobang ahiuve, ati.

⁵³Jesu'n thulem hicheng chu asei jouvin, chukoma kon chun akipat dohtai.

⁵⁴Chuin ama gam lamah ahungin, miho chu akikhopnao in'ah ahiltan ahi; chuti chun amahon kidang asa lheh jengun, Hichepa chihna le thil kidang boltheina hi hoija kon hijaham?

⁵⁵Ama hi thing thembol chapa hilouham? Anu min Mariam, chule anaote min Jacob, Joses, Simon, chule Judas hilouham?

⁵⁶Chule asopinute jong hi koma ilah uva cheng hilouham? Achutile hichengpi hi hoija akilah ham? atiuvin ahi.

⁵⁷ Chutichun achungah alung himo taovin ahi. Hijeh chun Jesu'n ajah uva, Themgao chu ama gamsung le ama a-insung tailouvah jabol louvin aum ngaipoi, ati.

⁵⁸Atahsan lou jeh-u chun aman chukoma chun thil kidang atam boltapon ahi.