Read Thado Chin Mathew 14 Bible Online

Mathew 14 - Thado Chin bible

Mathew 14

¹Hiche laitah chun Herod lengpan Jesu thu kithan chu ajan,

²Ajenleho jah-a, Hiche hi John Baptist ahi; ama athia kona thoudoh kit ahitai; chuche jeh-a chu chuti thil kidang boltheina chu ama-a uma abol ahi, ati;

³ Ijeh-inem itile Herod chun anaopa Philip jinu Herodia jala, hiche masanga chu John amatna, akana, songkul'a akhum ahi.

⁴ Ajehchu John'in ajah-a, Amanu chu ji-a naneiding chu dan ngai ahipoi, anati ahi.

⁵Hiche chun lengpan ama chu tha dinga agot vangin, mihon John chu themgao ahi tia angaito jeh-un, miho chu akichan ahi.

⁶Ahivangin Herod aso nikho alhinin, Herodia chanu chu amasanguva ahung lamin, Herod chu alung lhaisah tan ahi.

⁷Hichun amanu chu ipi hijongle athum chan pe dingin akihahsel leuvin ateptan ahi.

⁸Chuin amanu chun, anun ana thuhilsa ahi jehchun, John Baptist luchang kong khatnin hilaija hin neipen, ati.

⁹Chuphatnin lengpa alungdongtan ahi; ahivangin akihahselna le a-ankong umpiho jal-in, peh ding thu apetai.

¹⁰Chuin mi asolin, songkul sunga John lu agatanden sahtan ahi.

¹¹Chuin aluchung chu kong khatnin ahin domun, nungahnu chu apeuvin; chuin amanun anu henga ahin choitan ahi.

¹²Chuphatnin aseijuite acheuvin, along chu agapuvin avuitaove. Chuin ahungun thusoh chu Jesu henga ahung seijun ahi.

¹³Jesu'n chuche ajah phat chun, chukoma kon chun apotnin kongin akitolin, gamthipma achoma achetai. Ahin mihon hichu ahet phatnun, khopi chengsea konin acheuvin akengin anung ajuitaove.

¹⁴Chuin Jesu vaokama ahung potdohle mipi tamtah amun, amaho chu alung asen, adamlouho chu aboldamtai.

¹⁵Chujouvin nilhah ahi phatnin, aseijuite ahenga ahungun, ajah-a, Hiche komla gamthip ahin, nilhah jongla ahitan, miho hi akho kho-a chea aneh dingu gakichoh dingin sol mangtan, atiuve.

¹⁶Ahin Jesu'n ajah uva, Che louleu akhohpoi; nanghon nehding peuvin ati.

¹⁷Chuin amahon ajah-a, Hikoma changlhah pheng nga le nga nisehbou kaneijuve, atiuvin ahi.

¹⁸Aman, Hikoma kahenga hinchoijun, ati.

¹⁹Chuin miho chu hampa chunga tou dingin asolin, changlhah pheng nga le nga ni chu alan, vanlam aven, phatthei aboh-in, chuin changlhah chu ahehbal balin, aseijuite khutna apen; aseijuiten mipi chu ahoppeh-un ahi.

²⁰Chuin abonchauvin aneuvin, ava sohkeijun; anehmoh-u anong chengse chu paipeh somle paipeh ni aloh dimun ahi.

²¹Anea chu numeile chapang sim louvin, mi sangnga jen ahiuve.

²²Chuin Jesu'n mipi chengse chu alhahdoh lai sungsen, gallang khat lama anagalkai masa dingin aseijuite kong'a alutsah-in, asolpaitan ahi.

²³Chuin mipi chu alhahdoh jouvin, tao dingin mola chun achomin akaltai. Chuin jan ahi phatnin, ama hikoma chun achang seh-in aumin ahi.

²⁴Hichepet chun kong chu dillen lailung-ah aumin, hui alelama anun jeh-in, twi kinongin kong chu alehle jengin ahi.

²⁵Chuin khovah ding konin, Jesu ahenglam uva ahungin, twi chunga lam ahin jotnin ahi.

²⁶Aman chutia twi chunga lam ajot chu aseijuiten amuvin, Joumi ahi, tin atijauvin, akichauvin a-aosot taovin ahi.

²⁷Ahin Jesu'n ahin houpi paijin, ajah uva, Lungmong tah-in umun, keima kahi, kicha hih-un, ati.

²⁸Chuin Peter'in adonbut-in, Pakai, nang nahile twi chunga nahenga kahungna dingin thu neipen, ati.

²⁹Chuin aman, Hungin ati. Chuin Peter kong'a konin akumlhan, twi chunga lam ajotnin, Jesu henga achetai.

³⁰Ahinla huinun hattah chu amu phatnin akichatan, chuin lhalut ding akigotan ahile, Pakai, neihuhhing in, tin asamtan ahi.

³¹Chuin Jesu'n akhut alhan, amanpaijin, Vo tahsan lhom, ibola natahsan lelham, ati.

³²Chujouvin kong'a akal phat lhonin, hui chu athip tai.

³³Chuin kong'a umho chu ahungun, Tahbeh-in nangma Pathen Chapa nahi, atiuvin chibai abohtauvin ahi.

³⁴Chuin agalkaijun, Genesaret gamsung alhung taovin ahi.

³⁵Chuin chuche gam miho chun ama chu ahetdoh phatnun, agam kimvel uva mi asolun, adamlou jouse ahengah ahinpuijun;

³⁶Apon mongkai beh atham dingu chun ahenga ataovun, athamkha chan chu adamhel helun ahi.