Read Thado Chin Mathew 15 Bible Online

Mathew 15 - Thado Chin bible

Mathew 15

¹Hiche pettah chun Jerusalem'a konin Pharisaiho le danthu sunho phabep ahungun,

²Jesu jah-a, Ibola naseijui ten upate akhang akhanga ahung chonna dan apalkeh-u ham? ijeh inem itile amahon an aneh ding tengule khut asopji pouve, atiuve.

³Ahin Aman adonbutnin, ajah uva, Nanghon jong ibola nangho chonna dan jeh-a Pathen thupeh napalkeh uham?

⁴ Ijeh-inem itile Pathen'in, Nanu napa jabolun, chule koi hile anule apa gaosapma chu thihel hen ati.

⁵Ahinla nanghon, Koi hileh anule apa jah-a, Kavanga naphat chomna dingu jouse chu Pathen kipe-a ahitai, tia seija;

⁶Chule anu le apa jabol lou chu, chamlhat ding ahi, nati uve. Chutichun nangho chonna thu jal-in Pathen thupeh chu imacha hilou nasouvin ahi.

⁷Miphalhem ho, Isaiah'in nangho khanchan ding thu aseija:

⁸ Hiche mite hin akamuvin einaijun, athuseijun eijabolun, Alungula keija kona gamlatah ahi.

⁹Amahon athu hilnaova mihem thupeh jeng thua ahil jeh uvin, eihouvu jong moh ahi, ati chu adihtangeije, ati.

¹⁰Chuin Jesu'n mihonpi chu ahenga akouvin, ngai phaovin lang hetoh-un:

¹¹Mi kam sunga lut chun ama chu asubohpoi; mi kam sunga kona hung potbou chun asuboh-e, ati.

¹²Chutah-in aseijuite ahengah ahungun, ajah-a, Pharisai hon chuche thu ajah uva, alung phatmo-u khu nahet em? atiuve.

¹³Chuin Aman adonbutnin, Van'a um ka Pa phu hilouva keh thingphung jouse chu kibotdoh ding ahi.

¹⁴ Hiteho khu limsah hih-un, amaho khu mitcho lamhil ahiuve. Mitchon mitcho lamkaile ani lhona kokhuh-a lhalut lhonding ahi, ati.

¹⁵Chuin Peter'in adonbutnin, ajah-a, Hiche thulem thuhi neihilchet peh-un, ati.

¹⁶Chuin Jesu'n, Nangho jong tugeija hetna nei louva naum nahlaiju ham?

¹⁷Kam sunga lut chu oisunga alhalutnin, posona-ah apotpai jitai, ti heloulai nahiuvem?

¹⁸ Kam sunga kona hung pot vang chu lung sunga kona hung pot ahin; hichun mi asuhboh ji ahi.

¹⁹Ijeh-inem itile lung sunga konin lunggilou, tolthana, miji toh jon, jonthanhoi, guchat, thujousei, taitomna, hicheng chu apotjin ahi.

²⁰Hichengho chu ahi mi suboh ji-a; khut sop louva an neh vangin mi asubohpoi, ati.

²¹Chuin Jesu chukoma konin apotdoh-in, Tyre le Sidon gamkol lamah achetai.

²²Chuin, veuvin, chuche gamkaija cheng Canaan numei khat ahengah ahungin, Pakai, David chapa, neilungset in; kachanu thilha phalou tah-in amane, tin ahin samin ahi.

²³Ahin aman kam khatchan jong adonbutpoi. Chuin aseijuite ahengah ahungun, ajah-a, Amanu hi solmangtan, ijeh inem itile kanungsang chenguvah asam asamin ahi, tin ahung seijun ahi.

²⁴Aman adonbutnin, Israel phunga amangsa kelngoi heng tailou adanga dinga kisol kahipoi, ati.

²⁵Ahin numeinu chu ahungin, Pakai, neihutan, tin chibai aboh-in ahi.

²⁶Chuin Aman adonbutnin, Chate changlhah lahpeh-a uichate koma selhah chu adihpoi, ati.

²⁷Chuin amanun, Ahinai, Pakai; ahivangin uichaten jong apu dokhang chunga kona anmal lhajah chu anekhaji, ati.

²⁸Chutah-in Jesu'n adonbutnin, Numei natahsan alene; nalunggot bang chu hitahen, ati. Chuin chuche pettah-a pat chun achanu chu adamtai.

²⁹Chujouvin Jesu chukoma kon chun achen, Galilee dillen kom ahung lhungin, mol chungah akaltouvin, hikoma chun atoutai.

³⁰Hichun mipi tamtah ahenga ahungun, amaho chun elbai, mitcho, paomo, lhemvei le adang tamtah ahinpuijun, Jesu kengphang bulah alehlhauvin; chuin aman amaho chu aboldam sohtai.

³¹Chutichun mipi chun paomon thu aseija, lhemvei adamhela, elbaijin lam ajot, mitchon kho amu chu amuvin, kidang asauvin, Israel Pathen avahchoi taovin ahi.

³²Chuin Jesu'n aseijuite chu ahenga akouvin, ajah uva, Hiche mihonpi hi kalung asei; ijeh-inem itile keima toh aumkhom naohi ni thum ahitan, chule neh ding imacha aneipouve. Chule amaho an nelouvin kalhadoh nompoi; achuti loule lampia lhasampa getnunte, ati.

³³Chuin aseijuiten adonbutnun, Mi hijatpi nehva khop ding hikom gamthip laija changlhah hoija kila dingham? atiuve,

³⁴Chuin Jesu'n ajah uva, Changlhah pheng ijat naneijum? ati. Amahon, Pheng sagile nga neo themkhat aume, atiuvin ahi.

³⁵Chuin Aman mipi chu tolla toudin asoltai.

³⁶Chuin changlhah sagile nga chu alan, thangvahna aneijin, chuin ahehbal balin, aseijuite apen, aseijuiten mipi chu ahoppeh-un ahi.

³⁷Chuin abonchauvin aneuvin, ava sohkeijun, anehmoh-u ahal chu longkai sagi aloh dimun ahi.

³⁸Anea chu numeile chapang tailouva mi sangli ahiuve.

³⁹Chuin aman miho chu alhahdohsoh jouvin, kong sunga alutnin Magadala gamkai lama ahungtai.