Read Thado Chin Mathew 16 Bible Online

Mathew 16 - Thado Chin bible

Mathew 16

¹ Chuin Pharisaiho le Saddukai ho ahenga ahungun, apatepnan van'a kona melchihna khat avetsahna dinguvin athumun ahi.

²Aman adonbutnin, Nanghon nilhahle, Van san asoh-e; kho phading ahi, nati uvin.

³Chule jingkahle, van san asoh-in van anime; kho phalou ding ahi, nati uve. Vo nangho miphalhem ho, nanghon van umchan suhtoje vang naheuvin, phat umchan melchihna nasuto theipouve.

⁴ Migilou le mijong khanga miten melchihna aholuve, ahinla Jonah themgao melchihna tailou adang kipelou ding ahi, ati. Chuin amaho chu adalhan achemang tai.

⁵Chuin aseijuite gal lang khat agalkaijun, changlhah ahin pohai taovin ahi.

⁶ Hichun Jesu'n ajah uva, Pharisaiho le Saddukai ho chol lah-a chingtheijun lang kihongphauvin, ati.

⁷Amaho chun, Changlhah ikenlou jeh-u ahi, tin akihou lhiuvin ahi.

⁸Jesu'n hichu ahedoh-in, ajah uva, vo tahsan lhomho, changlhah nahinpoh loujeh uva ibola kihouhou nahiuvem?

⁹ Mi sangnga changlhah pheng nga-a chu paipeh ijat nalodoh uvem ti hedoh loulai le geljong geldoh loulai nahiuvem?

¹⁰ Chule mi sangli changlhah pheng sagi-a chu longkai ijat nalodoh-uvem?

¹¹Keiman nangho jah-a changlhah thu kasei ahilou chu ibola helou nahiuvem? Pharisaiho le Saddukai ho chol lah-a kihongphauvin, kati ahibouve.

¹²Chutah chun changlhah chol lah-a ati hilouvin, Pharisaiho le Saddukai ho thuhil lah-a chingtheijun, ati ahi chu ahedoh taove.

¹³Chuin Jesu Caesaria Philippi gamkolsung ageijin, aseijuite jah-a, Mihon Mihem Chapa hi koi ahi atiuvem? tin adongin ahi.

¹⁴ Chuin amaho, Kimkhatnin, John Baptist ahi, atiuvin; kimkhatnin Elijah ahi, atiuvin; kimkhatnin Jeremiah ahi, ahiloule themgaoho lah-a khatpen ahi, atiuve; tin aseijun ahi.

¹⁵Aman amaho jah-a, Nanghonla koi ahi neitiuvem? ati.

¹⁶ Chuin Simon Peter'in adonbutnin, Nangma Pathen hing Chapa Christa chu nahi, ati.

¹⁷Chuin Jesu'n adonbutnin, ajah-a, Jona chapa Simon, anunnoma nahi; ijeh-inem itile tahsaphe le thisanin aphondoh hilouvin, van'a um ka-Pan aphondoh joh ahibouve.

¹⁸Chule keiman jong nangma jah-a kasei ahi, Nangma Peter nahi, chule hiche songpi chunga hi kahoubung kasahdoh ding ahi; chule mithi kho kul kotpin aneh jou lou ding ahi.

¹⁹ Keiman nangma van lenggam kot-heh kapeh ding nahi; chule leiset chunga nangman nakha chan chu van'a jong kikhah ding; chule leiset chunga nangman nahon chan chu van'a jong kihong ding ahi, ati.

²⁰Chujouvin ama Jesu chu Christa ahi koima jah-a seidoh hih-un, tin aseijuite chu ahilchah-in ahi.

²¹Chuche jou chun Jesu Jerusalem'a achea, upaho le thempu pipuiho chule danthu sunho-a kona thil tamtah athoh-a, chule akitha-a, chule ni thum ni-a kaithouva aum tei ding danje chu aseijuite ahil pantan ahi.

²²Chuin Peter'in ama chu apuidoh-in, Pakai, hichu nanga konin gamla hen, chutobang chu nachunga chulouhel ding ahi, tin aphoh pantan ahi.

²³Ahin Ama akiheijin Peter jah-a, Kanung lamah chen, Satan, Nangma keima dingin kipal lhuhna nahi. Nangman Pathen thulam gel louvin mihem thulam jeng nagele, ati.

²⁴ Chuphatnin Jesu'n aseijuite jah-a, Koi hile kanung eijui noma chu ama kingaitom hen, chule athingpel kiput henlang kanung hinjuihen.

²⁵ Ijeh-inem itile koi hile ahinna huhhing noma chun achan ding ahi; amavang koi hile keima jala ahinna chana chun akimu ding ahi.

²⁶Ijeh-inem itile min vannoi leiset apumpin neihenlang ahinna chantale, a-ipi phachom dingham? Ahiloule min ahinna lhenga ipi apeh dingham?

²⁷ Ijeh-inem itile Mihem Chapa a-Pa loupina-a avantil tetoh hung ding ahin; chule chutengle aman mijouse athilbol dungjui cheh-a tohman asansah ding ahi.

²⁸Tahbeh-a kaseipeh nahiuve, Hikoma dingho kimkhat hi Mihem Chapa aleng gama ahung amu kahseuva thina tepkha lou ding aumuve, ati.