Read Thado Chin Mathew 17 Bible Online

Mathew 17 - Thado Chin bible

Mathew 17

¹ Chuin ni gup jouvin, Jesu'n Peter toh, Jacob toh, chule anaopa John toh apuijin, achomin molsang chung khatna apuitouvin,

²Chuin Ama amaho ang sungah avou akikhelin; Amai nisa bangin avah-in, aponsil chengse chu khovah bangin avamleng jengin ahi.

³Chuin, veuvin, Mosi le Elijah ahenguva ahung kilah lhonin, amatoh akihou lhonin ahi.

⁴Chuin Peter'in Jesu jah-a, Pakai, hikoma i-umu hi eiho dingin anome; naphatsahle nang ding khat, Mosi ding khat, chule Elijah ding khat, lhambuh thum songuving kate, ati.

⁵ Asei pettah chun, veuvin, meibang lhang khatnin amaho chu ahinle khutan; chuin meilhang lah-a kon chun aw khatnin, Hiche hi ka-Chapa deitah ahi, achungah kalung alhai tangeije, athu ngaijun, ati.

⁶Chuin aseijuiten chuche ajah phatnun, aboh khupmun amaiju tolla asulutnun, atija lheh jengun ahi.

⁷Chuin Jesu ahenguva ahungin akhoijin, Thouvun, kicha hih-un, ati.

⁸Chuin akhodah-un ahile, Jesu changseh tailou adang koima amuta pouvin ahi.

⁹Chuin molsanga kona akumsuh phatnun, Jesu'n amaho chu ahilchah-in, Mihem Chapa athia kona kaithouva aum masangsen, hiche nathilmu-u hi koima jah-a sei hih-un, tin akhamtan ahi.

¹⁰ Chuin aseijuiten, ibola danthu sunhon, Elijah hung masa tei ding ahi atiuham tin adongun ahi.

¹¹Chuin Jesu'n adonbutnin, ajah uva, Elijah chu hung masan tin ijakai ahung semphat ding mong ahi.

¹² Ahin kaseipeh nahiuve, Elijah chu ahungsa ahitai; hinla ama chu ahetlou jeh-un, achungah anopnop aboltauvin ahi. Mihem Chapan jong chutobangma chu amaho khutna athoh ding ahi.

¹³Hitah chun aseijuiten John Baptist thu asei ahi ti chu ahetauvin ahi.

¹⁴Chuin mipi lah ahung lhunun, mi khat ahungin a-angah adilsun, ajah-a,

¹⁵Pakai, kachapa lungsetnin, ajehchu abuhthi ahin, athohgim behseh jenge; abangle meijah alhalutjin, abangle twija alhalut jin;

¹⁶Chule naseijuite henga kahin puilela aboldam joupouvin ahi, ati.

¹⁷Chuin Jesu'n, Vo tahsanna neiloule khanglamvai mite, itihchan kaumpi dingu nahiuvem? Itihchan kakhongai ding nahiuvem? Ama chu kahenga hinpui tangu, tin adonbutnin ahi.

¹⁸Chuin Jesu'n thilha chu aphoh-in ahile asunga konin apot tai. Chuche-a pat chun chapang chu adamtai.

¹⁹Chuphatnin aseijuite Jesu henga ahungun guhthimin, I atile keihon kanodoh jou louvu hintem? atiuvin ahi.

²⁰ Chuin Jesu'n, Natahsan lhom jeh-u ahi, ijeh-inem itile tahbeh-a kaseipeh nahiuve, Nanghon tahsanna ankam mu tebep nei hileuchun, hiche molsang jah-a hin, Hikoma konin khukoma khun kichonin tileuchun, kichon jeng ding ahi. Nangho dinga imacha bolmo umlou ding ahi, ati.

²¹Ahin hitobang hi an ngol le taona beijin apotdoh jipoi.

²²Chuin Galilee gamsunga aumlaijin, Jesu'n ajah uva, Mihem Chapa hi mihemte khutna kipedoh dingkon ahi;

²³Chule amahon atha dingu ahi, chule ni thum nile kaithouva umding ahi, ati. Hiphat chun alungdong lheh jengtaovin ahi.

²⁴ Chuin Capernaum ahung geijun, kai dongho ahungun Peter jah-a, Nahilpau khun makhai kai ateji louham, tin adongun ahi.

²⁵Peter'in, Atiji nai ati. Chuin Peter insung agalutle, Jesu'n ajah-a, Iti nagelem, Simon? Leiset lengte hin kai hijongle sum lamman hijongle koi lah-a adon jiuvem? Achateu lah-a adon uvem, midang lah-a adon uvem, tin anahou masatai.

²⁶Chuin, Midang lah-a, tia adonbut phatnin, Jesu'n, Ahile, acha anaote cheng onga hija chula.

²⁷Hitajongle, nangma dil lamah chenlang nga gakoijin; nga nakoidoh masahpen chu lanlang akam keh-le chun dangka cheng khat namu ding ahi. Hichu choi jinlang igom-a dingin gapetan, achutiloule lung himosah get hite, ati.