Read Thado Chin Mathew 18 Bible Online

Mathew 18 - Thado Chin bible

Mathew 18

¹ Hiche pettah chun seijuite Jesu henga ahungun, van lenggama hi koi alenpen ham? tin adongun ahi.

²Chuin Jesu'n chapang neocha khat ahengah akouvin, alaijuva adinsah-in,

³ Ajah uva, Tahbeh-a kaseipeh nahiuve, Nangho nakile heijuva chapang neochahotoh nabah kit louvule, iti nama jongle van lenggam nalut lou dingu ahi.

⁴Hiche jeh-a chu hiche chapang neocha banga kineosah chu, van lenggama alenpen ahi.

⁵Chule koi hijongle hitobang chapang khat keima mina sanga chun keima eisan ahi.

⁶Ahin koi hijongle keima eitahsan hiche aneochaho lah-a khat kipal lhuh sah chan chu, angonga sumhei song lentah kikhaihen, twikhanglen thuhtah sunga kileh lutle ama dingin aphajoi.

⁷Ohe kipal lhuh jeh-in vannoi leiset adana-e! Kipal lhuhna chu umtei ding mong vang ahi, ahinla ohe kipal lhuh sah-a chu koi hile adana-e!

⁸ Chule nakhut ahim, nakeng ahim, khatjo sangin nakipal lhuh sah-a ahile tanbongin lang paimangin; khut ni, keng ni neija tonsotna mit theilou meikonga nakilelut sangin, tibukim loule kengbaijin hinna-a lutle chun nang dingin aphajoi.

⁹ Chule namitnin nakipal lhuh sah-a ahile, kaldoh-in paimangin; mit ni neija damun meikonga nakilelut sangin, mitlang chon hinna-a lutle chun nang dingin aphajoi.

¹⁰Kihong phaovin, hiche aneochaho lah-a khatcha jong nahsahmo hih-un; ijeh-inem itile kaseipeh nahiuve, Avantil teovin van'a um ka Pa mai chu ave jingun ahi.

¹¹Ajehchu amangsaho huhhing dinga mihem Chapa chu hunga ahi.

¹²Chule iti nangai touvem? Mikhatnin kelngoi ja khat aneija, alah-a khat ava mangthah-a ahile, aman somko le ko chu adalhah-a, molsang chung lama chea avah mangthah khat chu agaholji louham?

¹³Chule ahol chu amua ahile, tahbeh-a kasei ahi, amapa chun avah mangthah lou somko le ko chunga sang chun, hiche khat chunga chun akipahjon ahi.

¹⁴Chutobang chun hiche aneochaho lah-a khattou amanthah ding hi van'a um na-Pau lunglam ahipoi.

¹⁵ Chule nasopi nachunga achonset tah-a ahile, chenlang nangle ama changseh hetnin asetna chu phoh-in; chua angaija ahile sopi chu nanei ahitai.

¹⁶ Angai lou vangle, ahetoh dingin mi nile thum kama thu jouse akichetna dingin, ni hile thum hile kipuijin.

¹⁷Chule chucheng sei jong angai loulaija ahile, houbung henga lhutnin; chua houbung thu jong angaisam louva ahile, ama chu nangho dingin chidang namdangle kaidongho banghen.

¹⁸ Tahbeh-a kasei ahi, itobang hijongle leiset chunga nakha-u chu van'a jong kikhah ding, leiset chunga nahonu chu van'a jong kihong ding ahi.

¹⁹Tahbeh-a kaseipeh kit nahiuve, Leiset chunga nalah uva mi nin kilungthoh tah-a thilthum neija atao lhonle, van'a um ka Pan abulhitpeh lhon ding ahi.

²⁰Ijeh-inem itile hoikom hijongle mi ni hile thum hile kamina akikhopnao chana chun, alah uva kei kaumnai, ati.

²¹ Chupettah chun Peter ahenga ahungin, ajah-a, Pakai, kasopin kachunga ijatvei achonsetle kangaidam dingham? Sagivei geijinem? ati.

²² Jesu'n ajah-a, Najah-a sagivei geijin katipoi; amavang sagi munsom sagivei geijin katijo bouve.

²³Hijeh chun van lenggam thuhi lengpa khat asohtetoh sum sutoh dinga kigo-a toh kitekah thei ahi.

²⁴Asuto pantan ahile, alah uva mikhat ama talent sangsom batpa chu ahenga ahinkai taovin ahi.

²⁵Apeh ding ima anei lou jeh-in a-pakaipa chun amatoh, aji achate toh, anei chengse joh-a chule dit dingin thu apetan ahi.

²⁶Achuti phatnin asohpa chun aboh khupmin, chibai aboh-in, Pakai, neikhongai tadin, abonin sadoh nange, ati.

²⁷Hichun a-pakai pan alungsetnin, alhadoh-in, asumbat jong chu abeisah-in angaidam tai.

²⁸Ahin chuche sohpa chu apotdoh phatnin, asohchanpi khat dangka somnga bat amun; amanin alol ameh-in, ajah-a, Neipeh ding chengse chu neipen, ati.

²⁹Achuti phatnin asohchanpipa kengbula aboh khupmin, ahenga ataovin, Neikhongai tadin, keiman nang abonchan sanange, ati.

³⁰Ahivangin ama anom hih-in, apeh ding chengse chu apeh kahsen songkul'a agakhumtan ahi.

³¹Chuin asoh chanpihon achuti umchan chu amuvin, alung phamo lheh-un, a-pakai pau henga ahungun thu umchan jouse chu ahung hiltaovin ahi.

³²Chuphatnin a-pakai pan akoma akou lutnin ajah-a, Vo soh nunse, kahenga natao jeh-a kangaidam ahitai.

³³Achutile keiman nang kalungset banga, nangin jong nasohchanpi nalungset ding thu hilouham? ati.

³⁴Chuin a-pakaipa alunghangin, abat chengse asah chaisoh kahse-a dingin, mi bol gentheiho khutna apedohtai.

³⁵Nanghon nasopiteu suhkhelna chu lunggiltah cheh-a nangaidam louvule, van'a um ka Pan nangho chutobanga chu nabol dingu ahi, ati.