Read Thado Chin Mathew 2 Bible Online

Mathew 2 - Thado Chin bible

Mathew 2

¹Herod lengpa lal laijin Judah gama Bethlehem khopi-ah Jesu apengtan ahile, veuvin, niso lama konin ahsi lekhathem ho phabep Jerusalem'a ahungun, Judah te lengpa apengin ahi, ama chu hoilamham?

²Keihon niso lamah ahsi kamuvin, chibai bola hung kahiuve, atiuvin ahi.

³Herod lengpan chuche thu ajah phatnin, amati Jerusalem miteti alungu ajingtan ahi.

⁴Chuphatnin thempu pipuiho leh miho danthu sunho chu akhomin, Christa hoija peng dingham, tin adongin ahi.

⁵Amahon ajah-a, Judah gam Bethlehem'a peng ding ahi; ijeh-inem itile,

⁶ Vo Judah gama um Bethlehem, Judah vaipote lah-a nangma iti nama jongle aneopen nahipoi; Ijeh-inem itile nalah-a kona vaipo khat, Kamite Israelte ching ding chu pengdoh ding ahi; tin themgao seija konin akisune, atiuvin ahi.

⁷Chuin Herod in ahsi lekhathem ho chu guhthimin akouvin, ahsi so phat chu kichentah-in ahetoh tan ahi.

⁸Chuin amaho chu Bethlehem'a asolin, Cheovinlang naosen chungchang thudol chu chentah-in gadongtoh uvin; chule namudoh tengule keima jong kache-a chibai kagaboh theina dingin thu hinpo kit uvin, ati.

⁹Lengpa thu ajah phatnun amaho akipatdoh taovin ahi; chule, veuvin, niso lama amu-u ahsi chu amasanguva achepeh-in, naosen umna chunga chun akingan ahi.

¹⁰Ahsi chu amu phat uvin athao anomin, hapan akipah-un ahi.

¹¹Chuin amaho in sunga alutnun ahile naosen chu anu Mariam toh amu thaovin, aboh khupmun ama chu ahou taovin ahi; chuin athil lu bom cheh-u asolhaovin, kipamanin, sana, bego, myrrh ama chu apetaovin ahi.

¹²Chujouvin amanguva Herod heng lama akile kit louna dinguva Pathen'in ahilchah jeh uvin, lam chom ahovin agam lamuva achemang taovin ahi.

¹³Chuin amaho chedoh nungin, veuvin, Joseph amangin Pakai vantil khatnin, Thouvin, naosen leh anu puijin lang Egypt gama jam lutpitan, chule thu kapeh kahsen chua chun um jingin; ijeh-inem itile Herod'in naosen chu suhmang dinga ahol ding ahi, ati.

¹⁴Chuin ama athoudoh-in, jan-in naosen leh anu akipuijin, Egypt gam ajontan ahi.

¹⁵ Chule Herod thi kahsen hia chun aumin ahi: Pakaiyin themgao kama asei, Egypt gama konin ka-Chapa kakouve, ati chu guilhuna dinga chuti ahi.

¹⁶Chuin ahsi lekhathem hon alhim lhah-u ahi akihetdoh phatnin, Herod alunghang behseh-in, mi asolin, ahsi lekhathem ho-a kona aphat ahetchen dungjui chun, Bethlehem le akimvel sese-a pasal chapang kum ni-a lhah noilamse athattan ahi.

¹⁷Hichun themgao Jeremiah thusei,

¹⁸ Ramah-a akaple amao aw akijai; Rachel'in achate aka akan, Aum lou jeh uvin lhepbi ding anomtapon ahi; ati chu guilhunga ahitai.

¹⁹Ahivangin Herod athi phatnin, veuvin, Pakai vantil khatnin Egypt gamah Joseph mangin akimusah-in,

²⁰Thouvin lang naosen leh anu kipuijin, Israel gam lama chetan; naosen tha dinga goteho chu athitaove, ati.

²¹Chuin ama kipatdoh-in, naosen leh anu akipuijin, Israel gam lama ahung kit tai.

²²Ahivangin Judah gamah Archelaus apa Herod khelin vai apoi ti ajah phatnin, chulama ache ngamta hih-in; amanga akihilchah jeh-in, akipatnin Galilee gamah akileheitai.

²³ Chule ama chu Nazareth mi kiti ding ahi, tia themgao hon asei chu guilhun theinan, achen Nazareth khopi-ah achengtan ahi.