Read Thado Chin Mathew 20 Bible Online

Mathew 20 - Thado Chin bible

Mathew 20

¹Ijeh-inem itile van lenggam chu inneipu khat jingpitah-a alengpi leija goi ding natong ding hola che tobang ahi.

²Chuin ama chun natong dingho chutoh ni khatna seki ni lo dinga akihoutoh phatnun, alengpi leija asoltai.

³Vai nungin apotdoh-in, kaithela mohseh-a dingho amun,

⁴Ajah uva, Nangho jong lengpi leija konun; adoldolin napenao ving kate, ati. Chuin amaho chu achetauvin ahi.

⁵Chuin sunkimvel le ni kiheijin apotdoh-in chutobangma chu abol kitnin ahi.

⁶Chuin vaiche phattah-in ama apotdoh-in ahile, midang dingleho chu amun, ajah uva, Ibola sun nilhumkeija mohseh-a nadinu ham? ati.

⁷Amahon adonbutnun, Koima eigoijuva aumpoi, atiuve. Aman ajah uva, Kalengpi leija konun, adol dola nakisan diu ahi, ati.

⁸ Nilhah ahi phatnin, lengpilei neipa chun asum chingpa jah-a, Natongho kou inlang athamanu pen, goi nukhahpena patnin goi masahpena chaijin, ati.

⁹Chuin vaiche phatna kigoipanho chu ahung phatnun, seki ni cheh asangtaovin ahi.

¹⁰Chuin goi masahpenho chu ahung phatnun, kisangtam cheh-inte tin angaito uvin; amala amahon jong seki ni bou asang taovin ahi.

¹¹Chuin hichu akilah nungun, inneipu chunga chun aphun taovin,

¹²Anununghon nidan kah khatbou na atongun, nangman keiho nisa hahlai thoh-a tonggim chengtoh neikibah sah-un ahi, atiuvin ahi.

¹³Ahin aman alah uva khatpa chu adonbutnin, Kajol, nachungah kakhelna aumpoi; seki ni dinga ikihou hilouham?

¹⁴Nathaman sum kilah-in chetan, anunung penpa hi nang kapeh jatma chu kapeh nom-in ahi.

¹⁵Kanei nahnah kanopnopma kabol chu kadih louham? Ole kaphat jeh-a hi neimit thip hitam?

¹⁶ Chutobang chun anukhah masan tin, amasa nukhah ding ahi, ati.

¹⁷Chuin Jesu Jerusalem lama achetou konin, somleni ho chu atumin gam choma apuijin, lam dungah ajah uva,

¹⁸Veuvin, Jerusalem jonin ichetouvui; chule Mihem Chapa hi thempu pipuiho le danthu sunho khutna pehdoh-a umding; chule amaho chun athina dinga themmo achansah dingu ahi.

¹⁹Chule a-el ela aboluva, ajepmuva, thingpel'a khetbeh dinga chidang namdangte khutna apehdoh dingu ahi; chule ni thum nile ama kaithouva umding ahi, ati.

²⁰Hiche petah chun Zebedee chapate anuvin achateni chu ahin kipuijin, Jesu henga ahungun, chibai aboh-in, ahenga ikhat thumnan ataovin ahi.

²¹Aman amanu jah-a, ipi nangaichat ham? ati. Chuin amanun, Nagam sunga kachate ni hi khat najetna, khat naveija atou theina lhon ding thu pen, ati.

²²Jesu'n adonbutnin, Nanghon nathumu chu nahet louvu ahi. Kadon ding khonna hi nadon lhona, chule baptize kachan ding hi nachan ngam lhon ding hinam? ati. Chuin amanin, Kangame, ati lhonin ahi.

²³Chuin aman, Kadona ding khonna vang chu nadon lhona, chule ka baptize chan banga hi nachan theihon ahinan; kajetle kaveija tousah ding vang chu keima peh dol ahipoi; ka-Pan adinguva agotsaho bou chu kipe ding ahi, ati.

²⁴Hichun somho chun hichu ajauvin, uchateni chunga chun alung phamo taovin ahi.

²⁵ Ahinla Jesu'n amaho chu akouvin, ajah uva, Nanghon naheuve, chidang namdangte chunga vaipoho khu a-pakaiyu vin apangun, chule milen milaltehon achunguva athuneinau apanjiuve.

²⁶ Nangho lah-a vang chuti chu ahipoi; ahin koi hile nangho lah-a alen hi noma chu, nalhachaova pang ding;

²⁷Chule nalah uva apipuipen hi noma chu, nasoh-u hi ding ahi.

²⁸Chutobanga chu Mihem Chapatah jong chu jen dinga hung hilouvin, ajenle dingle mi tamtah lhatdoh na-a ahinna toh dingjoh-a hung ahi, ati.

²⁹Chuin Jericho khopi-a kona akipatdoh-in, mipi tamtah-in anung ajuijun ahi.

³⁰Chule, veuvin, mitcho ni lampamah atou lhonin, amani chun lampi chu Jesu'n ajotne ti ahet phat lhonin, Pakai, David chapa, neilungset lhonin, tin asam lhonin ahi.

³¹Chuin mipi chun, Thipbeh-in um lhonin, tin aphoh-un ahi; ahivangin amanin ahasapcheh lhonin, Pakai, David chapa, neilungset lhonin, ati lhonin ahi.

³²Chuin Jesu adingin, amani chu akouvin, I-lolhon leng nalung lhonham? ati.

³³Amanin, Pakai, kamit lhon hasah-in, ati lhone.

³⁴Chuin Jesu'n alung asen, amit lhon akhoipeh-in ahile amanin kho amupai jeng lhonin, chule anung ajui lhontai.