Read Thado Chin Mathew 21 Bible Online

Mathew 21 - Thado Chin bible

Mathew 21

¹Chuin Jerusalem ahung naijuva, Olive molsanga um Bethphage ageitah-un, Jesu'n aseijuite mi ni asolin,

²Ajah lhona, Namasang jon lhona kho sunga khun lut lhonin, chule sangan anoutoh kihen namu paijen lhon ding ahi; hiteni chu sut lhoninlang kahenga hinkai lhonin.

³Mi khattou ikhat sei aumle, Pakaiyin hiche teni hi manna nom aneije ti lhonle chun, aman ahinsolpai jeng ding ahi, ati.

⁴Themgaovin anasei guilhuna dinga hiche ho jouse hi soh-a ahi,

⁵ Nanghon Zion chanu jah-a, Ven, nalengpa lungnem tah-in sangan chungah, sangan nou chungah atouvin naheng-ah ahunge.

⁶Chuti chun aseijuite ni chu ache lhonin, Jesu'n asei bangbang chun abol lhonin;

⁷Sangan le sangan nou chu ahinpuijun, achunga aponu aphaovin; achunga chun Jesu atousah-un ahi.

⁸Chuin mipi lah-a atamjon lam dunga aponu aphaovin, adangsen theoboh alhamun, lam dunga aphaovin ahi.

⁹ Chule mipi amasang lama che chengsele anungjui chengse chun, David chapa, Hosanna, [3] Pakai mina hungpa chu anunnome; Chungnung pena Hosanna! atiuvin asam asamun ahi.

¹⁰Chuin Jerusalem alut phatnun, Hiche hi koiham? tin khopi pumpin akilohsoh jengun ahi.

¹¹Chuin mipi chun adonbutnun, Hiche hi Galilee gam Nazareth kho-a kon themgao Jesu ahi, atiuvin ahi.

¹²Chuin Jesu Pathen houin'ah alutnin, houin sunga thil johho le thil choho abonchan anodoh-in, chule sumlheng ho dokhangle vakhu johho touna chu alekhup peh-in,

¹³ Ajah uva, Ka-in chu taona in kiti ding ahi, tin akisune; ahin nanghon gucha michom kokhuh-in nasem uve, ati.

¹⁴Chuin houin'a chun mitcho le elbaiho ahungun, aman amaho chu aboldamin ahi.

¹⁵Ahin thempu pipuiho le danthu sunhon athilbol kidangle houin'a chapanghon Hosanna, David chapa, tia asap chu amuvin, alungphamo lheh jengtaovin,

¹⁶Amahon ajah-a, Hiteho hin ipi aseiju najah nah-em? atiuvin ahi. Chuin Jesu'n, Kajanai; Naosen leh chapang noi cheplai kamin jong vahchoina nachamkim sahtai, ti chu nasimdoh lou uham? ati.

¹⁷Chutichun aman amaho chu adalhan, khopi-a konin apotdoh-in Bethany'a achen; chua chun agehtai.

¹⁸Chuin jingkah-in khopi lam ahinjon kitnin ahile, agil akeltan ahi.

¹⁹Chuin Aman lamkenga theichang phung khat amun, aphunga achen ahile ana tailou imacha aga mupoi; Chuin Aman, Imatih chanin naga gakit tahih hen, ati. Chuin chupettah chun theichang phung chu agoppai jengtai.

²⁰Hichu aseijuiten amu phatnun, alungdong jengun, I-atile theichang phung chu goppai jenga hitante! atiuvin ahi.

²¹ Chuin Jesu'n adonbutnin, ajah uva, Keiman tahbeh-a kaseipeh nahiuve, Nanghon gingchalel louhela tahsan naneijule, hiche theichang phung hitia bolseh hilouvin, hiche molsang jong hi, Hikoma konin kichondoh inlang twikhanglen'a kileh luttan, ti jongleu chun hi thei ding ahi.

²²Chule ipi hijongle tahsan tah-a taona-a nathum chanu chu aboncha namusoh dingu ahi, ati.

²³Chujouvin Houin'a alutna thu ahil petnin, thempu pipuiho le upaho ahenga ahungun, ajah-a, Ipi thunei na-a hitiho hi nabolham? Kon hiche thuneina hi napeh ham? atiuvin ahi.

²⁴Jesu'n adonbutnin, Kenjong nangho thu khat donging kate; hichu naseijule kenjong ipi thuneija hicheng kabol ahi seipeh naovinge:

²⁵John baptize bol chu hoija konham? van'a konha ahiloule mihem'a konham? ati. Chuin amaho akingai touvin, Van'a kon ahi, tileu henla, chuti ahile, Ibola ama natahsan lou uham? tintin;

²⁶Mihem'a kon ahi ti dingla, mipi jousen John chu themgao ahi tia angaito jeh-un ikichaovin, akitiuvin ahi.

²⁷Chutichun amahon Jesu adonbutnun, Kahepouve, atitaove. Chuin Aman jong amaho jah-a, Achutile ipi thuneija hicheng kabol ham keiman jong naseipeh deh pouvinge, ati.

²⁸Ahivangin iti nangai touvem? Mi koiham khatnin chapa ni aneijin, khatpa henga achen ajah-a, Chapa, tunin lengpi leija konin lang na gatongin, ati.

²⁹Aman, Kanompoi; chepong-e, tin adonbutnin, ahivangin khonungin alung aheijin, achetan ahi.

³⁰Chuin khatjopa henga achen, ajah-a chutobangma chun agaseijin ahi. Aman, Hepa, chenange, tin adonbutnin; chela achetapon ahi.

³¹Hite ni chu koijoh chu apa lunga chonham? ati. Amahon, Amasajoh chu, atiuvin ahi. Chuin Jesu'n ajah uva, Tahbeh-a kaseipeh nahiuve, Nangho sanga kaidongho le notiho Pathen lenggam sunga lut masajo ding ahiuve.

³² Ijeh-inem itile John chu chonphatna lampia naheng uva ahungin, nanghonla nanatahsan pouve; kaidongho le notihon bou anatahsan uvin ahi. Nangho vangin chuche namu-u jong chun, ama chu natahsan theina dingun, khonungin nalung naheichom dehpouvin ahi.

³³ Thulem chom khat jong ngaikitnun: inneipa khat hin lengpilei abolin, palin aum kimvelin, lengpiga chil lhahna pum alaijin, insang asan, chuin alei lhouho khutna apedoh-in, gamdanga achemang tai.

³⁴Chuin aga phat anai phatnin, atheiga la dingin aleilhouho henga asohte asoltan ahi.

³⁵Ahin aleilhouho chun anamanun, khat avovin, khat athatnun, athum napa songin asepmun ahi.

³⁶Asohte dang amasaho sanga tamjo asol kitnin ahile, amahon angaina bepmin anabolun ahi.

³⁷Akhonna-in aman, Kachapa hi anaja domunte, atin achapa ahenguva asoltai.

³⁸Ahinla lengpi leilhou hon achapa chu amu phatnun, amahole amaho akihouvun, Ama hi agou lo dinga ahi; hungun, thatnu hitin, agou lo ding eiho changuhite, akitiuvin ahi.

³⁹Chuin ama chu amanun, lengpilei polamah akaidoh-un, athat taovin ahi.

⁴⁰Hijeh chun lengpilei neipa chu ahung teng, chuche aleilhouho chu i-lontem? ati.

⁴¹Amahon ajah-a, Chuche migilouho chu aman engsanin sugamintin, aga phatseh-a atheiga ape ding leilhou dang khutna alengpi lei chu pedoh tante, atiuvin ahi.

⁴² Jesu'n ajah uva, In sahon adeimoa apaiju song chu aninga songpi penin apangtai; Hiche hi Pakaiya kon ahin, chule imitmuvin akidange, ti Pathen lekhabua thuhi nasimdoh khah lou uham?

⁴³Hiche jeh-a chu keiman nangho jah-a kasei ahi, Nangho-a kona Pathen lenggam kilamanga, agadohsah namdang mite kipe ding ahi.

⁴⁴Koi hijongle hiche song chunga lhu-a chu ahal hala chip ding; chule koi hile achunga chuche song chua chu leivui banga kithejal ding ahi, ati.

⁴⁵Chuin thempu pipuiho le Pharisai hon hiche athulem sei chu ajah phatnun, amaho chunga thusei ahi chu ahedoh taovin ahi.

⁴⁶Chuin ama chu mat dingin agouvin, ahivangin themgao ahi tia angaito jeh-un, mipi chu akichauvin ahi.