Read Thado Chin Mathew 22 Bible Online

Mathew 22 - Thado Chin bible

Mathew 22

¹Chuin Jesu'n adonbutnin, ajah uva thulemin asei kitnin,

²Pathen lenggam chu Lengpa khat achapa jineina dinga golvah bol tobang ahi;

³Aman agolvahna-a dinga kouna changho chu hungtaovin tia kou dingin asohte asolin; ahinla amaho chu ahung nompouvin ahi.

⁴Chuin aman asohte asol kitnin, Akikouho henga cheovin lang, Veuvin, golvahna an aphasadema kagot ahitai: kabongchal le kagancha thao ho akithat tan, chule abonchan phasademin gotsan aumsohtai; nangho moupui golvahna-a hunguvin, tin gaseijun, ati.

⁵Ahivangin amahon dona neipeh louvin, achemang gamuvin, khat alouva achen, khat sumkol veijin achen;

⁶Adangsen asohte chu amanun, nahsahmo tah-in abolun, athat taovin ahi.

⁷Ahin lengpan hichu ajah phatnin, alunghang tan; asepaite chengse asolin, chuche tolthat ho chu asumanghelun, akhou jong ahalpeh taovin ahi.

⁸Chutah-in asohte jah-a, Golvahna an gotsa ahitai, ane dinga kakou tehola anehoi ahipouve.

⁹Hijeh chun lamka lamthoma cheovinlang, mi namu chanu golvah an nedingin gakouvun, ati.

¹⁰Chutichun asohte chu apot-un lampi dunga acheuvin amu chanu mipha mise apui khomun ahile, golvahna indan chu jin adimset tan ahi.

¹¹Chuin lengpa chu jinho velen ahungin ahile, moupuina vona kivon lou mi khat amudohtan ahi.

¹²Aman, Kajol, moupuina vona kivon louva hikoma iti nahung lutham? tin adongin ahile, amapa sei ding helouvin aumtan ahi.

¹³ Chuphatnin lengpan asottolleho jah-a, Akhut akeng kanun lang, kaidoh-un, chule polam muthim lah-a paidoh taovin; hikoma chu kale hagel umding ahi.

¹⁴Akikou vang tamtah ahin lhendoh vang lhomcha bou ahi, ati.

¹⁵Chuin Pharisai hon athuseija kona mat theina ding doha abolun akihou taovin ahi.

¹⁶Chuin aseijuiteu chu Herod miho toh asolun, amaho chun ajah-a, Houhil, nangma mi dihtah nahi, dihtah-a Pathen lampi chu nahil ahin, chule koima gin naneipoi ti kaheuve; nangman mimai navepoi.

¹⁷Hijeh chun Caesar kai kapeh-u hi, dan ngai ham, hilouham? iti nagelem? neisei peh-un, atiuvin ahi.

¹⁸Jesu'n alunggilou vop-u chu ahen, ajah uva, Vo miphalhem ho, ibola neilunglah uham?

¹⁹Kai kidon na-a sum kipeji chu neivet sah-un, ati. Chuin amahon dinarii khat ahinchoi jun ahi.

²⁰Chuin Aman, Hiche hi koi lim le koi minham? tin adonge.

²¹Amahon, Caesar'a ahi, tin adonbutnuve. Chuphatnin Aman, Caesar'a chu Caesar peuvinlang, Pathen'a chu Pathen peuvin, ati.

²²Chuche ajah phatnun, adatmouvin, ama adalhauvin, achemang taovin ahi.

²³ Chuche nimama chun, Mithi thokitna aumpoi ti Saddukai ho ahenga ahungun, thu ahung dongun,

²⁴ Houhil, mi khatcha nei louva athile, asopipan anumeinu chu akichenpia, asopipa dinga chu chi akhaipeh ding ahi, tin Mosi'n eihilun ahi.

²⁵Ahile tun kalah uva ucha pasal sagi aumun; amasapenpa chun ji aneijin athitai; ahin ama chu chikhai lou ahitah jeh chun, a-inneipi chu asopipa adalhah pehtai.

²⁶Chuti chun abanapa jong, athumnapa jong, asaginapa geijin chutima chun aumtan ahi.

²⁷Akhonna-in anumeinu chu athitai.

²⁸Ahile thokitna-a amanu chu sagi lah-a koipen ji hitantem? Amahonla ji-a anei sohkeiju ahin, atiuvin ahi.

²⁹Jesu'n adonbutnin, Pathen lekhabua thu le Pathen thahatna nahetlou jeh uva nakheljiu ahi.

³⁰Thokitna-a chun amaho akicheng tapouvin, chen jong akichensah tapouve; van'a Pathen vantilte tobang ahiuve.

³¹Ahinla mithi thokit dol thu Pathen'in najah uva asei,

³² Keima Abraham Pathen, Isaac Pathen, chule Jacob Pathen kahi, ati chu simkha lou nahiuvem? Ama athiho Pathen hilouvin, ahingho Pathen ahijo bouve, ati.

³³Mipi chun hichu ajauvin, athuhil chu kidang asa lheh jengun ahi.

³⁴Aman Saddukai ho anelkhup hel jeng chu ajah phatnun, Pharisai ho akikhomun ahi.

³⁵ Chule alah uva danthuthem khatnin apatepnan thu adongin,

³⁶Houhil, chondan thupeh lah-a apipen hoiche ham? ati.

³⁷ Chuin Jesu'n adonbutnin, Nangman nalung pumpin, nalhagao pumpin Pakai na-Pathen chu ngailun.

³⁸Hichu thupeh pipen le amasapen ahi.

³⁹ Chule chutobanga chu anina hiche ahi, Nangma naki ngailut bangin naheng nakoma ngailun.

⁴⁰Thupeh hichete ni-a hin thupeh jouse le themgaoho thu kikhai cheh ahi ati.

⁴¹Chuin Pharisai ho akikhop petnun, Jesu'n amaho thu adongin, ajah uva,

⁴²Messiah thudol hi iti nagel uvem? Ama koi chapaham? atin ahile amahon, David chapa, atiuvin ahi.

⁴³Chuin Aman ajah uva, Chuti ahile,

⁴⁴ Pakaiyin ka Pakai jah-a, Keiman namelmate chengse nakeng chotpha kaneisah masangsen, kajetlama tou jingin, ati tia David chun Lhagaova ama chu Pakai iti atiham?

⁴⁵Chutia David'in ama Pakai asahle, achapa iti hi dingham? ati.

⁴⁶Chuin koimachan cheng khatchan jong adonbut thei tapouvin, chuche ni-a pat chun koimachan thudang khatcha jong adong ngam tapouvin ahi.