Read Thado Chin Mathew 23 Bible Online

Mathew 23 - Thado Chin bible

Mathew 23

¹Hichun Jesu'n mipi jahle aseijuite jah-a,

²Danthu sunho le Pharisai ho Mosi touna mun'a tou ahiuve.

³Hiche jeh chun athupeh chengseu abonchan bolunlang nit sohkeijun; ahin athilbol bangun vang bol hih-un; ijeh-inem itile amahon asei chu aseijun abolji pouve.

⁴Amahon doutheilou pohgih akanun miho lengkouvah asep-un, amahonla akhutjung khatchan jong thamloh ding anompouve.

⁵ Ahin amahon athilbol jouseu khu mi mu dingabou abolu ahi; ijeh-inem itile amahon thuchinbom akibu ule akibehho chengu khu apeh aletsah-un; chule aponmongu acholsah-un,

⁶Golvahna-a mun pipen chule kikhopna in'a touna pipen,

⁷Kai lhanga min chibai aboh dingule, min Rabbi, Rabbi, ati dingu adeijun ahi.

⁸Nanghon vang mi Rabbi kitisah hih-un; ijeh-inem itile nangho nahiluva khat, Christa jengtah chu aumnai. Chule nangho nabonchaovin sopikhat cheh nahiuve.

⁹Vannoi leiset chunga koima pa sah hih-un; ijeh-inem itile van'ah na-Pau khat aume.

¹⁰Chule nanghon mi lamkai kitisah hih-un; ijeh-inem itile nalamkaija khat, Christa jengbou ahi.

¹¹ Nalah uva alenpen chu najenleuva pang ding ahibouve.

¹² Koi hile ama kichoi sang chu kisunem ding; chule koi hile akineosah-a chu kichoi sang ding ahi.

¹³Ahinla ohe, Danthu sun le Pharisai miphalhem ho, nadau ahi! Ijeh-inem itile nanghon miho masanga van lenggam nakhah-un; nanghola nalutpouvin, chule lut dinga kigoho jong nalutsah pouvin ahi.

¹⁴Vo danthu sunho le Pharisai miphalhem ho, nadau ahi! Ijeh-inem itile nanghon meithaiho in napum valun, kilepnan sot tahtah natao jiuve; hijeh-a chu nangho themmo chungnung nachan dingu ahi.

¹⁵Ohe, Danthusun le Pharisai miphalhem ho, nadau ahi! Ijeh-inem itile mi khat Juda hou housahna dingin twikhanglen le leiset chunga nache kimvel leuvin, chule koi hile najopjop chu nangho sanga ajat ni-a damun mi nahisah jiuvin ahi.

¹⁶Ohe, lamhil mitcho ho, nadau ahi! Ijeh-inem itile nanghon koi hile houin pana kihahsel imathu aumpoi; koi hile houin'a um sana pana kihahsel bou chu leiba ahi, nati uve.

¹⁷Vo lungthimbei le mitcho ho, sana suthenga houin le sana chu hoijoh chungnung-jo-a ham?

¹⁸Chule nanghon, Koi hile maicham pana kihahsel imathu aumpoi, maicham chunga um thilto pana kihahsel bou chu leiba ahi, nati uve.

¹⁹Vo mitcho ho, thilto suthenga maicham le thilto chu hoijoh chungnung-jo-a ham?

²⁰Hijeh chun koi hile maicham pana kihahsela chun, maicham le achunga um thilto aboncha apatna kihahsela ahi.

²¹Chule koi hile houin pana kihahsela chun, houin le achengpa chu agoma apatna kihahsela ahi.

²² Chule koi hile van pana kihahsela chun, Pathen touna le achunga Toupa agoma apatna kihahsel ahi.

²³ Ohe, Danthu sun le Pharisai miphalhem ho, nadau ahi! Ijeh-inem itile nanghon pudina le pathikhom, chule jira hicheng chu somakhat natohji uvin, danthupeh lah-a alupen, thu adih-a tan, milungset, chule tahsan hicheng chu nalhadah-un ahi. Ahin hicheho hi naman uva, hitiho jong chu nalha lou dingu ahi.

²⁴Vo lamhil mitcho ho, nanghon thouvaisi nalhiuvin, sagongsang napumval-ui!

²⁵Ohe, Danthu sun le Pharisai miphalhem ho, nadau ahi! Ijeh-inem itile nanghon khonle lheng apolam nasil ngimun, asunglam hunama lah le kitimlouna adimsetnin ahi.

²⁶Vo Pharisai mitcho, khonle lheng chu asunglam silngim masale chun, apolam jong ngim dingbou ahi.

²⁷ Ohe, Danthusun le Pharisai miphalhem ho, nadau ahi! Ijeh-inem itile nangho lhan bangleh-a kiloi tobang nahiuve; hitiho chu apolam hoilheh-in akimun, asunglam mithi gu le imanen aboh jouse adimsetnin ahi.

²⁸Chutobang chun nangho jong napolamu mi mu dingin chonphatah nahiuve; ahin nasunglamu vang phatlhemna le khangitlouna adimsetnin ahi.

²⁹Ohe, Danthu sun le Pharisai miphalhem ho, nadau ahi! Ijeh-inem itile nanghon themgaoho lhan nasemun, chule michonpha ho lhan najemun,

³⁰Chule, Kapu kapateu hinlaija chu keiho uma hileuveng, themgaoho thisan sona-a chu pan kalahlou dingu ahi, nati uve.

³¹Chutichun nangho themgaoho that teho son nahiuve ti chu, nangho le nangho ahetoh-a nahiu ahi.

³²Napu napateu thil tena dan chu bulhit pai ngaltaovin.

³³ Vo gulteho, gulse sonho, nangho hi damun thutan na-a kona iti nahoi thei dinguham?

³⁴Veuvin, keiman naheng uva themgao, miching, chonna danthuhil kahinsole; amaho lah-a chu abang nathauva thingpel'a nakhetbeh uva, abang kikhopna ina najep uva, chule khotina nabolset dingu ahi.

³⁵ Hichu michonpha Abel thisan kiso-a pat, houin le maicham kikah-a natha-u Barachiah chapa Zekariah thisan kiso geija, leiset chunga michonphateho thisan kiso themona jouse aboncha nangho chunga achuh theina dinga ahi.

³⁶Tahbeh-a kaseipeh nahiuve, Hicheng chu aboncha tulai mite chunga chu ding ahi.

³⁷Vo Jerusalem, Jerusalem, themgaoho that le ahenga kisol teho songa seplih, ahpin anoute alha noija a-opkhum banga keiman jong nachate ijatvei opkhum dinga kagot hitam! Ahin nangho nanompouve.

³⁸ Veuvin, na-in'u chu akamhel dinga nangho kidalhah peh nahitaove.

³⁹ Ijeh-inem itile kaseipeh nahiuve, Pakai mina hungpa chu anunnome, nati masangseuva, tukala keima neimu lou dingu ahi, ati.