Read Thado Chin Mathew 24 Bible Online

Mathew 24 - Thado Chin bible

Mathew 24

¹Chuin Jesu houin'a kona apotdoh-a achele; houin kisahdan ho chu vetsah dingin aseijuite ahenga ahungun ahi.

²Ahin Jesu'n adonbutnin, ajah uva, Nanghon hicheng hi namu lou uham? Keiman tahbeh-a kaseipeh nahiuve, Hikoma hi song suhchim louva khat chunga khat kisethop himhim umlou helding ahi, ati.

³Chuin Olive mol chunga atou petnin aseijuite guhthimin ahenga ahungun, Hicheng chu itihle hi dingham? Chule nangma hung kit ding phatle vannoi leiset kichai ni ding melchihna ipi hi dingham? neisei peh-un, atiuvin ahi.

⁴Chuin Jesu'n adonbutnin, ajah uva hitin aseije, Koiman nangho nalheplhah louna dingun kichih theijun,

⁵Ijeh-inem itile mi tamtah keima minin hunguntin, Keima Christa kahi tiuvintin, mi tamtah alheplhah dingu ahi.

⁶Chule nanghon gal kisatle kidou thuthang najah dingu ahi; chingtheijun, lungdong hih-un; ijeh-inem itile hicheng chu hungsoh tei ding ahi; ahivangin achaina hiloulai ding ahi.

⁷Ijeh-inem itile vai khatle vai khat, gam khat le gam khat hung kidouvintin, mun chom choma kel lhantin, nat set lengin tin, ling kihot ding ahi.

⁸Hitiho jouse chu naosonat kipan ahi.

⁹ Hiche phat teng chule genthei hesoh thoh dinga mihon nangho nahinpehdoh dingu ahi; chule keima min jala nangho namtin jouse hotna nahung umdingu ahi.

¹⁰Hiteng chule mi tamtah lunglha ding ahi, chule khatle khat kipedoh tontin, chule khat le khat kihoto ding ahi.

¹¹Chule themgao lhem tamtah sohdoh-a, mi tamtah alheplhah dingu ahi.

¹²Chule chonset puncheh cheh jeh-a, mi tamtah ngailutna-a lhadai dingu ahi.

¹³ Ahinla akhon ni geija thoh lhumkeija pangdetpa bou chu huhhing-a umding ahi.

¹⁴Chule namtin jouse hetsahna dinga hiche gamsung thupha hi vannoi leiset pumpi-a kihil lhang ding ahi; chutahle kichai dingbou ahi.

¹⁵ Chuti ahijeh chun mi sumang thet umtah thil thudol Daniel themgao sei chu mun thenga adin namu tengule, (asim siman hehen,)

¹⁶Chutengle Juda gama um chengse thinglhang lamah jamuhen;

¹⁷ In chunga uma jong a-in'a athilkeo kilah dingin kumdahen;

¹⁸Chule louva um jong apon kilah dingin kile kitdahen.

¹⁹Ahin ohe, hiche lai chule naovop hole nao noichepsah ho ada nadinguve!

²⁰Chule najamnao chu phalbilai ahiloule cholngah ni ahi louna dingin taovun.

²¹ Ijeh-inem itile hiche teng chule hesoh genthei khoh chungnung umding ahi; chutobang hesoh gentheina chu leiset umtilla pat tu geijin aumkha hihlaije, um jong umlou ding ahi.

²²Chule hiche nikho chu kisuchom lou hileh, mihem himhim ahinga sohcha umlou dinga ahi; ahinla lhenchomte jala anikho chu kisuchom ding ahi.

²³Chutengle, khat touvin najah uva, Ven, Christa hikoma aume, ahiloule, khukomah, tijongle tahsan hih-un.

²⁴Ijeh-inem itile Christa lhemho le themgao lhemho hung sohdoh untin, melchihna loupi tahtah le mu kidang ahinvetsah dingu ahi; ahitheile lhenchomte tah jeng jong ahinlheplhah dingu ahi.

²⁵Veuvin, Keiman kahil masah dem nahitaove.

²⁶ Hijeh chun mihon najah uva, Ven, gamthipmah aume atiuva ahile, chedoh hih-un, ahiloule, Ven, indan sungnunga aume, atiu jongle tahsan hih-un.

²⁷Ijeh-inem itile kolphe niso lama ahung phetdohle, nilhum lam geijin asalvah-in; Mihem Chapa hung kit jong chutobang ding ahi.

²⁸ Thilong um umna-a bou muthong kikhom ding ahi.

²⁹ Ahivangin chutenga hesoh genthei joutah chule nisa thimintin, lha jong vahta lou ding, vanlaijola ahsi ho pullhantin, chule van thahatna ho chengse kihot lingsoh ding ahi.

³⁰ Chutahle vanlaijola Mihem Chapa melchihna hung kilang ding; chuteng tahle vannoi leiset phungtin-in a-op achupchup dingu ahi, chule vanlaijola Mihem Chapa thuneitah le loupi chungnung tah-a meilom lah-a ahung amu dingu ahi.

³¹Chule aman avantilte sumkon gin nasatahtoh asoldoh ding; chule amahon van mong khatna patna van mong khat geija, kolkimvel li-a kona alhen chomte alon khom dingu ahi.

³²Theichang phung hin thulem kihilun. Abah adona ana ahungnou tengle, nipi anaitai ti nanghon naheuve.

³³Chutobang chun nangho jong hichengse chu aboncha namusoh tengule, anai tai, kotbul hungeija ahitai ti heuvin.

³⁴Keiman nangho tahbeh-a kaseipeh nahiuve, Hichengse chu aboncha aguilhun masangse-a, hiche khangguija mite hi mang lou ding ahi.

³⁵Vanle lei mang ding ahin; keima thu vang mang lou ding ahi.

³⁶Ahivangin ka Pa changseh tilou van'a vantilte jong, koimachan anikho le anidan tah chu ahepoi.

³⁷ Ahinla Noah nikho tobang chu Mihem Chapa hungkit nijong hiding ahi.

³⁸Ijeh-inem itile twisanglet masangin, Noah kong'a alut ni geijin, mihon aneuvin adonun, akichengun, akichensah-un,

³⁹ Chule twisang ahung letna abonchauva alhohmang gam kahse chun ima hepha louvin aumun ahi; Mihem Chapa hung ni jongle chutobang ding ahi.

⁴⁰Chutengle mi ni louva um, khat kila-a khat kidalha ding ahi.

⁴¹Numei ni sumheija chang goikhoma, khat kila-a khat kidalha ding ahi.

⁴²Hijeh chun kiging jingin umum; ijeh-inem itile na-Pakaiyu ipi nikho le nidana ahung ding nanghon nahepouve.

⁴³ Itih phatna gucha ahung ding inneipun ahet hile, kiging jingintin, a-in aphetvangsah lou ding ahi; hichu nanghon heuvin

⁴⁴Hijeh chun nangho phasademin umun; ijeh-inem itile nagel lou pettah-ule Mihem Chapa chu hung ding ahi.

⁴⁵Ahile, a-pakaiyin aphat phatcha achan dingu an hoppeh ding a-in sunga jouse chunga apipua apansah, soh tahsan umtah chingtah koiham?

⁴⁶A-pakai ahung tenga chutia bol ahungto soh chu anunnom ahi.

⁴⁷Tahbeh-a kaseipeh nahiuve, aman ama chu anei jouse chunga apipua apansah ding ahi.

⁴⁸Amavang soh gilou chun alungthimin, Ka pakai ahung geije, tihen,

⁴⁹Asoh chanpiho dengpan tahen, chule ju khamho toh ne khom don khomtale,

⁵⁰Hiche sohpa chun aginchat lou nitahle ahetlou pettah-a a-pakaipa chu hunga;

⁵¹Ama chu tum ni asoa, achan miphalhem ho lah-a akoi ding ahi; hikoma chu kale hagel umding ahi.