Read Thado Chin Mathew 25 Bible Online

Mathew 25 - Thado Chin bible

Mathew 25

¹ Hiteng chule van lenggam chu thaomei kikenna mou in neipu lamto dinga potdoh nungah somtoh kitekah ding ahi.

²Alah uva nga chu lungthim bei ahiuvin, nga chu lungthim pha ahiuve.

³Ijeh-inem itile lungthim bei chengse chun, thaomei akikenu chun thaotwi akentha pouvin ahi.

⁴Ahin lungthim pha chengse vang chun, thaomei akenu chun atheija thaotwi akentha uvin ahi.

⁵Chuin mou inneipu chu ahung gei jeh-in abonchauvin alulhuvin, a-imulhu gam taovin ahi.

⁶Ahin jan khang kimim, Veuvin, mou inneipu ahunge! Alamto dingin potdoh-un, tin akisamtan ahi.

⁷Chutah-in hiche nungah ho chu athouvun, athaomei cheh-u akigot taovin ahi.

⁸Hichun lungthim beiho chun lungthim phaho jah-a chun, Nathao twi'u themkhat neipeuvin; ijeh-inem itile keiho thaomei mit ding kon ahitai, atiuvin ahi.

⁹Ahivangin lungthim phaho chun adonbutnun, Keihole nangho igomuva dingin lhingponte; chusangin ajohho henga cheovinlang nangho ding gakichoh taovin, atiuvin ahi.

¹⁰Ahinla acho dinga ache kah-un mou inneipu chu ahungtan; chule kigosa dema umho chu amatoh mou puina in'ah thakhatnin alut taovin; chule kot akikhah tan ahi.

¹¹ Chujouvin nungah dangho chu ahungun, Pakai, Pakai, kot neihonun, atiuvin ahi.

¹²Ahinla aman adonbutnin, Tahbeh-a kaseipeh nahiuve, Keiman nangho kahepouve, atitai.

¹³Hijeh chun kiging jingin umun, ijeh-inem itile Mihem Chapa hung nading anikhole anidan tah chu nanghon nahepouve.

¹⁴ Ijeh-inem itile van lenggam chu asohte kou khoma anei chengse amaho khutna pedoh-a, khol gama chemang mi khat tobang ahi.

¹⁵Aman khat chu talent nga apen, khat talent ni apen, khat talent khat apen, athan ajokhop cheh-in sum apen, akipat dohtai.

¹⁶Chuin talent nga sangpa chun chupettah chun achen hiche chun akiveijin, talent ngama aveikanben ahi.

¹⁷Chutobangma chun talent ni sangpa chun talent nima aveikanben ahi.

¹⁸Ahin talent khat sangpa vang chun achen, leiko alaijin, a-pakaipa sum chu agasel mangtan ahi.

¹⁹Chuin phatsot tah nungin hiche soh ho pakaipa chu ahungin, amaho chutoh sum asutoh taovin ahi.

²⁰Chuin talent nga sangpa chun talent nga ahinchoiben, Pakai, nangman talent nga neipeh ahin; ven keiman talent nga kaveikan ben ahi, ati.

²¹Chuin apakai pan ajah-a, Soh pha tahsan umtah, nabol aphatave; nangma themcha khat chunga tahsan umtah nahin, keiman nangma tamtah chunga kapansah ding nahi; nangma na pakai kipana-ah luttan, ati.

²²Chuin talent ni sangpa jong chu ahungin, Pakai, nangman keima talent ni neipeh ahin; ven keiman talent ni kaveikan ben ahi, ati.

²³Chuin a-pakaipan ajah-a, Soh pha tahsan umtah, nabol aphatave; nangma themcha khat chunga tahsan umtah nahin, keiman nangma tamtah chunga kapansah ding nahi; nangma napakai kipana-ah luttan, ati.

²⁴Chujouvin talent khat sangpa chu ahungin, Pakai, nangma hi mikhel nahin, natuna louvah na-atjin, nathejalna lou pouvah nahuikhomjin ahi; hichu kahen;

²⁵Nangma kakichan, kachen nasum talent chu leiah kaseltan ahi: ven, nangma-a ma chu nakimu ahi, ati.

²⁶Ahin a-pakaipan adonbutnin ajah-a, Soh giloule thase, katuna louva ka-atjia, kathe jalna louva kahui khomji nahet ahi.

²⁷Chuti an kasum chu sum veipung na-a anakoi tangem, chutile kei kahung phatna asumthoi puma keiman kasum muta dinga.

²⁸Hijeh chun hiche talent chu lahpeh-un lang, talent som neipa chu petaovin,

²⁹ Ijeh-inem itile anei chana chu kipehbe-a, aneiletset ding ahi; anei lou vang chu aneichasun chu ama-a kona kilah mangpeh ding ahi.

³⁰ Hiche soh pannabei hi polam muthim-ah gapaimang-un; hikoma chu kale hagel umding ahi, ati.

³¹ Mihem Chapa vantil thengte jousetoh aloupina-a ahung tengtah le, Ama aloupina lal touna-a tou ding ahi;

³²Chule namtin vai jouse Ama anga chu kikhom ding; chule kelngoi chingpan keltah-a kona kelngoi achomkhen banga, aman khatna kona khat achomkhena,

³³Aman kelngoi chengse ajet lama akoija, keltah chengse vei lama akoi ding ahi.

³⁴Chutengle lengpa chun ajet lama umteho jah-a chu, Hungun, ka Pa phattheiboh changho, vannoi leiset kiphudoh tila patna nangho dinga gotsa kikoi lenggama hung lotaovin.

³⁵Ijeh-inem itile kagil akelin ahile, nanghon neh ding neinapeuvin; kadang achah-in, donding neinapeuvin; kamaljinin ahile neilhun sah-un;

³⁶Kasagoh keova kaumin, pon neinasilpeh-un; kadam mon ahile, eiven nahungun; chule kasoh changin ahile, hikoma jong chun kahenga nahungun ahi, ati ding ahi.

³⁷Chutengle michonpha te chun, keihon itih-a nagilkel kamuva, an nehding kapeh khah-um? Ahiloule itih-a nadangchah kamuva, kadon sah-um?

³⁸Keihon itih-a namaljin kamuva, kalhunsah-um? Ahiloule nasagoh keova naum kamuva, pon kasil pehkhah-um?

³⁹Chule keihon itih-a nadamo kamuva kahung vetnuva; nasohchan kamuva nahenga kahung uvem? ati dingu ahi.

⁴⁰Chule lengpan amaho jah-a, Tahbeh-a kaseipeh nahiuve, Hiche kasopite ho lah-a aneopen khat nabolna chanseu chu, keima neibolnao ahi, tia adonbut ding ahi.

⁴¹Chutengle aman avei lama umho jah-a chu, Vo gaosap changho, kakoma konin chemangun, diabol le avantilte dinga kikoi meilhum sunga lut taovin;

⁴²Ijeh-inem itile kagil kelin, nanghon neh ding neipe pouvin; kadang chah-in, don ding neipepouvin;

⁴³Kamaljinin, neilhunsah pouvin; sagoh keovin kaumin, pon neinasilpeh pouvin; kadammole kasoh chanin, neihungve pouvin ahi, ati ding ahi.

⁴⁴Chutengle amahon jong, Pakai, keihon nangma itih-a nagilkel, nadangchah, namaljin, sagoh keova naum, nadammo le nasohchan kamu uva kajenle daovem? tia ama adonbut dingu ahi.

⁴⁵Chutengle Aman amaho jah-a, Tahbeh-a kaseipeh nahiuve, Nanghon hiche aneochaho lah-a khat nabol louvu chu, keima neibol louvu ahi, tia adonbut ding ahi.

⁴⁶ Chule amaho chu tonsot kemlou talent man dinga cheova, michonpha ho chu kemlou tonsot hinna-a che ding ahiuve.