Read Thado Chin Mathew 26 Bible Online

Mathew 26 - Thado Chin bible

Mathew 26

¹Chutichun Jesu'n hichengse chu asei jouvin, aseijuite jah-a,

² Nini joule kalchuhkut hi ding ahi; chule Mihem Chapa hi thingpel'a khetbeh dinga melmate khutna kipedoh ding ahi, ti chu nanghon naheuve, ati.

³Chutah chun thempu pipuiho le danthusunho, upaho chu thempu chungnung Caiaphas atiu inpia chun akikhomun,

⁴Jesu chu doha bola matna, thana dingin akihou khomtaovin ahi;

⁵Amavang, Kut sung chun hidahen, ajole mipi lah-a thunoh umgetninte, atiuvin ahi.

⁶Chujouvin Jesu Bethany kho-a Simon miphahpa in'a aumpetnin,

⁷ Numei khatnin songval bomin thao namtui manlutah ahinchoijin, ahenga ahungin, a-ankong um pettah-in alu chunga asunglhan anun ahi.

⁸Ahin aseijuiten hichu amuvin, alungnom mo uvin, Ibola hitia amoh suhmang jeng hitam?

⁹Ijeh-inem itile hiche thao hi aman tamtah-a joh-a, mivaicha gentheiho peh thei ahi, atiuvin ahi.

¹⁰Ahin Jesu'n hichu ahetdoh phatnin, Ibola numeinu hi nasuh lunggimu ham? Kachunga hi thil phatah abol ahi.

¹¹ Ijeh-inem itile mivaicha gentheite chu nakom uva aum jingnauve, keimavang nangho koma um jinga kahipoi.

¹²Hiche thao namtui eisunkhum hi, eikivui nikho-a dinga chu eigot ahi.

¹³Keiman nangho tahbeh-a kaseipeh nahiuve, Vannoi leiset gam pumpi-a hiche Kipana Thupha kihil lhang nachana, hiche numeinu thilbol jong hi, amanu het jingna-a kiseipeh ding ahi, ati.

¹⁴Chuphatnin somleni lah-a khat, Juda Iscariot atiu chu, thempu pipuiho koma achen,

¹⁵ Ajah uva, Ama khu matsah leuveng ipi neipeh diuham? ati. Chuin amahon ama chu dangka somthum ateppeh taovin ahi.

¹⁶Chupet tah-a pat chun aman ama chu pedoh-a matsahna thei dingje agomkom aholtan ahi.

¹⁷Chuin cholsolou changlhah kut ni masa nin aseijuite Jesu hengah ahungun, Kalchuhkut nanehna ding hoikoma goleuveng nalungham, atiuvin ahi.

¹⁸Chuin Aman ajah uva, Khopi sunga cheovinlang mi khat jah-a, Houhilin, Kaphat anaitai; kaseijuite toh nangma in'a kalchuhkut an kanehkhom dingu ahi, ati, tin gaseijun, ati.

¹⁹Chuin Jesu'n ahil bangbangu chun abolun, aseijuiten kalchuhkut chu agago taovin ahi.

²⁰Chuin nilhah ahi phatnin, aseijuite somleni chutoh atou taovin;

²¹Chuin a-anneh laitah-un aman ajah uva, Tahbeh-a kasei ahi, nalah uva khatnin eipehdoh-a eimatsah ding ahi, ati.

²²Chuin alungdong lheh jengtaovin, ajah-a, Pakai, kei kahim? aticheh taovin ahi.

²³ Aman adonbutnin, Lhenga kaso khompipa tah chu eimatsah dinga ahi.

²⁴Mihem Chapa achonchan ding thu kisun bangtah-a chu cheding mong ahi, ahivangin Mihem Chapa pedoh-a matsah dingpa chu ohe adana-e! Ama chu apena peng lou hile ama dinga phajota ding ahi, ati.

²⁵Hichun apedoh-a pang ding Juda Iscariot chun adonbutnin, Pakai, kei kahim? ati. Chuin aman, Nakisei khai, ati.

²⁶Chuin an aneh laitah-un, Jesu'n changlhah alan, phatthei aboh jouvin ahehbal balin, aseijuite apen, Kilah-un, neuvin; hiche hi katahsa ahi, ati.

²⁷Chuin khon alan, athangvah jouvin amaho chu apen, ajah uva, Nabonchaovin don sohkeijun;

²⁸ Ijeh-inem itile hiche hi chonset suhbeina dinga mi tamtah dinga kisodoh kitepna thah kathisan ahi.

²⁹Chule keiman nangho jah-a kasei ahi, Ka Pa lenggam sunga nang hotoh athah-a kadonkhom ni ahunglhun kahse-a, tu kala hiche lengpiga twi hi kadon kit lou ding ahitai, ati.

³⁰Chuin amahon la asah jouvun apotdoh-un, Olive molsang lama achetauvin ahi.

³¹ Chutah chun Jesu'n ajah uva, Tujana hi nangho nabon chaova kachunga lungthoi sohkei ding nahiuve; ijeh-inem itile, Keiman kelngoi chingpa kavoh lhuh ding, chutengle kelngoihon chu chehgam ding ahi, tin akisune.

³²Ahin kathodoh nungle, Galilee gam lam namasang sang uva kache ding ahi, ati.

³³Ahin Peter'in adonbutnin, ajah-a, Abonchauvin nachungah lungthoi jongleu, keima vang itihchan hijongle lungthoi ponge, ati.

³⁴Jesu'n ajah-a, tahbeh-a kaseipeh nahi, tujan ah khon masanga thumvei neiseilep ding ahi, ati.

³⁵Pater'in ajah-a, Nangma toh thitha ding mong hijongleng, keiman nangma seilep hihhel ing kate, ati. Aseijuite jousen jong chuti chun asei sohkeijun ahi.

³⁶Hichun Jesu amaho chutoh Gethsemane atiu mun khat alhunun, aman aseijuite jah-a, Keima khukoma khu kache-a kagatao sungsen, nangho hikoma hin anatou jingun, ati.

³⁷Chuin Peter le Zebedai chapate ni chu akipuijin; chule alunghem lheh jengin alungkham pantan ahi.

³⁸Chutah chun aman amaho jah-a, Thina khophelin kalung hesoh behseh jengtai; hikoma umunlang neikigin piuvin, ati.

³⁹Chuin amasang lama phabep khat ache chonin, akhupbon alhun tolah amai asulutnin, ataovin, Ka Pa, ahi theile, hiche khon hi keija konin kitolmang jenghen; ahivangin keima lunggot bang hilouvin, nangma lunggot bang hijohen, ati.

⁴⁰Chuin aseijuite henga ahungin ahile, amaho chu ana-imut lhuh gamu ahungtoh-in, Peter jah-a, Nanghon nidan khat jengjong nei kiginpi jou lou uham?

⁴¹Lhepna-a nalhah louna dingun kigingun, taovun; lhagao vangin agonan tahsan ajoupoi, ati.

⁴²Chuin aniveina-in ache kitnin, ataovin, Ka Pa, hiche khona kadon louva kitolmang thei lou ahile, nangma thuthu hihen, ati.

⁴³Chuin ahung kitnin ahile, amaho chu a-imut lhuh-u ahungtoh-in ahi; ijeh-inem itile amaho chu a-imutsoh lheh jengun ahi.

⁴⁴Chutichun amaho chu adalhan, athumvei na-in ache kitnin, ataovin, aseingai bangma chu asei kitnin ahi.

⁴⁵Chutah-in aseijuite hengah ahungin, ajah uva, Ahile, tun imuvinlang kitha ol taovin; veuvin, phat alhingtai, chule Mihem Chapa hi michonse te khutna kipedoh-a ahitai.

⁴⁶Kipat un, chetao hite; veuvin, eipedohpa ahungnai tai, ati.

⁴⁷Chuin hichu asei nalajin, veuvin, somleni lah-a Juda Iscariot chu thempu pipuiho le upaho koma kona chemjam le moltum hintho-a hungkon mipi nasatah chutoh ahung kilhonin ahungtan ahi.

⁴⁸Ama pedoh-a pangpa chun amaho chu melchihna ahil masan, Keiman kachop penpen chu ama ahi, ama chu man-un, ati ahi.

⁴⁹Chuin aman Jesu heng ajon paijin, Rabbi, chibai, atin achoptan ahi.

⁵⁰Chuin Jesu'n ajah-a, Kajol, Ibola hunga nahim? ati. Chutah-in amaho chun akom ahin naijun, Jesu chungah akhut alhaovin, amantaovin ahi.

⁵¹Chuin, veuvin, Jesu loiho khatnin akhut alamin, achemjam asatdoh-in, thempu chungnung sohpa asatle abilkol lang khat asatlhan ahi.

⁵²Chuphatnin Jesu'n ajah-a, Nachemjam chu akoina-a koi kitnin; ijeh-inem itile chemjam panteho chu chemjam'a lou ding ahi.

⁵³Ole tutah jenga jong hi ka Pan avantil janel somleni sanga tamjo eihin solpehna dinga kathum thei louva nangaito ham?

⁵⁴Ahinla chutin kibole hitia hi thu soh tei ding ahi, tia Pathen lekhabua kisun chu iti guilhun thei dingham? ati.

⁵⁵ Hichepet chun Jesu'n mipi chengse jah-a chun, Gucha michom man dinga kon banga chemjamle moltum nahinthova, keima man dinga nahung kon uham? Keima houin'ah niseh-in katouvin thu kahil jingin, chulaijinla neiman pouvin ahi.

⁵⁶Amavang themgaoho lekha sut thu guilhuna dinga, hichengse hi aboncha soh-a ahitai, ati. Chutah chun aseijuite jousen ama adalhauvin, ajamgam taovin ahi.

⁵⁷Chuin Jesu manho chun danthu sunho le upaho kikhopna, Caiaphas atiu thempu chungnung henga chun akaijun ahi.

⁵⁸Peter vang chun galkanga ajuipeh-in, thempu chungnung inpi leitol geijin ajuijin, hikoma chun alutnin, Achaina munge, tin sottolho lah-a chun atouvin ahi.

⁵⁹Hichun thempu pipuiho le houvaipoloi chengsen Jesu thana dingin achungah hettohsah jouthu aholun;

⁶⁰Jouthu hettohsah tamtah ahung vangun, amupouvin ahi. Akhonnan mi ni ahungin,

⁶¹ Hichepa hin, Keima Pathen houin suse-a ni thum sunga sadoh kit thei kahi ati, ahung ti lhonin ahi.

⁶²Chuin thempu chungnung chu adingdoh-in, ajah-a, Nadonbut lou dingham? Hitehon nahehsetna-a thu aseiju hi ipiham? ati.

⁶³Ahivangin Jesu thipbeh-in aumin ahi. Chuin thempu chungnung chun ajah-a, Keiman nangma Pathen hing mina kahahsela kasol nahi, nangma Pathen Chapa Christa chu nahim? Neisei peh-un, ati.

⁶⁴ Hichun Jesu'n ajah-a, Naseikhai, chukalvala kaseipeh nahiuve, Tunung kalle nanghon Mihem Chapa thahatna jet lama atoule, meilom chunga ahung namu dingu ahi, ati.

⁶⁵ Chutah-in thempu chungnung chun apon abotkeh-in, Hiche hi Pathen ataitom ahi; eihon thu hettohsah dang iding iti tah dinguham? Veuvin, nanghon tun Pathen ataitomna najataovin ahi.

⁶⁶Nanghon iti nagel uvem? ati. Amahon, Thi dinga lom ahi, tin adonbutnun ahi.

⁶⁷ Chutah-in amahon amaijah chil asetnun, akhut tumun akhenun; chule kimkhatnin abengun,

⁶⁸Vo Khrista, gaovinlang seijin, koiham nabenga chu, atiuvin ahi.

⁶⁹Hichepet chun Peter polamah leitolah atouvin ahi; hichun sohnu khat ahenga ahungin ajah-a, Nangma jong Galilee mi Jesu toh kiloi chu nahi, ati.

⁷⁰Ahivangin aman japi angsungah aseilepmin, Nathusei chu kahepoi, atitan ahi.

⁷¹Chuin kelkot phung lamah apotnin ahile, sohnu achom khatnin ama chu amun, chukoma umho jah-a chun, Hichepa jong hi Nazareth Jesu koma uma chu ahi, ati.

⁷²Chuin aman aseilep kitnin, Hiche mipa chu kahepoi, tin akihahseltan ahi.

⁷³Chujou phabepmin chukoma um miho chu ahenga ahungun, Peter jah-a, Tahbeh-in nangma jong amaho lah-a khat mongmong nahi; ijeh-inem itile napao chun nangma naphong doh-e, atiuvin ahi.

⁷⁴Hiphat chun aman, Hiche mihempa chu kahe hih hele tin kigaosaple kihahsel athopantan ahi. Chupettah chun ahchal akhongtan ahi.

⁷⁵Hichun, Ahchal khon masanga thumvei neiseilep ding ahi, tia Jesu thusei chu Peter'in ageldoh-in; chuin polamah apotdoh-in, lhasetah-in hakan akaptan ahi.