Read Thado Chin Mathew 27 Bible Online

Mathew 27 - Thado Chin bible

Mathew 27

¹Chuin jingkah ahi phatnin, thempu pipuiho chengsele upaho jouse Jesu thana dingin akihoutoh taovin ahi;

²Chuin Ama chu akanun, akaijun, gamvaipo Pontius Pilate khutnah apedoh taovin ahi.

³ Chutah-in apedoh-a panga Juda Iscariot chun athi dinga themmo achansah-u chu amun ahile akisih-in, dangka somthum chu thempu pipuiho le upaho alepeh kitnin,

⁴Themona neilou thisan kapehdoh chu kachon kheltai, ati. Ahinla amahon, Hichu keiho ka ithu-u umam? Nangman nalo nomnom lotan, ati taovin ahi.

⁵Hichun aman dangka chu houin sunga asep lhan, chukoma kon chun achemangin, ama akikhai lihtan ahi.

⁶Chuin thempu pipuihon hiche dangka chu alauvin, Hiche hi thisan man ahi jeh-in, housum kholna-a koi angai ahipoi, atiuvin ahi.

⁷Hichun amaho akihoutoh-un, gamdang miho vuina dingin, hichun beldengpa leiset achou vin ahi.

⁸Hiche jeh chun tugeijin hiche leiset chu thisan leiset akitin ahi.

⁹ Hichu themgao Jeremiah thusei, Israel chate lah-a kona aman asahsao, aman kisahpa man chu dangka somthum alauvin ahi;

¹⁰Chule, Pakaiyin eithupeh dungjuijin, beldengpa leiset manin apetaovin ahi, ati chu guilhunga ahitai.

¹¹Chujouvin Jesu chu gamvaipo angah adingtan ahi: chuin gamvaipo chun adongin, Nangma Juda te lengpa nahim? atin ahile, Jesu'n ajah-a, Naseikhai, ati.

¹²Ahin thempu pipuiho le upahon ahehsetna thu ijat asei vangun, aman imachan adonbutpon ahi.

¹³Chutah-in Pilate'in ajah-a, Hitehon nangma douna hettohsahna asei chengseu hi najah louham? ati.

¹⁴Ahin Aman cheng khatcha jong adonbut lou jeh chun, gamvaipo chun adatmo lheh jengin ahi.

¹⁵Hiche kut sunga chu sohchang koi hile mihon agotpen penu chu gamvaipo chun alhadohji angai ahi.

¹⁶Hichepet chun sohchang amin Barabbas atiu, sohchang minthang tah khat aumin ahi.

¹⁷Hijeh chun amaho akikhop phatnun, Pilate'in amaho chu adongin, Koijoh lhadoh pehleng nalungu ham? Barabbas ha, Christa kiti Jesu joh ham? ati.

¹⁸Ijeh-inem itile thangset suma apehdoh-u ahi chu aman ahen ahi.

¹⁹Chuin ama thutanna mun'a atoupetnin, a-inneipin thu ahin thotnin, Hiche michonpha pa chu limsah hih-in; ijeh-inem itile Ama jeh chun tunin kamangin kathohgim lheh jengin ahi, ati.

²⁰Ahinla thempu pipuiho le upahon Barabbas chu angeh uva, chule Jesu chu asuhmangsah dingin mipi chu atilse taovin ahi.

²¹Chuin gamvaipo chun adonbutnin, Hichete ni hi koijoh lhadoh pehleng nalungu ham? atin ahile; amahon, Barabbas, atiuvin ahi.

²²Chuin Pilate'in ajah uva, Achutile Christa kiti Jesu hi i-kalo dingba hitam? ati. Chuin amahon, Thingpel'a kikhenbeh hen, atiuvin ahi.

²³Chuin aman, Ibolinem, ipi suhset aneiham? ati. Ahivangin amahon hasaptah-in asamun, Thingpelah kikhenbeh hen, atiuvin ahi.

²⁴ Chuin Pilate'in ananlela abol ima phatsahna ahilou, thunoh baotam asojoh chu amu phatnin, twi alan, mipi angsungah akhut asillhan, Hiche michonpha pa thisan kisona-a themona nei lou kahi; nanghon nalolo lotaovin, ati.

²⁵Chuin mihon abonchauvin adonbutnun, Ama thisan phu chu keiho le kachateu chungah chuhen, atiuvin ahi.

²⁶Chutah-in aman amaho chu Barabbas alhadohpeh-un; Jesu vang chu ajepmin, thingpel'a khetbeh dingin apedohtan ahi.

²⁷Chutah-in gamvaipo sepai ho chun Jesu chu Pretorium sungah apui lutnun, akomah sepaiho jouse akikhom sohkeijun;

²⁸Chule aponsil chu ahoh lha uvin, ponsandup asilpeh taovin ahi.

²⁹Chule ling lukhuh aphanun, alu-a akhuhpeh-un, chule akhut jet lamah pengtenggol khat achoisah-un, a-angah adilsuvin, Vo Juda te Lengpa, Chibai, atiuvin, totnopnan ael-elin abolun ahi.

³⁰Chuin chil asetkhumun, apumpeng choi chu alauvin, alu avoh naovin ahi.

³¹Chutia chu totnopna-a a-el ela abol jouvun, pon san chu ahoh lha uvin, ama pon asilpeh-un thingpel'a khetbeh dingin apuitaovin ahi.

³²Chujouvin apotdoh uva acheule, amin Simon atiu, Cyrene gam mi khat amuvin, ama athingpel puding chun acham louvin amanun ahi.

³³Chuin Golgotha (Hichu lugumun tina ahi) atiu mun chu alhunun,

³⁴ Amahon Jesu chu gilkhatoh kihal lengpitwi thuh adonsah-un ahile, aman atepmin adon nomtapon ahi.

³⁵ Chujouvin amachu thingpel'a akhenbeh-un; themgao thusei, kapon akihom taovin, chule kasangkhol chol vang vetnan amang taove, atichu guilhun nan, apon chu akihomun, chule vang avetaove.

³⁶Chule hikoma chun atouvun, ama chu angah taovin ahi.

³⁷Chule HICHEPA HI JESU JUDA TE LENGPA AHI, tin ahehnau hetsahna asunun, alu chungah atah-un ahi.

³⁸Hiche pet chun amatoh thakhatnin gucha michom ni, khat ajet lamah khat avei lamah thingpelah akhen beh-un ahi.

³⁹ Chuin achele avahle jousen akhasuh khumun, a-el elin ahouvun,

⁴⁰ Nang houin suse-a ni thuma sadoh kit, nangma kihuh hing tangem! nangma Pathen Chapa nahile, thingpel'a konin hung kumlhan, atiuvin ahi.

⁴¹Thempu pipuihon jong, danthu sunho le upaho toh chutima chun totnopnan abolun,

⁴²Aman midang ahuhhingjin; ama akihuhhing theipoi. Ama Israelte Lengpa ahileh, tun thingpel'a konin hung kumlha temhen, achutile tahsanunge.

⁴³ Aman Pathen asongin; Pathen'in adei ahile tun huhhing hen; ijeh-inem itile aman, Pathen Chapa kahi ati, atiuvin ahi.

⁴⁴Chule amatoh thingpel'a kikhetbeh tha gucha michomte ni jong chun, chutobangma chun ahouse lhonin ahi.

⁴⁵Chuin nidan gupma pat Nidan ko geijin, gam jouse chungah mu athim tan ahi.

⁴⁶ Chuin nidan ko donin Jesu'n, Eli, Eli, lama sabachthani, tin hapenin apengin ahi. Hichu, Ka Pathen, ka Pathen, ibola neidalhah ham, tina ahi.

⁴⁷Chukoma dingho lah-a abang bangin chutia ati chu ajauvin, Hichepan Elijah akouve, atiuvin ahi.

⁴⁸ Chupettah chun alah uva khat alhaijelin, twichop phon khat alan, lengpitwi thuh adelhopmin, pengtenggol leh-a atah-in, agahdonsah-in ahi.

⁴⁹Ahin adangho chun, Limsah hih-in; Elijah ahuhhinga hunga hung hih-am, veohite, atiuvin ahi.

⁵⁰Chuin Jesu hapenin apengin, alhagao alhadohtan ahi.

⁵¹ Chuin, veuvin, houin'a pondal len chu achunga pat anoi geijin a-ehlha paijin keh ni akison; chule ling akihotnin, songpiho akeh-in ahi.

⁵²Chule lhankhuh ho akihongin, a-imu mithengho long tamtah kaithouvin aumin ahi;

⁵³Chule ama thokit nung chun amaho chu lhankhuh-a konin apotdoh-un, khopi thenga ache lutnun, mi tamtah akimusah uvin ahi.

⁵⁴Chuin sepai jalamkai le aumpi Jesu ngah-a pangho chun ling kihot le thilsoh umchanje chu amuvin, akicha lheh jengun, Hichepa hi Pathen Chapa tahbeh mong ahi, ati taovin ahi.

⁵⁵ Chule Galilee gama kona Jesu nung hinjuija ajenlea pang numei tamtah aumun, amaho chun galkanga pangin ave jingun ahi.

⁵⁶Alah uva chun Magdalene Mariam, Jacob le Joses nu Mariam, chule Zebedee chapate ni nu aumun ahi.

⁵⁷Chuin nilhah ahi phatnin, Jesu seijuija pang Arimathea kho-a amin Joseph atiu mihaotah khat Pilate henga ahungin, Jesu long chu athumin ahi.

⁵⁸Hichun Pilate chun apeh dingin thu apetan ahi.

⁵⁹Chuin Joseph chun along chu alan, tupat ponnem ngimseh chan atomin, song alaihom ama lhan thah sunga chun alupsah-in,

⁶⁰Lhan kotna chun song lentah khat atanglutnin, achemang tan ahi.

⁶¹Chule Magdalene Mariam le Mariam chom nu chu hikoma chun aumun, lhan maija chun atou jingun ahi.

⁶²Ajingin, hichu kigot ni ahin, thempu pipuiho le Pharisai ho Pilate hengah akikhomun,

⁶³ Ajah-a, Kapu, hiche milhemlhapa chun ahinlaijin, Ni thum joule thoukit ding kahi, ati chu tun kalunguva alange.

⁶⁴Hijeh chun ni thum geija alhan ngah ding thu pen; ajole jannin aseijuite hunguntin, gumang untin, miho jah-a, Athi lah-a konin athoukit tai tiget nunte; chutile suhkhel masah sanga suhkhel nunung chu setchehna hi ding ahi, atiuvin ahi.

⁶⁵Pilate'in ajah uva, Nanghon santri hon khat naneiju chu; cheovinlang nanga thei theijun ganga phatsah taovin, ati.

⁶⁶Chuin amaho angah ding santri hon chutoh alhonun, song chunga chun mohor anamun, lhan chu phatah-in angasah taovin ahi.