Read Thado Chin Mathew 28 Bible Online

Mathew 28 - Thado Chin bible

Mathew 28

¹Chuin cholngah ni kichaija Hapta kipat ni masa ni khovah thenthenin, Magdalene Mariam le Mariam chom nu chu lhan ve ding chun ahung lhonin ahi.

²Chule, veuvin, ling hahon akihot tan ahi; ijeh-inem itile Pakai vantil van'a konin ahung kumlhan, song chu akotna konin atangdoh-in, achungah atouvin ahi.

³Avouso chu kolphetoh abangin, aponsil chu buhbang bangin abangin;

⁴Chule ama akichat jeh-un angah ho akihot akihotnun, athi-a toh abang jengun ahi.

⁵Ahin hiche vantil chun numei ho chu ahin houvin, ajah uva, Nangho kicha hih-un, ijeh-inem itile thingpel'a kithat Jesu chu naholu ahi kahenai.

⁶Ama hikoma aumtapoi; ijeh-inem itile aman asei bang chun athoudohtai. Hungun lang Pakai lupna hung vetaovin.

⁷Chule nangho cheloijun lang aseijuiteho jah-a hiche hi gaseijun, Ama athi lah-a konin athoudohtai; chule, veuvin, Galilee gam lamah namasanguvah achei; chukoma chu nanghon ama namu dingu ahi, gatiuvin; veuvin, najah uva kaseitai, ati.

⁸Chuin amaho kichat toh gomin hapan akipah-un, lhan phunga kon chun achedoh loijun, aseijuite henga thulhut ding chun alhaijel taovin ahi.

⁹Chuin amaho aseijuite seipeh dinga acheule, veuvin, Jesu'n amaho chu akimupin, ajah uva, Damselun, ati. Hichun amahon aheng ajonun, akeng atuh-un chibai abohtauvin ahi.

¹⁰Hichun Jesu'n ajah uva, Kicha hih-un, cheovin, kasopite jah-a gaseijun, amaho Galilee gam lama cheohen, chukoma chu amahon eimu dingu ahi, ati.

¹¹Chujouvin amaho acheu chun, santri'a dingho phabep khopi sunga ahungun, thusoh umchan jouse ahung lhutnun ahi.

¹²Chuin amaho upaho toh akikhomun, akihoutoh jouvun, sepaiho chu sum tamtah apeuvin, ajah uva,

¹³Ka-imut kah-un aseijuite ahungun, agumang taove, tiuvin.

¹⁴Hiche thuhi gamvaipon ajah-a ahile, keihon ama hou lungdam ungting, nangho lung olmosah pouvinge, atiuvin ahi.

¹⁵Hichun amahon sum chu akilah-un, ahil bangu chun aboltauvin ahi; chule hiche thu chu Juda miho lah-a akiseison sonin tugeijin aumin ahi.

¹⁶ Chujouvin seijui somlekhat chu Galilee gama Jesu'n atepnao mola chun achetauvun ahi.

¹⁷Chuin Ama amu phatnun, chibai aboh-un; ahivangin abang bangin agingcha pouvin ahi.

¹⁸Chuin Jesu ahenguva ahungin amaho chu ahoupin, ajah uva, Van'a le leija thuneina jouse keima eikipea ahitai.

¹⁹ Hiche jeh chun nangho cheovin, namtina mi jouse seijuijin gasemun, a-Pa, a-Cha chule Lhagao Theng minin amaho chu baptize gabolun;

²⁰Chule keiman nangho kapeh thu jouse hi aboncha anit dinguvin gahilun; chule, veuvin vannoi leiset kichaini geijin keiman nangho kaumpi jing naove, ati. Amen.