Read Thado Chin Mathew 3 Bible Online

Mathew 3 - Thado Chin bible

Mathew 3

¹Chulai chun John Baptist chu ahungin,

² Nalung heijun; van lenggam anaitai, tin Judah gam gamthipmah thu alhang samlen ahi.

³ Isaiah themgaovin, Gamthipma khosam aw khatnin, Pakai lamlen semtohsan koijun, Alampi semjangun, tin aseije, tia asei chu ama hi ahi.

⁴ John chu apon-ah sangongsang mul ahin, akongah savun konggah akigah-in, chule a-anneh chu khaokho le gam khoiju ahi.

⁵Chuphatnin Jerusalem le Judah gam jouse-a mi, chule Jordan vel gamkol sung jouse-a mi ahenga ache acheuvin,

⁶Achonsetnao cheh aphongun, Jordan luidunga chun ama khutna baptize achang taovin ahi.

⁷ Ahin Pharisaiho le Saddukai ho mi tamtah ama khutna baptize chang dinga ahungu amun phatnin, ajah uva, Vo gulse sonho, Khonunga lunghanna hung lhung dinga kona jamna ding lungthim koiham napeuva?

⁸Hijeh chun lunghei toh kilomin gadoh-un;

⁹ Chule nalah uva, Abraham kapului'u aumnai, tin ngaito hih-un; ijeh-inem itile tahbeh-a kaseipeh nahiuve, hiche songho-a kona hi Pathen'in Abraham chate asodohsah thei ahi.

¹⁰ Chule tu jenga jong thing bultina heicha kikoija ahitai. Chutiachu thingphung aga phalou chengse chu kiphuh lhu-a, meija kisep lutji ahi.

¹¹Lungheina dinga keiman twija baptize kachansah bou ahi; amavang kanunga hungpa keima sanga chungnungjo ahi; keima akengchot choi dinga jong kilom kahipoi. Amatah chun nangho Lhagao Theng le meija baptize nachansah dingu ahi.

¹²Aman akhutna godal achoije; aman aphol jap ngimsel intin, achang apang sunga akhum ding; asi vang chu mit theilou meija agovam ding ahi, ati.

¹³Hiche pet chun Jesu John khutna baptize chang dingin, Galilee'a konin John hengah Jordan lamah ahungin ahi.

¹⁴Ahivangin John anathuphan, Nangma khutna kachan ding johsih-a, nangma kahenga hung nahim? ati.

¹⁵Chuin Jesu'n adonbutnin, Tun hisah poupoutan; ijeh-inem itile chonphatna jouse abancha hitia hi ibulhit dingdol ahi, ati.

¹⁶Chuin Jesu baptize achan jouvin, twilah-a konin apotdoh paitan ahi; chuin, veuvin, ama dingin van kot akihongin, chule Pathen Lhagao vakhu banga ahung lenlhah-a achunga ahungchuh amun;

¹⁷ chuin, Ama hi ka-Chapa deitah ahi, achunga kalung alhai tangeije, tin van'a konin aw ahung gingin ahi.