Read Thado Chin Mathew 5 Bible Online

Mathew 5 - Thado Chin bible

Mathew 5

¹Aman mipi chengse chu amun, molvum chungah akaltouvin; chuin ama atouvin ahile aseijuite chu ahengah ahungun;

²Chuin ama apaodoh-in, amaho chu hiche thuhi ahil pantan ahi.

³Lhagaova vaichaho anunnom ahiuve; ijeh inem itile van lenggam chu amaho-a ahi.

⁴ Alhaseteho anunnom ahiuve; ijeh inem itile lhep lungmonga umding ahiuve.

⁵ Mi lungnengteho anunnom ahiuve; ijeh inem itile amahon leiset chung alo dingu ahi.

⁶ Chonphatna lama gilkel le dangchah ho anunnom ahiuve; ijeh inem itile amaho chu vading ahiuve.

⁷Milungset teho anunnom ahiuve; ijeh inem itile amaho chu kilungset ding ahiuve.

⁸ Milungthengho anunnom ahiuve; ijeh inem itile amahon Pathen amu dingu ahi.

⁹Misucham ho anunnom ahiuve; ijeh inem itile amaho chu Pathen chate kiti ding ahiuve.

¹⁰ Chonphat jala bolsetna thohho anunnom ahiuve; ijeh inem itile van lenggam chu amaho-a ahi.

¹¹ Keima jala mihon nahouset uva, nabolset uva, chule nachung uva jouthu-a thugilou asei tengule anunnom nahiuve.

¹² Kipah-un, hapan kipah-un; ijeh inem itile van'a nasan dingu kipaman atame; ijeh inem itile nangho masanga anaum themgaoho jong chu mihon chutobangma chun abolseuvin ahi.

¹³Nangho leiset chi nahiuve: ahin chi khu tam tahenlang hile, ipi-a ki-al sah dingham? Chukalle apanna umtapontin, paidohle mihemte chotpha dingbou ahitai.

¹⁴ Nangho vannoi vah nahiuve. Lhang vuma khopi chu akisel theipoi.

¹⁵ Min meivah avah-in, lo akhukhum ngaipoi, atunna chunga akoijin; chuteng in sunga um chengse chu asalvah bouvin ahi.

¹⁶ Hiche bang chun navah-u chu miho angah kilanghen, chuteng amahon nachon phatnao chu mu theijuntin, chule van'a um na-Pau chu avahchoi dingu ahi.

¹⁷Keima danthu le themgaoho thu sumang dinga hungin neingaito hih-un; asumanga hung hilouvin, asubulhit dingjoh-a hung kahibouve.

¹⁸ Ijeh-inem itile tahbeh-a kaseipeh nahiuve, Vanle lei aman kahse-a, danthu chu jemsipah penle ajem halsicha jong aboncha abulhin masangse-a mang lou ding ahi.

¹⁹Hijeh chun koi hijongle hiche thupeh neopen lah-a khat suse-a, chule chutobanga bol ding hila chu, van lenggama aneopena kisei ding ahi; chule koi hijongle anitna, chule chutobanga hila vang chu, van lenggama alenpena kisei ding ahi.

²⁰Ijeh-inem itile kaseipeh nahiuve, Nangho danthu sunho le Pharisai ho sanga nachon phatnao achung nunjoh louva ahile, van gama nalut louhel dingu ahi.

²¹ Tolthat hih-un; koi hijongle tolthat chu thupi tanna-a dinga kicha jinga umding ahi, tia malai mite jah-a kisei thu chu najataove.

²²Ahivangin keiman nangho jah-a kasei ahi, Koi hijongle ajeh beija asopi lunghan khuma chu thupi tanna-a dinga kicha jinga umding ahi; chule, koi hijongle asopi, Raca, [1] tia chu houvaipoloi kikhopna-a dinga kicha jinga umding ahi. Chule koi hijongle asopi, Mingol, tia chu damun meidila dinga kicha jinga umding ahi.

²³Hiche jeh chun maicham mun'a thil to ding nachoija nahunga, nasopi nachunga alung himona nahetdoh-a ahile,

²⁴Nathil to ding chu maicham koma chun dalhanlang, chen, nasopi chutoh gakicham masan, chujoule hungin nathil to ding chu toh-in.

²⁵Nahehpa chu lampia naum petnin kichampin, achuti loule nahehpan thutan vaihom henga leh lutnin natin, thutan vaihom chun sottolle khutnah pedoh-in natin, chuteng aman songkul'a nakhum ding ahi.

²⁶Tahbeh-a kaseipeh nahi, Nangman achai nakei paisa keh khat geija nasahsoh masangse-a, iti jongle chua kona napotdoh louhel ding ahi.

²⁷ Jonthanhoi bol hih-in, tia malaija kisei chu nanghon najataove;

²⁸Ahivangin keiman nangho kaseipeh nahiuve, koi hijongle numei jonlunga vea chu amanu chutoh alunga jonga ahitai.

²⁹ Chule namit jetlamin nasuhmo le, kaldoh inlang paimangin; ijeh-inem itile natahsa pumpi damuna lelutna aum sangin, natibah khat aman ding nang dingin aphajoi.

³⁰ Chule nakhut jetlamin nasuhmo le, hi jong chu satlhan lang paimangin; natahsa pumpi-a damuna nachuh sangin, natibah khat aman dinga nang dinga phajo ahi.

³¹ Chule, Koi hijongle aji da-a chun, dana lekha pehen, kitisa ahi;

³² Ahivangin keiman najah uva kasei ahi, Ajon jeh tailouva thu dang jeh-a aji da-a chun, ajinu chu ajonsah ahi; chule koi hile akidasa numei chu akichenpia jong chu ajonga ahi.

³³ Chukitle, jouvin Kihahsel hih-un, naki hahselna chu Pakai henga molson, tia malai mite jah-a kiseisa chu najataove;

³⁴ Ahivangin keiman najah uva kasei ahi; Imachan kihahsel hih-un, van min panin kihah sel hih-un, Pathen touna ahi jeh-in;

³⁵ Chule lei min panin kihahsel hih-un, ijeh-inem itile hichu akengto ngapna ahi. Jerusalem min panin kihahsel hih-un; ijeh-inem itile hichu Leng chungnung khopi ahi.

³⁶Naluchang panin kihahsel hih-un; ijeh-inem itile nangman nasam jang khat jengcha jong nakansah navomsah theipon ahi.

³⁷Ahin nasei chu ahile ahi, ahiloule ahilou hijenghen; hicheng kalval chu agilouva kona bou ahitai.

³⁸ Mit khela mit, ha khela ha, tia kisei chu najataove;

³⁹Ahivangin keiman nangho jah-a kasei ahi, Migilou thuh hih-un; amavang koi hile nangeiphe jetlam benga chu, lang khat jong dopeh-in.

⁴⁰Koi hile heh dinga nago-a nasangkhol sungnung lah dinga go-a chu, naponlen jong chu pe jengin.

⁴¹Koi hile apoh po dinga nacham louva bola mile khat napuija chu, mile ni chepin.

⁴²Nahenga thuma chu pen, nahenga thilpa thuma chu kihei mangsan hih-in.

⁴³ Naheng nakom ngailunlang, chule namelma teu hotbolun, tia kisei chu najataove;

⁴⁴Ahivangin, keiman nangho jah-a kasei ahi, namelma teu ngailuvin, nagaosap teo chu phatthei boh-un, nahoteu chu phatbolun, chule nadangdat teole nabolseteu dingin taopeh-un;

⁴⁵Chutilebou van'a na-Pau chate nahithei dingu ahi. Ijeh-inem itile aman migiloule mipha chunga anisa asosah gelin, chule michonpha le michonse chunga go ajuhsah gelin ahi.

⁴⁶Ijeh-inem itile nanghon nangailu teo jeng chu nangailut uva ahile, ipi kipaman nasan dinguham? Kaidonghon jong chutima chu abolu hilouham?

⁴⁷Chule nasopiu jengmai salam naboh uva ahile, midang ipi-a nakhelnao umam? Kaidonghon jong chutia chu abol louham?

⁴⁸ Hijeh chun van'a um na-Pau aphat chamkimsoh bangin, nangho jong chamkimun.