Read Thado Chin Mathew 6 Bible Online

Mathew 6 - Thado Chin bible

Mathew 6

¹ Nathilphabolu chu mihon amuna dinguva amasanguva nabol louna dinguvin chingtheijun; chutia nabol ule van'a na-Pau koma san ding kipaman nei lou nahiuve.

²Hijeh chun mi thil napeh tengule, mi pachat ding ngaitonan miphalhem ho bangin kikhopna in tinleh lam dungah namasang sang uva sumkon mut hih-un; tahbeh-a kaseipeh nahiuve, Amaho chun kipaman akisanu ahitai.

³Nangma vangin mi thil napeh teng, nakhut jetlamin abol chu nakhut veilam hetsah hih-in,

⁴Chutilebou nathilpeh chu guhthim hintin, guhthima mu-a na-Pan phongtah-a nangma nasah ding ahi.

⁵ Nangho Pathen henga natao tengule miphalhem hotoh bang hih-un, amahon mi mu dingin kikhopna intina le lamkontina dina tao adeijun ahi. Tahbeh-a kaseipeh nahiuve, Amaho chun kipaman akisanu ahitai.

⁶Nang vang natao tengle, na-insung dana lutnin lang chule kot khah-in, guhthima um na Pa henga taovin; chuteng guhthima mu-a na-Pan nangma phongtah-a nasah ding ahi.

⁷Amavang chidang namdangte bangin naseisa velsei kit hih-un, ijeh-inem itile amahon thu tamtah asei jeh uva chu jahpeh-a umdinga angaitou ahi.

⁸Hijeh chun amahotoh bang hih-un; ijeh-inem itile nathum masangun, nadei nangai chanu chu na-Pau vin ahenai.

⁹Hijeh chun hitihin taovun; Van'a um ka-Pau, namin kijahen.

¹⁰Nagam hung lhunghen. Van'a nalungchan akim bangin, leija jong nalungchan kimhen.

¹¹Tunin kaneh khop dingu anneh neipeuvin.

¹²Kalei bateu kangaidam bangun, keiho bat jong ngaidamin.

¹³Chule lhepna-a neipui hih-un, agilouva konin neihuhdoh jouvin: ajehchu lenggam, thahat, chule loupina atonsotna nanga ahi, Amen.

¹⁴ Ijeh-inem itile nanghon mi suhkhel nangaidam uva ahile, van'a na-Pau vin jong nangho suhkhel angaidam ding ahi.

¹⁵Amavang nanghon mi suhkhel nangaidam lou vangule, na-Pau vin jong nangho suhkhel angaidam lou ding ahi.

¹⁶Nanghon an nangol tengule, miphalhem ho bangin kinguisah hih-un; ijeh-inem itile amahon an angolu min ahetna dingin, amaiso achom ahisah jiuvin ahi. Tahbeh-a kaseipeh nahiuve, Amahon kipaman akisanu ahitai.

¹⁷Nangma vangin an nangol tengle, nalu thao kinunlang, namai jong kiphet in.

¹⁸Chutile mihem mitmu hilouva, guhthima um na-Pa mitmu-a an ngol nabah ding ahin; chuteng guhthima mu-a na-Pan phongtah-a kipaman napeh ding ahi.

¹⁹ Ngetle twi eh-in asuhmang theina, guchan aphet vanga chule aguhmang theina leiset chungah gou khol hih-un;

²⁰Amavang ngetle twi eh-in asuhmang thei louna, guchan jong aphetvang theilou nale aguhmang thei louna van'ah nagou kholun;

²¹Ijeh-inem itile nagou umna-a chu nalung jong umding ahi.

²²Mit hi natahsa meivah ahi; hijeh chun namit achima ahile, nati pumpi vah ding ahi.

²³Amavang namit phata hihle, nati apumpi thim ding ahitai. Hijeh chun nasunga um vah chu athima ahile, hiche thim chu ichana thimding hitam!

²⁴Koima pakai ni soh ahi theipoi; ijeh-inem itile aman khat hotbolintin, khatjoh angailut ding ahi; ahiloule khatna hakai jintin, khatjoh anahsahmo ding ahi. Nangho Pathen le sum soh nahikop thei lou dingu ahi.

²⁵Hijeh-a chu nangho jah-a kasei ahi, i-kaneh ding hitam, i-kadon ding hitam, tin na hinna dingun; ahiloule, i-kasila kachen ding hitam, tin natahsa dingun lungkham hih-un. Anneh sanga hinkho, chule nihchen ponsil sanga tahsa thupijo hilouham?

²⁶Chunga leng vacha khu ngaitouvin, amahon tula atupouvin, atla a-at pouvin, ahinla van'a um na-Pau vin amaho khu avahnai. Nangho khuteho sanga lujo nahi lou uham?

²⁷Nangho lah-a lungkham hatna ahinkho tong khat jopsaobe thei koi nahiuvem?

²⁸Chule nihchen ponsil jeh-a ibola nalung kham uham? Jaova molhoipah khu iti khanham ngaitouvin. Hicheho khun tongla atonggim pouvin, patla akhehpouve;

²⁹ Ahivanginla keiman najah uva kaseipeh nahiuve, Solomon jeng jong aloupina jouse-a akivon chun, hiche molhoi khattoh kibangin akijem hoipon ahi.

³⁰Chule jaova hampa tunia uma, jinga lhum sunga kileh lutta ding jengbon Pathen'in achuti jeple, vo tahsan lhomho, chu sanga chu Aman nangho najepjoh lou dinguham?

³¹Hijeh chun, I-kaneh dinguham? I kadon dinguham? I kasil dinguham, tin lungkham hih-un;

³²Ijeh-inem itile chidang namdang ten hitiho chu aholu ahin; chule nanghon jong hicheng chu nangaichaove ti van'a na-Pau vin ahenai.

³³Ahivangin amasatah-in Pathen lenggam le chonphatna hol masaovin; chuteng hichengse jong chu naki pehbe dingu ahi.

³⁴Hijeh chun jinga dingin lungkham hih-un; jing chun aman hinki ngaito nante. Ni khat hesohna chu ni khatna dingin atohbepmin ahi.