Read Thado Chin Mathew 7 Bible Online

Mathew 7 - Thado Chin bible

Mathew 7

¹Oimo-a naum louna dinguvin, mi oimo hih-un.

²Na-oimo bang cheh-a chu oimo-a naum dingu ahin; chule nanghon nate bang banguva chu nangho kitepeh dinga nahiuve.

³Nangma mitna thingtum uma chu ngaito louva, ibola nasopi mitna bohthem chu navet ham?

⁴Chule ven, nangma mitna thingtum uma, nasopi jah-a, namitna bohthem umchu neilahdoh sah-in nati theiham?

⁵Vo miphalhem, nangma mitna um thingtum chu kilahdoh masatnin; chutengle nasopi mitna bohthem chu lahdoh dinga namuchen dingbou ahi.

⁶Uichaho khu thiltheng pe hih-un, vohcha anga natwikoh changu seplha hih-un; amahon hitiho chu akengun chonuntin, chule hungkile heijuntin nangho jengjong nalhehtel dingu ahi.

⁷Thumun, kipe ding nahiuve; holun, namu dingu ahi; kiuvun, kihon peh ding nahiuve;

⁸Ijeh-inem itile athumchan achangin; aholan amun; chule akiuva chu kot kihon peh ding ahi.

⁹Achapan changlhah athumle song pe-a,

¹⁰Nga athumle gul pe dinga, nalah uva koi naum uvem?

¹¹Hijeh chun nanghobon migiloutah hiuva, nachateo thilpha pehje nahet ule, hiche sanga chu gamchenga van'a na-Pau vin ahenga thumte chu thilpha apeh lou dingham?

¹² Hijeh chun ima jouse-a min nangho iti nabolle nadeijum, nanghon jong chutobang chun bolun; ijeh-inem itile hichu dan thupeh le themgaoho thu ahi.

¹³Kot jima lutnun; ijeh-inem itile manna lam chu akot jatah ahin, alampi jong lentah ahi, chule chua lut chu tamtah ahi.

¹⁴Hinna lam chu akot jong ajimin, alampi akichin, chule hichu amua alhome.

¹⁵Kelngoi von kivona asunglamla ngei hangtah hia themgao lhem, naheng uva hungjiho-a konchun kichih theijun.

¹⁶Amaho chu agauva nahet jeng dingu ahi. Mihemin lingphunga lengpiga aloa, ahiloule meithai seltho linga theichang alo ngaijem?

¹⁷Hiche bang chun thingphung pha jouse aga aphan, thingphung lungvei chun ga phalou asepdoh jin ahi.

¹⁸Thingphung pha-a aphalou gathei lou; chule thingphung phalouva jong apha gathei lou ahi.

¹⁹ Thingphung aga phalou chengse chu kiphuh lhu-a meija kisep lutji ahi.

²⁰ Hijeh chun nanghon amaho chu agauva nahet dingu ahi.

²¹Pakai, Pakai, eiti chan chu van lenggama lut ding ahipoi; koi hileh van'a um ka Pa lunglam bolpabou chu lut ding ahi.

²²Hiche ni chule mi tamtah-in kajah-a, Pakai, Pakai, keihon nangma mina thu kasei lou uham? Chule nangma mina thilha kanodoh lou uham? Chule nangma mina bolmo kidang kabol lou uham, ati dingu ahi.

²³ Hiteng chule keiman amaho chu phongtah-a kaseipeh-a, Keiman nangho imatihchanin kahekhapouve; vo chonset bolteho, kakoma konin chemangun, kati ding ahi.

²⁴Hijeh chun koi hijongle kathu hicheng hi ja-a, bola chu, song chunga in sa milungthim phatah toh kitekah ding ahi.

²⁵Chuin go ahung jun, twi ahungsoh-in, hui ahung nungin, chuche in'a chun achun; ahin song chunga kibulphu ahi jeh-in alhupon ahi.

²⁶Chule koi hijongle kathu hicheng hi ja-a, bol lou chu, nellei chunga in sa milungthim bei toh kitekah ding ahi.

²⁷Chuin go ahung jun, twi ahungsoh-in, hui ahung nungin, chuche in chu ahin nuhtan ahile alhutai; chule alhuh chu nasatah ahi, ati.

²⁸ Chuin Jesu'n thu chucheng asei jouvin, mihonpi chun athuhil chu kidang asa lheh-un ahi,

²⁹Ijeh inem itile Aman amaho danthu lekha sunho mihil banga hil louva, thuneitah banga amaho chu thu ahil ahi.