Read Thado Chin Mathew 8 Bible Online

Mathew 8 - Thado Chin bible

Mathew 8

¹Chujouvin ama molsang chunga konin akumsuh-in ahile, mipi tamtah-in anung ajuijun ahi.

²Chuin, veuvin, miphah khat ahenga ahungin, chibai ahung boh-in, Pakai, nangma nalung ahile keima eingimsah thei nahi, ahungtin ahi.

³Chuin Jesu'n akhut alhangin, athamin, Kalung ahi: ngimtan, ati. Chupet tah chun aphah chu adamtai.

⁴ Chuin Jesu'n amapa jah-a chun, Ven, hiche thuhi koima jah-a sei hih-in, amavang chenlang thempu gakimu sahtan, chule amaho hettohsahna dingin Mosi thupehsa thilto ding chu gatohtan, ati.

⁵Chuin Jesu Capernaum alutnin ahile, sepai jalamkai khat ahenga ahungin, ngehna aneijin,

⁶Pakai, kasohpa alangthin in'a alumin, anat athohlel lheh jenge, atin ahi.

⁷Chuin Jesu'n ajah-a, Hunging ting hung damsah nange ati.

⁸Chuin hiche sepai jalamkai chun adonbutnin, Pakai, nangma ka-in sunga nahung lut ding chu, keima chutia kilom kahipoi; nangman thuchengcha khat seile chun, kasohpa dam jeng ding ahi.

⁹Ijeh-inem itile keima jong mi thuneina noija um kahin, keima noija sepaiho aumun; chule keiman khatpenpen chu, Chen, katile, achen; achomkhat, Hungin, katile, ahungin; chule kasoh jah-a, Hiche bolin, katile, aboljin ahi, ati.

¹⁰Jesu'n chuche thu ajah phatnin, kidang asan, anunga hungho jah-a chun, Keiman tahbeh-a nangho jah-a kasei ahi, Israel lah jenga jong hitobang tahsan len khatcha jong kamu khapoi.

¹¹ Chule keiman nangho jah-a kasei ahi, Niso lama konle nilhum lama konin mi tamtah hungintin, Abraham, Isaac, chule Jacob toh van lenggama toukhom ding ahiuve;

¹² Amavang lenggam chate polam muthim lah-a kipaidoh ding ahiuve; hikoma chu kale hagel umding ahi, ati.

¹³Chuin Jesu'n sepai jalamkai jah-a, Nangma chetan, natahsan bangin nachunga lhunghen, ati. Chuphattah chun achapang chu adamtai.

¹⁴Chujouvin Jesu Peter in'a alutna ahile, anupanu khosih veija na analup amun;

¹⁵Chuin aman amanu khut agah thamin ahile, akhosih chu adalhatai. Chuin ahung thouvin, amaho jenlen apangtai.

¹⁶Chuin nilhah-in mihon thilha vop mi tamtah ahenga ahinpuijun; aman thilhaho chu anodoh-in, chule ana jouse adamsah tai.

¹⁷ Isaiah themgaovin, Amatah-in ihatmonau alan, inat jouseu apomangtai, tia asei chu guilhuna dinga chuti ahi.

¹⁸Chujouvin Jesu'n akimvela mipi tamtah chu amun, gal lang khat lama che din thu apetai.

¹⁹Hiche pet chun danthu sunho khat ahenga ahungin, Houhil, nachena chan-ah juijinge, ati.

²⁰Jesu'n amapa jah-a, Sial hon ko aneijun, chunga leng vachaten jong buh aneijun, Mihem Chapa vangin alu ngapna ding mun aneipoi, ati.

²¹Chuin aseijui dangho lah-a khatnin ajah-a, Pakai, amasa kache-a kapa kagavuina din thu neipen, ati.

²²Jesu'n ama jah-a, Nangman kanung hinjuitan: mithihon amithiu kivui naovinte, ati.

²³Chujouvin ama kong'a atouvin ahile, aseijuite chun anung ajuijun ahi.

²⁴Hichun, veuvin, dillen'a chun khopihui hanunin anungin, twi kinongin kong chu ahin khu jengtan ahi; ahivangin ama a-imun ahi.

²⁵Chuin aseijuiho ahenga ahungun, asukhangun, Pakai, neihuhhing un: athigam ding kahitaove, atiuvin ahi.

²⁶Chuin aman ajah uva, Vo tahsan lhomho, ibola kicha-a nahiuvem? ati. Chutah-in ama athouvin, huipi le dillen chu aphoh-in ahile, athip heltai.

²⁷Chuin miho chun adatmo lheh jengun, Ama hi iti mi hingana, huipi le dillen sanin athu angaije, atiuvin ahi.

²⁸Chuin ama agalkaija Gargesenes gam alhunin, thilhavop mi ni lhankhuh-a konin amatoh kitoh dingin ahung lhonin; amani chu khohtah ahi lhonin hilam chu koimachan ahothei louhel ahi.

²⁹Hichun, veuvin, amani chu a-ao jah lhonin, nangma Pathen Chapa, Jesu, Nangle keiho ipi ikimatnao umam? Ni kitep lhin masanga eibolgim dinga hunga nahim? ati lhone.

³⁰Hipet chun aumnao gallampeh-a chun vohcha hon khat alhan ahi.

³¹Hichun thilhaho chun Jesu henga, Keiho neikaidoh ule, khuche vohcha hon lah-a khun neisol uvin, tin angeh taovin ahi.

³²Chuin aman ajah uva, Cheovin, ati. Chuin apotdoh-un, vohchaho sunga chun alut taovin ahi; chuin, veuvin, ahonchangpin halhaijin alhaijun, kolah alhai lhauvin, dillenah alha lutnun, twijah athigam taovin ahi.

³³Chuin achingho chu khopi sung lama ajamlutnun, thu umchan jouse le thilhavop miteni thu chu agaseijun ahi.

³⁴Chuin, veuvin, khosunga mi jouse Jesu toh kimuto dingin ahungdoh-un; chuin ama amu phatnun, agam sunguva kona chedoh dingin angeh taovin ahi.