Read Thado Chin Mathew 9 Bible Online

Mathew 9 - Thado Chin bible

Mathew 9

¹Chujouvin kong'a atouvin, agalkaijin, akhopi [2] ah alut tai.

²Chuin, veuvin, mihon alupna khun pumin langthi khat ahenga ahinpu uvin; Jesu'n atahsanjeu chu amun, langthipa jah-a chun, Chapa, lungmong tah-in umin, nachonset kingaidam ahitai, ati.

³Hichun, veuvin, danthu sunho kimkhatnin alungthimun, Hipa hin Pathen ataitome, atiuvin ahi.

⁴Hichun Jesu'n alung gelu chu ahen, Nanghon nalunguva ibola lungilou navopmu ham?

⁵Nachonset naho kingaidama ahitai, tileh thouvin lamjotnin, ti, hoijoh seibaijo-am?

⁶Ahoi hita jongle Mihem Chapan leiset chunga mihemte chonset ngaidam theina thahat aneije ti nahetna dingu ahi atin, hichun alangthipa jah-a, Thouvin, nalupna kilah-inlang na-in'a chetan, ati.

⁷Chuin amapa athouvin, a-in lama achetai.

⁸Ahin mipin hichu amu phatnun, kidang asauvin, hitobang thuneina mihemte pe-a Pathen chu avahchoi taovin ahi.

⁹Chuin Jesu chua konin achen ahile, mi khat amin Matthew kiti, akaidonna mun'a atou amun, ajah-a, Kanung hinjuijin, ati. Chuin ama akipatdoh-in, anung ajuitai.

¹⁰ Chuin ahitin ahi, Jesu chuche in'a an nedingin atouvin ahile, veuvin, kaidongho le michonseho tamtah ahungun, Jesu le aseijuiteho chutoh ankong aum khomun ahi.

¹¹Chuin Pharisai hon chuche amu phatnun, aseijuite henga, Nahilpauvin ibola kaidongho le michonsehotoh an aneh khomham? atiuvin ahi.

¹²Ahin Jesu'n chuche ajan, Atidamten louthem angaipouve; adamlouten bou angaijui.

¹³ Keiman kithoina kangehpoi, kikhoto nabou kangeh-e, ti hi ipi kiseina ahi gakihilun; ijeh-inem itile keima michonpha te kou-a hung kahipoi, alungheina diuva michonse te kou-a hungjoh kahibouve, ati.

¹⁴Chupettah chun John seijuite ahenga ahungun, ajah-a, Keiho le Pharisai honla an kangol matchet jiuvin, ibola nangma seijuiten an angolji louvu ham? atiuvin ahi.

¹⁵Chuin Jesu'n amaho jah-a, Moulang chun aloite aumpilai sungse-a aloite chu kingaise thei ngaijuvem? Amavang moulang chu akomuva kona kipuimang ni hung lhung ding ahin, chuteng chule amahon an angol dingu ahi.

¹⁶Koiman ponthah halin pon lui abeh ngaipoi, ijeh inem itile abehna chun apon chu loisentin, secheh joding ahi.

¹⁷Chule mihemin lengpitwi thah savun peng luija akhum ngaipoi; achuti loule apeng chu tumkeh intin, atwi longjal ding, apeng jong mahthah ding ahi: amavang lengpitwi thah chu peng thah-a akhum jiuvin, chule anin akihuh bitjin ahi, ati.

¹⁸Hicheng thu chu asei pettah-in, veuvin, vaipo khat ahungin, ama chibai ahung boh-in, Kachanu tutah chun athin ahi; ahivangin nangma hungin lang achunga nakhut hung ngamle chun amanu hing jeng ding ahi, ahungtin ahi.

¹⁹Chuin Jesu akipatdoh-in, anung ajuijin, chutichun aseijuiten jong ajuijun ahi.

²⁰Chuin veuvin, kum somle kum ni athi longa na-a numei khat anung lama ahungin, apon mongkai chu ahung thamtan ahi.

²¹Ijeh inem itile amanun alungthima, Apon jengcha hi thamkha jongleng kadam ding ahi, ati ahi.

²²Chuin Jesu akiheijin, amanu chu amun, Chanu, lungmong tah-in umin; natahsanin nadamsah ahitai, ati. Chua pat chun amanu adamheltai.

²³Chujouvin Jesu vaipopa in ahung lut phatnin, sumkuli mut teho leh mipi poh vengvung chu amun,

²⁴Amaho jah-a chun, Potdoh-un; ijeh-inem itile chapangnu chu athi ahipoi, a-ihmu ahibouve, ati. Chuin amahon anuisat taovin ahi.

²⁵Ahivangin miho chu akisoldoh phatnin, in sunga alutnin, chapangnu khut atuh-in ahile amanu athoutai.

²⁶Hichun hiche gamsesea chun hiche thu chu akithang sohtai.

²⁷Chuin Jesu chua konin achedoh-in ahile, mitcho ni anung nunga ache lhonin, Vo David chapa, neilungset in, tin asam lhonin ahi.

²⁸Chuin ama in sung alut phatnin, hiche mitcho teni chu ahenga ahung lhonin; Jesu'n ajah lhonah, Kei hin hichu bolthei jinte ti natahsan lhonem? tin adongin ahi. Amanin, Henge, Pakai, ati lhonin ahi.

²⁹Chutah-in aman amit lhonchu akhoijin, Nathsan bang lhonin nachung lhonah chutahen, ati.

³⁰Hichun amit lhon ahahtai. Chuin Jesu'n amani chu hakhamin akhamin, Chingthei lhonin, koima hetsah lhon hih-in, ati.

³¹Ahivangin amani apot lhonin, chuche gamsese-a chun ama min chu aphongjal lhontai.

³²Chuin acheuvin ahile, veuvin, lampia thilhavop mi paomo khat ahengah ahinpuijun ahi.

³³Thilha chu akideldoh phatnin, paomopa chu apaotai. Hichun mipi chun kidang asauvin, Israel lah-a hitobang akimukha hih-e, atiuvin ahi.

³⁴ Pharisaiho vangin, Thilha ho lengpa mina thilhaho adeldoh hichu, atiuve.

³⁵ Chujouvin Jesu khotinle vengtina avahle avahlen, akikhopnao intin-ah thu ahillen, lenggam Kipana Thupha ahil lhanglen, hivei namkimle nat namkim adamsahtan ahi.

³⁶ Ahin miho chu achingbei kelngoi banga, lhasamle chehchao tah-a aumu amu phatnin, alung selheh-in ahi

³⁷ Chuphatnin aseijuite jah-a, Chang-at ding tam lheh-in, ahivangin natonga alhome.

³⁸Hijeh chun achang at dinga natongho ahinsol nadingin, louneipu henga taovun, ati.