Read Thado Chin Mark 1 Bible Online

Mark 1 - Thado Chin bible

Mark 1

¹Pathen Chapa Jesu Christa Kipana Thupha kipatna;

²Themgaoho lekhabua kisun bangin, Ven, keiman kasottol namasang sang-ah kasole; Ama chun nalampi anasem ding ahi;

³ Gamthipma khosam aw khatnin, Pakai lamlen semtohsan koijun, Alampi semjangun, tia kisun bang chun,

⁴John Baptist chun gamthipmah twi alutsah-in, chonset suhmangna dinga lungheija baptize chan ding thu lhangsamin ahi.

⁵Chuin Juda gama mi jouse le Jerusalem'a mi jouse ama henga acheuvin, achonsetnu aphongun, Jordan luija ama khutna abonun baptize achang taove.

⁶ Chule John chu sangongsang mul ponin akivonin, savun konggah-in akong akigeh-in, chule a-anneh chu khaokho le gam khoiju ahi.

⁷Chule thu ahil lhanglen, Kanungah keima sanga hat chungnungjo ahunge, keima hi kuna akengchot khao sutlham dinga jong kilom kahipoi.

⁸Keiman nangho twija baptize kachansah nahiuvin; amavang Ama chun nangho Lhagao Thenga baptize nachansah dingu ahi, ati.

⁹Hilai chun ahitin ahi, Galilee gam sunga Nazareth kho-a konin Jesu ahungin, Jordan luija John khutna baptize achangtan ahi.

¹⁰Chuin twi lah-a kona ahungdoh doh-in, van akikehso-a, Lhagao vakhu bang achunga ahung kumlhah amun:

¹¹ Van'a konin aw khat ahung gingin, Nangma ka-Chapa deitah nahi, nachungah kalung alhai tangeije, ati.

¹²Chuin Lhagao chun gamthipma apui mang paijin,

¹³Chua chun nisomli Satan lhep patepmin aumin, gamsa lah-a aumin; chuin vantil hon ahung jenleuvin ahi.

¹⁴Chujouvin John songkul'a akikhum jouvin, Jesu Galilee gama ahungin, Pathen lenggam Kipana Thupha ahil lhanglen,

¹⁵ Phat alhingtai, chule Pathen lenggam jong anaitai; nalung heijun, Kipana Thupha hi tahsanun tin alhangsamin ahi.

¹⁶Chuin Galilee dillen pang ajotpa na-a, Simon le asopipa Andrew dillena lensep amun; amani chu ngaman mi ahi lhone.

¹⁷Chuin Jesu'n amani jah-a chun, Kanung hinjui lhonin; keiman nangni mi man lensep hisah lhoninge, ati.

¹⁸Chuin amanin alen adalha lhonin, anung ajui pai jeng lhontai.

¹⁹Chuin themkhat achechon jeple, Zebedee chapate ni Jacob leh anaopa John amani jong chu kong sunga len anakhui phat pet lhon amun;

²⁰Chuin amani chu akou paileuvin ahile, amanin apa lhon Zebedee chu athalah soh ho toh kong sunga chun adalha lhonin, ajui lhontai.

²¹Chuin amaho Capernaum'a achelutnun; cholngah nin kikhopna in'ah alutnin, thu ahil paijenin ahi.

²² Aman danthu sunho banga hil louva, thuneitah banga ahil jeh-in miho chun athuhil chu kidang asa lheh-un ahi.

²³Chuin akikhopnao in'a chun lhagao boh vop mi khat anaumin, chule ama chun ahinsam paijenin,

²⁴Nazareth Jesu, nangle keiho ikimatnao i-um em? Eisumang uva hunga nahim? Nangma koi nahi kahenai, Pathen'a kon Atheng chu nahi, ati.

²⁵Chuin Jesu'n ama chu aphoh-in, Thipmin, ama-a kon chun hung doh-in, ati.

²⁶Chuin lhagao boh chun mipa chu aheh-in, hapenin apengin, ahung potdoh tai.

²⁷Chuin mi jousen kidang asan alungdong lheh jengun; chutichun khatle khat akidongun, Hiche hi iti hintem? Hiche hi thuhil thah ahi! Aman thunei tah-in lhagao bohho thu apen, chule amaho jong athun anung jenguve, atiuvin ahi.

²⁸Chuin Galilee gam kimvel chengse-a amin akithang pai jengtan ahi.

²⁹Chule kikhopna in'a kona ahungdoh doh-in, Simon le Andrew insunga chun Jacob le John toh alut paijun ahi.

³⁰Ahin Simon nupanu chu khosih-in anan analumin; chuin amahon anat thu chu Jesu ahetsah paijun ahi.

³¹Chutichun amanu koma chun achen, akhutnin atuh-in, akaithou tai; hichun akhosih chun alha jengin, chuin amanu chu amaho jenlen apangtai.

³²Chuin nilhah ahia, nisa alhum jouvin, mihon ana damlou jouse le thilhavop ho ahin puijun;

³³Chule khopi sunga mi jouse kotpi phung-ah akikhomun ahi.

³⁴Chuin Aman hiveichom chom veija damlou mi tamtah adamsah-in, chule thilha tamtahma adeldoh-in; ama Christa ahi chu ahet jeh-un thilhaho chu apao sahpon ahi.

³⁵Chuin jing khovah lhah masang peh-in athouvin, apotdoh-in gamthip munah achen, chua chun agataovin ahi.

³⁶Chuin Simon le agoldangho chun anung ajuijun,

³⁷Amudoh phatnun ajah-a, Mi jouse hinla nang nahol cheh-un, atiuve.

³⁸Chuin Aman, Naidunga khopi dang danga jong kahil lhangle theina dingin cheohite; hiche dinga chu hung kahi, ati.

³⁹ Chuin ama Galilee gamsese-ah achelen, akikhopnao in tinah thu ahil lhanglen, chule thilha adeldoh peh-in ahi.

⁴⁰Chuin miphah khat Jesu henga ahungin, ajah-a, Nalung ahile neidam thengsah thei ahi tin a-angah adilsun ataotan ahi.

⁴¹Chuin Jesu'n alungset behseh-in, akhut alhangin, athamin, Kalung ahi; dam thengtan, ati.

⁴²Chuin hiche thu chu aseijou jouvin, chupettah chun aphah chun adalha paijin, athengsel tai.

⁴³Chuin Aman amapa chu akhamchah kheh-in, asolmang paijin;

⁴⁴Ajah-a, Ven, koima jah-a sei hihbeh-in, ahin chenlang thempu gakimusah-in, chule nadam theng thu dol chu amaho hettohsahnan Mosi thupehsa thilpeh ding chu gapetan, ati.

⁴⁵Ahivangin amapa apotdoh-in, hiche thu chu asamlen, aha phonjal cheh tan; achuti jehchun chukalin Jesu lhangphong in koima khopi sungah alut theita hih-in, gamthip thipma aumjotai: chule muntina konin ahengah miho ahungjiuve.