Read Thado Chin Mark 10 Bible Online

Mark 10 - Thado Chin bible

Mark 10

¹Chuin Ama chua konin akipatdoh-in, Jordan gal lama konin Juda gamkol sung ahungtan ahi. Chuin mihonpi chu ahenga ahung kikhom kit taovin, chutichun Aman angaijin amaho chu ahil kittan ahi.

²Chuin Pharisai ho ahenga ahungun, apatepnan thu adongun, ajah-a, Min aji ada hi dan ngai hinam? atiuvin ahi.

³Jesu'n amaho adonbutnin, Mosi'n nangho thu iti napeh-um? ati.

⁴ Chuin amahon, Mosi'n kidana lekha sutna, chule da ding aphasah ahi, atiuvin ahi.

⁵Jesu'n adonbutnin ajah uva, Nangho lungtah jeh-a aman hiche thupeh chu nangho dinga asut ahibouve.

⁶ Ahivangin leiset kisemtila patna Pathen'in amani chu numei le pasal'a asemsa ahitai.

⁷ Hiche jeh-a chu pasal'in anu apa adalhah-a ajia beh ding ahi;

⁸Chule amani chu ti khat hilhon ding ahi. Hiti chu ahin amani pumni mi ni hita louvin ti khat ahi lhontai.

⁹Hijeh chun Pathen gopsa chu mihemin sukhen hihen, ati.

¹⁰Chuin in sungah aseijuiten hiche thudol chu adong kitnun ahi.

¹¹ Aman ajah uva, Koi hileh aji da-a ji dang neichan chun ajinu chu ajonsan ahi.

¹²Numei jin jong apasal ada-a mi dangtoh akichenle, ama jong chu ajonga ahi ati.

¹³Chuin atham dingin chapang neochaho ahenga ahinpuijun ahile aseijuiten anaphoh-un ahi.

¹⁴Ahin hichu Jesu'n amun, alung phamon, ajah uva, Chapang neochaho chu kahenga hung sah-un, jada hih-un; ijeh-inem itile Pathen lenggam chu hitobang tehoa bou ahi.

¹⁵ Tahbeh-a kaseipeh nahiuve, Koi hile chapang neo tobanga Pathen lenggam sang lou chu, iti nama jongle chua lut louhel ding ahi, ati.

¹⁶Chuin amaho chu apomin, achunguva akhut angamin, phatthei aboh tan ahi.

¹⁷Chuin Ama lampi dunga che dinga apotdoh pettah-in, mi khat ahung lhaijelin, a-angah adilsun, Houhil pha, itileng tonsot hin kemlou kachan thei dingham? tin adongin ahi.

¹⁸Chuin Jesu'n ajah-a, Ibola apha neitiham? Pathen khatseh tailou koimacha apha aumpoi.

¹⁹ Thupeh chengse, Tolthat hih-in, Jon bol hih-in, Gucha hih-in, Dohan mi bol hih-in, Nanu napa jabolin, ti chu nahenai, ati.

²⁰Ahin amapan adonbutnin, ajah-a, Houhil, hichengse chu kachapan laija patna kahin nitpeh ahitai, ati.

²¹Chuin Jesu'n ama chu aven ahile angailun, ajah-a, Khat nabat nalaije; chenlang nanei chengse gajoh inlang mivaicha gentheiho petan, chutile van'a gou nanei ding ahi; chule cross kiput inlang kanung hinjuijin, ati.

²²Chucheng asei ajah phat chun amai athimkot jengtan, chuin gou haotah ahi jeh-in lungnom mo tah-in achemang tan ahi.

²³Chuphatnin Jesu'n aseijuite ave kimvelin, Mihaoho hi Pathen gama alut dingu iti hahsat hitam! ati.

²⁴Chutia ati chu aseijuiten adatmo lheh-un, ahivangin Jesu'n aseikitnin, Chapangho, haona-a kingai miho Pathen lenggama alut dingu iti hahsat hitam!

²⁵Mihao Pathen gama alut sangin heubil homa sangongsang lut abaijoi, ati.

²⁶Chuin amahon kidang asabehseh jengun, ajah-a, Chuti ahile, koi huhhing-a um jou dingham? atiuvin ahi.

²⁷Chuin Jesu'n amaho chu aven, Mihem dingin hitheihoi ahipon, Pathen dingin vang ahimopoi; ijeh-inem itile Pathen dingin ijakai ahitheije, ati.

²⁸Peter'in ajah-a, Vetemin, keihon ka-ima jouseu kadalhaovin, nanung kahinjui taove, ati.

²⁹Jesu'n, tahbeh-a kaseipeh nahiuve, Keima jal leh Kipana Thupha jala, a-in, asopipate, asopinute, anu, apa, aji, achate, chule agam leiset hindalha-a chu,

³⁰Tu ahinlai sungahi bolsetna thoh pumpuma ajat ja-a in, sopipate, sopinute, nu, pa, ji, chate, gam leiset changlou ding aumpon; chule ahung lhung ding khonung hinkho-a chu tonsot hin kemlou chang lou ding koima aumpoi.

³¹ Amavang amasa cheng tamtah nukhah intin, anukhah cheng masa ding ahi, ati.

³²Chuin Jerusalem chetou dingin acheuvin, lamdung ageijun Jesu amasan ahile adatmo lheh jengun; chule anunga cheho chu akicha taovin ahi. Chuin Aman somleni ho chu ahenga akou kitnin, ajah uva achunga ipi ahung lhun ding hichu aseipanin,

³³Veuvin, Jerusalem jonin ichetouvui; chukoma chu Mihem Chapa hi thempu pipui le danthu sunho khutna pehdoh-a umding, amahon themmo achansah uva chidang namdangte khutna apehdoh dingu;

³⁴Chule amaho chun a-el ela aboldiu, avoh diu, achil asetkhum dingu, chule atha dingu ahi: chule nithum ni le ama thoudoh kit ding ahi, ati.

³⁵Chuin Zebedee chapate ni Jacob le John ahenga ahung lhonin, ajah-a, Houhil, nahenga kathum chan lhonhi neibolpeh lhonle chun kalung lhon ahi ati lhone.

³⁶Hichun Aman, Ipi bolpeh lhonleng nagot lhonem? tin adongin ahi.

³⁷Amanin adonbut lhonin, ajah-a, Naloupi na-a chun khat najetnah, khat naveijah neitousah lhonin, ati lhonin ahi.

³⁸ Ahin Jesu'n ajah lhonah, Nathum lhon chu nahe lhonpoi: kadona ding khonna hi nadon ngam lhona chule kachan ding baptize hi nachan ngam lhon ding hinam? ati.

³⁹Hichun amanin ajah-a, Kangame, ati lhonin ahi. Chuin Jesu'n, Kadon ding khonna vang nadon lhon ding ahin, chule ka baptize channa-a jong baptize nachan lhon ding ahinai.

⁴⁰Ahivangin kajetle kaveija tousah ding vang chu keima peh dol ahipoi, gotsa kikoipehho kipe ding ahibouve, ati.

⁴¹Hichun somho chun hichu ajauvin, Jacob le John chunga alung phamo pantaovin ahi.

⁴² Ahinla Jesu'n amaho chu akouvin, ajah uva, Chidang namdangte chunga vaipo tia kiseiho khu a-pakaiyun laltah-in aumun, chule amilen milaltehon achunguva athu neinao apanjiuve ti nanghon naheuve.

⁴³ Nangho lah-a vang chu tichu ahipoi: ahin koi hile nangho lah-a alen hi noma chu nalhachaova pang ding;

⁴⁴Chule nalah uva apipuipen hi noma chu mi jouse soh hi ding ahi.

⁴⁵Ijeh-inem itile Mihem Chapa tah jongchu jen dinga hung hilouvin, ajenle dingle mi tamtah lhatdoh nadinga ahinna toh dingjoh-a hung ahibouve, ati.

⁴⁶Chuin Jericho khopi ahung lhung taovin ahi. Chuin aseijuitele mihonpi toh Jericho khopi-a kona akipat doh-un ahile, Timaeus chapa Bartimaeus kiti mitchopa chu lamkenga khutdon anatouvin ahi.

⁴⁷Nazareth Jesu ahi ti ahet phatnin, Vo David Chapa Jesu, neilungset in, tin asampantan ahi.

⁴⁸Mitam tah-in ama chu thipbeh-a umdingin aphoh-un; ahivangin ama chun, David Chapa, neilungset in, tin ahasap chehtan ahi.

⁴⁹Chuin Jesu adingin, agahkou dingun thu apen ahi. Amahon mitchopa akouvun, ajah-a, Lung mongin umin, kipatdoh-in, nakouve, atiuvin ahi.

⁵⁰Chuin ama chun apon aleh lhan, akipatdoh-in, Jesu henga achetai.

⁵¹Chuin Jesu'n ama chu ahouvin, Keiman nangma iloleng nalungham? ati. Chuin mitchopa chun ajah-a, Rabbi, kho muleng kati, ati.

⁵²Chuin Jesu'n ajah-a, Chetan, natahsanin nadamsah ahitai, ati. Chupettah chun kho amupai jengin, lamdung lhung chun Jesu ajuitan ahi.