Read Thado Chin Mark 11 Bible Online

Mark 11 - Thado Chin bible

Mark 11

¹Jerusalem kho koma Olivet mola Bethphage le Bethany ageijun, aseijuite lah-a mi ni asolin,

²Ajah lhona, Namasang jon lhona kho sunga khun lut lhonin: kho sung nalut lut lhonle, sangan nou kihen koima touna khah loulai namu paijen lhon ding ahi, hichu sut lhoninlang hinkai lhonin.

³Chule mi khattouvin, Ibola nasut lhonham? tia donga aumle, Pakaiyin manna nom aneije, ajole hinthah vah kit paitante ti lhonin, ati.

⁴Amani ache lhonin ahile, khopi sung lam lena inpoa kotphunga sangan nou kihen khat amu lhonin, hichu asut lhonin ahi.

⁵Chukoma dingho kimkhatnin, Ibola sangan nou chu nasut lhon ham? ati.

⁶Chuin amanin Jesu'n ahilna lhon bangin amaho jah-a asei lhonin ahile, ahinlha taovin ahi.

⁷Amanin sangan nou chu Jesu henga ahinkai lhonin, chuin aponu achunga aphaovin, achunga Ama atouvin;

⁸Chuin mi tamtah-in lampia aponu aphaovin, abangin loulaija theoboh asatnun aphaovin ahi.

⁹ Chuin amasa chengsele anungjui chengsen, Hosanna; Pakai mina hungpa chu anunnome;

¹⁰I-pau David lenggam hung lhung ding chu anunnome; Chungnung pena Hosanna, tin asam asamun ahi.

¹¹Chuin Jesu Jerusalem khopi-a houin'a chun agalutnin; chuin ijakai avetle soh phatnin, nilhah lam jong ahitan apotnin somleni ho chutoh Bethany'a achetan ahi.

¹²Chuin ajingin, Bethany'a kona ahung potdohle agil akeltan;

¹³Chuin gamlatah-a hin theichang donei amun, aga kamu khatle tin achele ado tailou ima agamu tapoi; ijeh-inem itile theichang chu aga phat mong jong hilou ahi.

¹⁴Chuin Jesu'n thingphung jah-a chun, Tukallin a-imatih chanin koiman naga ne hihhen, ati. Chutia ati chu aseijuiten ajauvin ahi.

¹⁵Chuin Jerusalem ahung lhunun, Jesu houin'a alutnin, houin sunga thil johho le thil choho anodoh panin, chule sum lhengho dokhangle vakhu johho touna chu alekhup peh-in;

¹⁶Chule houin sunga chun koiman thilkeo apohle ding aja nomtapoi.

¹⁷ Chuin ajah uva, Ka-in chu namtin dinga taona in kiti ding ahi, tia kisun hilouham? Ahin nanghon gucha michom kokhuh-in nasemtaove, tin aseitan ahi.

¹⁸Chuin thempu pipuiho le danthu sunhon hichu ajauvin ahile Ama suhmangna dingje chu aholtauve; ijeh-inem itile mipin athuhil chu kidang asah cheh jeh-u chun, Ama chu akichauvin ahi.

¹⁹Chuin nilhah ahi phatnin, khopi sunga konin apotdohtan ahi.

²⁰Chuin jingkah-in ahopauvin ahile, theichang phung chu ajung geija ana goptah chu amuvin ahi.

²¹Chuin Peter'in ageldoh-in, ajah-a, Vetan, Rabbi, theichang phung nagaosap chu agopjoutai, ati.

²²Chuin Jesu'n adonbutnin, ajah-a, Pathen tahsanun.

²³ Tahbeh-a kasei ahi, Koi hile hiche molsang jah-a, Kichondoh inlang twikhanglen'a kilehluttan tia; chule alunga tahsan lelna beihela, atiti hijeng ding ahi tia tahsan chu, atiti hi thei ding ahi.

²⁴Hiche jeh-a chu kati ahi, nataova thil nathum chanu chu namusan ngaitoleu chun namu dingu ahi.

²⁵ Chule atao dinga nadin petle, van'a na-Pau jongin nasuhkhelnao angaidam theinan, koi itobang hijongle nalungdou chu ngaidamun.

²⁶Nanghon mi suhkhel nangaidam lou vangule, van'a na-Pau vin nangho suhkhel jong angaidam lou ding ahi, ati.

²⁷Chuin Jerusalem'a ahung kitnun; chuin Houin sunga avahlelen ahile thempu pipuiho le danthu sunho chule upaho ahenga ahungun;

²⁸Chule amaho chun, Ipi thunei na-a hitiho hi nabolham? Hiti bol dinga hiche thuneina nape-a koiham? atiuvin ahi.

²⁹Ahin Jesu'n ajah uva, Keiman nangho thu khat donging kate, neidonbut un; chule keiman ipi thuneija hicheng kabol ahi seipehnao vinge.

³⁰John baptize bol chu van'a konha, ole mihem'a konham? Neidonbut un, ati.

³¹Chuin amaho akingai touvin, Van'a kon ahi tileuhenla chuti ahile, Ibola ama natahsan lou uham? tintin;

³²Mihem'a kon ahi tileu henla; mi jousen John chu themgao tahbeh-a angaito cheh ahi jeh chun, mipi chu akichauvin ahi.

³³Chuti chun amahon Jesu chu adonbutnun, Kaseithei pouve, atiuvin ahi. Hichun Jesu'n adonbutnin, ajah uva, Achutile ipi thuneija hicheng kabol ahi, keiman jong seipeh deh pouvinge, ati.