Read Thado Chin Mark 12 Bible Online

Mark 12 - Thado Chin bible

Mark 12

¹ Chuin Aman ajah uva thulemin thu aseipanin, Mikhatnin lengpilei abolin, palin aumkimvelin, lengpiga chil lhahna pum alaijin, insang asan, chuin aleilhouho khutna apedoh-in, migam danga achemang tai.

²Chuin aga lhun phatnin, ama chanding aga chu la dingin aleilhouho henga asoh khat asolin ahi.

³Hichun alei lhouhon amapa chu amanun, avovin, agoh-in akilesah taovin ahi.

⁴Chuin aman asoh chomkhat asol kitnin ahile, ama chu songin asepmun, alu anamavo uvin, chule jachat umtah-in abolun asolmang taove.

⁵Chuin achomkhat asol kitleuvin ahile, ama chu anathatnun, chule adang tamtah jong abang avovin, abang athatnun ahi.

⁶Aman chapa deitah khat anei nalaijin, anunung penin, Kachapa hi anajabolunte, tin ama chu asoltai.

⁷Ahinla chuche leilhouho chu akihoutoh-un, Ama hi agou lo ding chu ahi, khaije that uhite, chutile agou lo ding eiho ichan dingu ahi, atiuvin ahi.

⁸Chuin amanun athatnun, chuin lengpilei polama alehdoh taovin ahi.

⁹Lengpilei neipa chun i-alo tadem? Ama hungintin aleilhouho chu sugamintin, lengpilei chu midang apeh ding ahi.

¹⁰ Hiche Pathen lekhabua thuhi nasimkhah hih-um; In sahon adeimoa apaiju song chu Aninga songpipenin apangtai;

¹¹Hiche hi Pakai thilbol ahin, Chule imitmuvin akidang lheh jenge, ati.

¹²Chuin chuche thulem asei chu amaho gotna-a asei ahi ti aheuvin, ahinla mipi chu akichauvin ahi; chuin Ama adalhauvin achemang taove.

¹³Hichun athuseija kon man dingin, Pharisai ho phabep le Herod loi phabep ahenga asolun ahi.

¹⁴Chuin amaho chu ahengah ahungun, ajah-a, Houhil, nangma mi dihtah nahin, koima gin naneipoi; nangman mimai navepon, dihtah-a Pathen lampi chu nahile ti kaheuve: Caesar kai kapeh-u hi dan ngai hina, hilouham?

¹⁵Kapeh dinguha, kapehlou dinguham? atiuve. Amanla aphatlhem bolu chu ahen, adonbutnin, Ibola neilung lah-uham? Denarius khat hinchoijun, neivet sah-un, ati.

¹⁶Chuin ahinchoijun ahile Aman ajah uva, Hiche hi koilim le koimin ham? ati. Amahon, Caesar'a ahi, atiuvin ahi.

¹⁷Chuin Jesu'n ajah uva, Caesar'a chu Caesar peuvinlang, Pathen'a chu Pathen petangu, ati. Hiphat chun amahon adatmo lheh jengun ahi.

¹⁸ Chuin Saddukai ho, Mithi thokitna aumpoi tiho chu ahenga ahungun, ajah-a thudoh aneijun,

¹⁹ Houhil, koi hile sopinei khattouvin cha nei louva aji athisana ahile, asopipa chun ajinu chu jin neihenlang, asopipa ding chun chi khaipehhen, tia Mosi'n lekha eisutpeh-u ahi.

²⁰Ucha pasal sagite khat aumun: amasapenpa chun ji aneijin chikhai louvin athitan ahi.

²¹Abanapan amanu chu jin aneijin, chikhai louman athin, athumnapa jong chutima chu ahi.

²²Chutichun pasal sagi chun jin aneijun, chikhai lou ahitaovin; akhonna-in anumeinu chu athitai.

²³Ahile thokitna-a amanu chu alah uva koipen ji hitantem? Ijeh-inem itile asagiuva amanu chu ji-a anei sohkeiju ahi, atiuve.

²⁴Jesu'n amaho adonbutnin, ajah uva, Pathen lekhabu thu le Pathen thahatna nahetjoh sangu aum lou jeh-a nakheljiu hilouham?

²⁵Ajehchu mithiho athia kona athodoh tengule akicheng tapouvin, chen jong akichensah tapouve; ahin van'a vantilte tobang ahiuve.

²⁶ Mithiho kaithouvin aumui ti thudola, Pathen'in, Keima Abraham Pathen, Isaac Pathen, Jacob Pathen kahi tia hamboh lah-a kona Mosi akihoupi chu Mosi lekhabua simkha lou nahiuvem?

²⁷Ama athiho Pathen hilouvin, ahingho Pathen ahijo bouve; hakhela nakhelu ahi, ati.

²⁸ Chuin danthu sunho khatnin akinelnao chu ahung jan, chule Jesu'n amaho kichehtah-a adonbut chu ahen, Thupeh jouse lah-a hoipen hi thupipen ham? tin adongin ahi.

²⁹ Jesu'n adonbutnin, Apipen chu hiche ahi, Vo Israel chateho, ngaijun, Pakai i-Pathen'u chu Pakai khatsehbou ahi.

³⁰Nangman nalung pumpin, nalhagao pumpin, nalungthim pumpin, chule nathaneina apumpin, Pakai na-Pathen chu ngailun. Hichehi thupeh masapen ahi.

³¹ Anina hiche hi ahi, Nangma naki ngailut bangin naheng nakom ngailun. Hiteni sanga thupeh lenjo aumpoi, ati.

³² Chuin danthu sunpa chun, Houhil, nasei dih tangeije, nangman thutah nasei ahi: Ajehchu ama khatsehbou ahi, ama ti lou adang aumpoi.

³³ Chule, Ama chu lung pumpi-a, hetna pumpi-a, hinna pumpi-a, thanei pumpi-a ngailut ding, chule eima ikingailut banga iheng ikom te ngailut chu pumgo thilto le ganlhaina jouse sanga gamchenga phajo ahi, ati.

³⁴Danthu sunpan hechentah-a adonbut ajah phatnin Jesu'n, Nangma Pathen lenggam toh nakilatpoi, ati. Chukal chun koiman thu adong ngamtapoi.

³⁵Chuin Houin sunga athuhil petnin, Jesu'n adonbut-in, Danthu sunhon Christa chu David chapa ahi atiu hi itidana aseiju ham?

³⁶ Ajeh chu Lhagao Thengin ahila konin David ama tah-in, Pakaiyin ka Pakai jah-a, Keiman namelmate chengse nakeng chotpha-a kaneisah masangsen, Kajet lamah tou jingin, tin aseije.

³⁷David amatah-in Pakai asah-in, achutile achapa iti hi thei dingham? ati. Milhamho chun Jesu thusei chu thanom tah-in angaijun ahi.

³⁸Chuin Aman athuhilna-a chun ajah uva, Sangkhol choltah kiah-a kholai len noma, chule kailhanga min chibai aboh ding deiho,

³⁹Kikhopna in le golvahna-a touna pipen deiho,

⁴⁰Chule meithaiho in bahgama, chule alhema sot tahtah taojia danthu sunho-a konin kihongphauvin; amaho chu themmo chungnung changding ahiuve, ati.

⁴¹Chuin Jesu'n sumdolna bom jona atouvin, mipin sumdolna boma sum alelut chu aven ahile, mihao tamtah-in tamtah aleh lutnun ahi.

⁴²Chuin meithai vaichatah khat ahungin, sumsan nongsi pehni aleh lutnin ahi, hichu paisa khattoh kikot ahi.

⁴³Chuin seijuite akouvin ajah uva, Tahbeh-a kasei ahi, Hiche meithai vaichanu hin adang jouse sangin sumdolna-a atam lelutpen'e.

⁴⁴Ijeh-inem itile adangho jouse chun aneival atou ahin, amanu vang hin aneichasun ahinpi chengse alelut jeng ahi, ati.