Read Thado Chin Mark 13 Bible Online

Mark 13 - Thado Chin bible

Mark 13

¹Chuin Houin'a kona apotdoh-in aseijuite khatnin ajah-a, Houhil, vetan, asongho itobang song hija chule in kisah ho hi itobanga kisalul hitam, ati.

²Jesu'n ajah-a, Nangman hiche in loupitah hi namu-em? Hikoma hi song suhchim louva khat chunga khat kisethop himhim umlou helding ahi, ati.

³Chuin Pathen Houin jontah Olivet molsanga chun atouvin ahile Peter, Jacob, John, Andrew teho chun atumbeh-in ajah-a,

⁴Hicheng chu itihle hi dingham? Chule hitiho chu ahung guilhun phat ding chu amelchihna ipi hintem? Neisei peh-un tin adong lhiuvin ahi.

⁵Chuin Jesu'n adonbutnin hitin aseije, Koiman nangho nalheplhah louna dingun kichih theijun.

⁶Mi tamtah keima minin hunguntin, Keima Christa kahi tiuvintin, mi tamtah alheplhah dingu ahi.

⁷Chule nanghon gal kisatle kidou thuthang najah tengule, lungdong hih-un; hicheng chu hung soh tei ding ahi; ahivangin achaina hiloulai ding ahi.

⁸Ijeh-inem itile vai khatle vai khat, gam khatle gam khat hung kidouvintin, mun chom mun choma ling hung kihot intin, kel hunglha-a gentheina hung lhung ding ahi; hicheng chu hahsatna kipatna ahi.

⁹ Amavang kichih theijun; ajehchu vaihom upate khutna pehdoh-a nahung umdingu, kikhopna in'a nakivo dingu, chule keima mina vaipoho le lengho anga amaho douna-a hettohsah dinga nahung din dingu ahinalaije.

¹⁰Kipana Thupha hi namtin vaipi lah-a hillhanga um masa tei ding ahi.

¹¹Chule nakaijuva napehdoh tengule, ipi iti kasei dingham tin amasangin lungkham hih-un; ahin aphattahle nakipeh chanu chu seibouvun; ijeh inem itile aseija chu nangho hilouvin, Lhagao Theng joh ahi.

¹²Chule asopin asopi, pan acha tha dinga ahinpehdoh ding; chate kipatdoh uva anule apa adoudiu, amaho chu ahin thasah dingu ahi.

¹³ Chule keima min jala nangho mi jouse hotna nahung umdingu ahi; ahinla akhon ni geija thoh lhumkeija pangdetpabou chu huhhing-a umding ahi.

¹⁴ Amavang themgao Daniel seibangin, misumang thet umtah chu adinna dol louva adin namu tengule (asim siman hehen), chutengle Judah gama um chengse thinglhang lamah jamuhen:

¹⁵ In chunga uma jong hung kumlha hihhen, athilkeo kilah dingin in sunga lut hihhen:

¹⁶Loujaova uma jong apon kilah dingin kilekit dahen.

¹⁷Ahin ohe, hiche lai chule agaija le naonoi chepsahho ada nadinguve!

¹⁸Chule najam nadingu phat chu phalbi ahi louna dingin taovun.

¹⁹ Chuche nikho chu hesoh gentheina nikho hi ding ahi, chutobanga hesohna nasatah chu Pathen'in lei asema patnin tu geijin aumkha hihlaije, chule um jong umlou ding ahi.

²⁰Chule Pakaiyin chuche nikho chu asuhchom lou hileh, mihem himhim asohcha umlou ding ahi; ahivangin alhendohsa alhen chomte jala anikho chu asuhchom ahitai.

²¹Chutengle najah uva khattouvin, Ven, hikomah Christa aume, atia; ahiloule, Ven, khukoma aume, atile tahsan hih-un.

²²Ijeh-inem itile Christa lhemho le themgao lhemho hung sohdoh untin, melchihna le mu kidang dang ahin vetsah dingu; ahitheile lhenchomte jeng jong ahinlheplhah dingu ahi.

²³Nangho vang kichihtheijun; veuvin, ijakai kahil masah dem nahitaove.

²⁴ Ahivangin chucheng nikholai, hesoh genthei joule, nisa thimintin, chule lha jong vahta lou ding,

²⁵ vanlaijola konin ahsi ho hung pullhantin, chule van'a hatnaho chengse kihot lingsoh ding ahi.

²⁶ Chutahle vanlaijola Mihem Chapa thunei Chungnung tah le loupitah-a meibola ahung amu dingu ahi.

²⁷Chutah chule aman vantil ho asola, leiset monga pat van mong geija kolkimvel li-a kona alhen chomte alon khom ding ahi.

²⁸Theichang phung hin thulem kihilun; abah adona ajih akilhap tengle nipi anaitai ti naheuve.

²⁹Chutobang chun nangho jong hicheng chu aguilhun namu tengule, anaitai, kotbul hung geija ahitai, ti heuvin.

³⁰Tahbeh-a kaseipeh nahiuve, Hichengse chu aboncha aguilhun masangse-a, hiche tulai khanga mite hi mang lou ding ahi.

³¹Vanle lei mang ding ahin, keima thu vang mang lou ding ahi.

³² Ahivangin Pa tailou van'a vantilte jong, Chapa jong, koimachan anikhole ani dantah chu ahepoi.

³³Chingtheijun, kiging jingin umunlang tao jingun: ijeh inem itile aphat chu itih ahi ding nahepouve.

³⁴ Ajehchu mihem Chapa hi mi khat asohte thuneina pedoh, abonchauva atoh ding cheh-u pe-a, chule kotngah kiging jinga umdinga thu apeh nunga, a-in dalha-a migam danga chemanga tobang ahi.

³⁵Hiche jeh chun kiging jingin umun, ijeh-inem itile inneipu chu itih-a ahung ding nahepouve, nilhah lam ahim, jan khangkim ahim, ahkhonphat ahim, jingkah ahim, ahung ding phat nahepouve.

³⁶Hetman louvin hungjeng tale na-imut petnu hungtoh khante.

³⁷Nangho jah-a kasei hi mi jouse jah-a kasei ahi, Kiging jingin umun, ati.