Read Thado Chin Mark 14 Bible Online

Mark 14 - Thado Chin bible

Mark 14

¹ Chuin nini jou chun kalchuh kut le cholsolou changlhah kut hiding ahin; thempu pipuiho le danthu sunhon iti doha-a bola matna, chule tha dingham tin ahol aholun ahi.

²Ahin amahon, Kut kiman sung hidahen, achutiloule mipi lah-a thunoh umget inte, atiuvin ahi.

³ Chuin Bethany'a Simon miphahpa in'a aman ankong aumpetnin, numei khatnin songval bomin nard thao namtui theng mantam tah ahinchoijin, abom chu asukeh-in alua abunglhan ahi.

⁴Ahin alah uva akimkhat chu alungphamo uvin, Ibola thao hitia amoh suhmang jeng hitam?

⁵Ijeh-inem itile hiche thao hi kijoh henlang hile dangka jale somnga kikhong dinga, chutile asum chu mivaicha gentheiho peh thei ahi, atiuvin; chule numeinu chu aphoh taovin ahi.

⁶Ahin Jesu'n amaho jah-a, Amanu chu limsah hih-un; amanu chu ibola nasuh lunggim uham? Amanu hin keima dinga thil phatah abol ahi.

⁷ Ijeh-inem itile mivaicha gentheite nakom uva aum jingnauve, nagotlai chanua nanghon nahu thei dingu ahi; keima vang nangho koma umjing ding kahipoi.

⁸Amanu hin aboltheichan abol ahi; kalong hi vuidinga chu eihung nu masah ahi.

⁹Ahin keiman nangho tahbeh-a kaseipeh nahiuve, Vannoi leiset gam pumpi-a Kipana Thupha kihil lhangna chana, hiche numeinu thilbol jong hi amanu het jingna-a kiseipeh dinga ahi, ati.

¹⁰Chuin Judas Iscariot, somleni lah-a mi khat chun, Jesu chu amaho amatsah theinan thempu pipuiho henga agachen ahi.

¹¹Chuin amahon hichu ajah phatnun akipah-un, ama chu sumpeh dingin ateptaovin ahi. Chuin aman Ama chu pehdoh-a matsah theina agomkom aholtan ahi.

¹²Chule cholsolou changlhah kut kipatni, kalchuh kut kelngoi atha niuvin, aseijuiten ajah-a, Kalchuh kut naneh theina dinga hoikoma gagoleu veng nalungham? atiuvin ahi.

¹³Chuin Aman aseijuite mi ni asolin, ajah lhona, Khopi sunga khun che lut lhonin, chule twibel pu-a mi khat nato lhon ding ahin; ama chu jui lhonin.

¹⁴Chule alutna in'a inneipa jah-a chun, Houhilin, kaseijuite toh kalchuh kut kanehna ding kajin indan chu hoilaiham? ati, gati lhonin.

¹⁵Chule amatah-in indan chungnung lentah gotsademle phasadem khat navetsah lhon ding ahi; hikoma chun ineh dingun anago lhontan, ati.

¹⁶Chuin seijui teni chu akipatdoh lhonin, khopi sunga alut lhonin, ajahlhona aseibang bang chun agatoh lhonin: kalchuh kut chu agago lhontan ahi.

¹⁷Chuin nilhah ahi phatnin somleni ho chutoh ahungtai.

¹⁸ Chuin atou uva an aneh laitah-un, Jesu'n ajah uva, Tahbeh-a kasei ahi, Nalah uva kaneh khompi mikhat hin eipehdoh-a eimatsah ding ahi, ati.

¹⁹Chuin alungkham pantaovin, khat khatnin, Kei kahim? tin aban banin adong taovin ahi.

²⁰Chuin Aman amaho chu adonbutnin, Lhenga kasokhompi, Somleni lah-a mi khat ahi.

²¹Mihem Chapa achonchan ding thu kisun bangtah-a chu cheding mong ahi; ahivangin Mihem Chapa pedoh-a matsah dingpa chu ohe, adana-e! Ama chu apena peng lou hile ama dinga phajo ding ahi, ati.

²²Chuin an aneh laitah-un, Jesu'n changlhah alan, phatthei aboh jouvin ahehbal balin amaho chu apen, ajah uva, Kilah-un, neuvin; hiche hi katahsa ahi, ati.

²³Chuin khon alan athangvah jouvin amaho chu apen, chutichun abonchauvin adon sohkei taovin ahi.

²⁴ Chuin Aman ajah uva, Hiche hi mi tamtah dinga kisodoh kitepna thah kathisan ahi.

²⁵Tahbeh-a kaseipeh nahiuve, Keiman Pathen lenggam sunga athah kadon ni ahung lhun kahse-a, lengpiga twi hi kadon lou ding ahitai, ati.

²⁶Chuin amahon la asah jouvun, apotdoh-un Olivet molsang lama ache taovin ahi.

²⁷ Chuin Jesu'n ajah uva, Nangho nabon chaova tujana keima jeh-a lungthoi sohkei ding nahiuve: ijeh-inem itile, Keiman kelngoi chingpa kavoh lhuh ding ahi, chutengle akelngoite chu jamcheh gamding ahi, tin akisune.

²⁸ Ahivangin kathodoh nungle Galilee gam lama namasang sang uva kache ding ahi, ati.

²⁹Ahin Peter'in ajah-a, Abonchauvin lungthoi jongleu, keivang lungthoi pong kate, ati.

³⁰Chuin Jesu'n ajah-a, Tahbeh-a kaseipeh nahi, Nangman tuni, tujan mama-a hi ahchal nivei akhon kah-a thumvei neiseilep ding ahi, ati.

³¹Peter vang chun, Nangma toh thitha tei ding mong hijongleng, keiman nangma seilep hihhel ing kate, atichang melin ahi. Chule adangho jouse jongchun achuti sei cheh-un ahi.

³²Chuin Getsemane atiu mun'a chun ahungun, chuin Aman aseijuite jah-a, Keima katao sungsen nangho hikoma hin anatou jingun, ati.

³³Chuin Peter le Jacob, chule John hicheng chu apuijin, chuin alung hesoh behseh jengin, halung hemin alunghem pantan ahi.

³⁴Chuin amaho jah-a, Thina khophelin kalung ahesoh behseh jengtai: hikoma hin umunlang kiging jingun, ati.

³⁵Chuin amasang lama phabep khat achechonin, tolah akhupbon alhun, ahitheile hiche phat chu ama-a kona akitolmang theina dingin ataovin,

³⁶Abba, ka Pa, nangma dinga ijakai hithei sohkei ahi; hiche khon hi kakoma konin chon mangin: ahivangin keima thu hilouvin, nangma thu thu hijohen, ati.

³⁷Chuin ahungleh khatteho chu a-imut lhuh-u ahungtoh-in, Peter jah-a, Simon, na-imut hitam? Nidan khat jeng jong kiginga um jou lou nahim?

³⁸Lhepna-a nalhah louna dingun kigingun, taovun. Lhagao vangin ago tahbeh nan, ahin tahsa hi alhasamin ahi, ati.

³⁹Chuin achemang kitnin, ataovin, aseingai bangman aseijin ahi.

⁴⁰Chuin ahung kitnin ahile, amaho chu ana-imutlhuh-u ahungtoh kitnin, a-imutso behseh jeh-un, adonbutje ahe tapouve.

⁴¹Chuin thumvei channa-a ahungin, ajah uva, Tun imuvinlang kitha ol taovin: aphasettai, phat alhingtai; Veuvin, Mihem Chapa hi michonse te khutna kipedoh ahitai.

⁴²Kipat un, chetao hite; veuvin, eipedohpa ahung naitai, ati.

⁴³Chuin hichu aseina laijin, somleni lah-a Judas chu thempu pipuiho, danthu sunho, chule upate koma kona chemjamle moltum toh hintho-a hungkonho mihonpi chutoh ahung kilhonin ahung paitan ahi.

⁴⁴Ama pedoh-a pangpa chun melchihna ahilmasan, Kachop penpen chu ama ahi; man unlang kitup keichan puimang taovin, ati ahi.

⁴⁵Chuin ahung lhun lhunin, ama ajonpai jenin, Rabbi, Rabbi, atin, achop tan ahi.

⁴⁶Chuin amahon akhut alhaovin amantaovin ahi.

⁴⁷Hichun akoma dingho khatnin achemjam asatdoh-in, thempu chungnung sohpa asatjengle, abilkol langkhat asatlhan ahi.

⁴⁸Chuin Jesu'n adonbutnin ajah uva, Gucha michom man dinga kon banga chemjamle moltum tho-a keima man dinga nahung kon uham?

⁴⁹ Niseh-in houin'ah i-um khomun thu kahiljin, chulaijinla neimanpouvin ahi: amavang Pathen lekhabua thu guilhun na-a hiti ahi, ati.

⁵⁰Chutah chun aloi chengsen ama adalhauvin, ajamgam taovin ahi.

⁵¹Gollhang khat vangin asagoh keo chunga chu tupatpon akisila ama chu ajui ahin; khangdongho chun amanun ahile;

⁵²Aman aponsil chu adalhan, asagoh keovin amaho-a konin ajam mangtai.

⁵³Chuin Jesu chu thempu chungnung hengah akaijun; chule ama chutoh thempu pipui chengsele, vaipo upaho, chule danthu sunho ahung kikhomun ahi.

⁵⁴Peter'in galkanga ajuipeh-in, thempu chungnung inpi leitol sungnung geijin ajui lutpeh-in, chuachun sottolho lah-a atouvin mei a-oijin ahi.

⁵⁵Chuin thempu pipuiho leh houvaipoloi chengsen Jesu chu tha theina ding achungah ahehsetnan hettohsah aholun; amu joupouvin ahi.

⁵⁶Ajehchu mi tamtah-in jouthun ahehseuvin, ahivangin aseiju akitoh pon ahi.

⁵⁷Chuin mi phabep khat akipat doh-un, jouthun ahehseuvin,

⁵⁸ Ama hin hiche khutna kisa houin theng hi suseng ting, nithum sungin khutna sahlou achomkhat kasahdoh kitding ahi, ati kajaove, atiuvin ahi.

⁵⁹Ahivangin hiche ahehset naova jongchun akitoh kit pouvin ahi.

⁶⁰Chuphatnin thempu chungnung chu alah uva adingdoh-in, Jesu chu adongin, Nadonbut lou dingham? Hitehon nahehsetna-a thu aseiju hi ipiham? ati.

⁶¹Ahivangin Aman donbut louhelin thipbeh-in aumin ahi. Thempu chungnung chun adong kitnin, ajah-a, Nangma Nunnom Chapa, Christa chu nahim? ati.

⁶² Chuin Jesu'n, Kahi: chule nanghon Mihem Chapa hi Thilbolthei jet lama atou le van meilah-a ahung namu dingu ahinalaije, ati.

⁶³Chuphatnin thempu chungnung chun apon abot eh-in, Thu hettohsah dang iding iti tah dinguham?

⁶⁴ Pathen ataitomna chu najataovin ahi; nanghon iti nagel uvem? ati. Chuphatnin abonchauvin athina theijin athemosah taovin ahi.

⁶⁵Chuin abangin achil aset khumun, chule amai atomun, achumun, ajah-a, Gaovinlang seijin, atiuvin; chule sottolleho chun akhut phanguva angeiphe abengun ahi.

⁶⁶Chuin Peter noilama leitola aum petnin, thempu chungnung sohnuho khat ahungin;

⁶⁷Peter'in mei ana-oi chu amuphatnin, amanu chun aven, ajah-a, Nang jong Nazareth Jesu toh kiloi nahi, ati.

⁶⁸Ahinla aman aseilepmin, Kahepoi, chule ipi nasei ahijong kahepoi, atitai. Chuin tol maijah apotdoh-in ahile ahchal akhongtai.

⁶⁹Chuin soh numei khatnin amun, akoma dingho jah-a chun, Hichepa hi amaho lah-a khat ahi, ati kittan ahi.

⁷⁰Aniveina in aseilep kittan ahi. Chujou phabepin akoma dingho chun Peter jah-a, Amaho lah-a khat mong mong nahi; ijeh-inem itile nangma Galilee mi nahi hi nathuseijin aphongdoh-e, atiuve.

⁷¹Ahivangin aman kigaosap le kihahsel athon, Keiman naseipao chu kahephapoi, atitai.

⁷²Chupettah chun aniveina-in ahchal akhongpaitan ahi. Chuphatnin, Jesu'n ahchal nivei akhon kah-a thumvei neiseilep ding ahi, atia ajah-a asei chu Peter'in ageldoh-in ahi. Chuin hichu ageldoh phatnin, akaptai.