Read Thado Chin Mark 15 Bible Online

Mark 15 - Thado Chin bible

Mark 15

¹Jingkah ahiphatnin thempu pipuiho, vaipo upaho, danthu sunho, chule houvaipoloi chengse akihoutoh paijun, Jesu chu akanun, akaijun Pilate khutna apedoh taovin ahi.

²Chuin Pilate'in, Nangma Juda te Lengpa nahim? tin adongin ahi. Chuin Aman adonbutnin ajah-a, Naseikhai, ati.

³Chuin thempu pipuihon thu tamtah-in ahehseuvin; ahin aman imachan adonbutpoi.

⁴Pilate'in adong kitnin, Nadonbut lou dingham? Ve tang, hijatna naheh-u hi, ati.

⁵Ahin Jesu'n adonbut hihhelin ahile Pilate'in adatmo lheh jengin ahi.

⁶Tun Kut sunga chu amahon athum penpen chu sohchang khat alhadohji angai ahi.

⁷Chuin mi khat amin Barabbas atiu, khosung chohnoh hotoh kihen khom, khosung achonohna lamuva tol atha khah ahi.

⁸Chutichun achonna ngaibang uva abolpehna dingun mipi chun hatah-in asamun angeh pantaovin ahi.

⁹Chuin Pilate'in adonbutnin, ajah uva, Juda te lengpa hi lhadohpehleng nalungu ham? ati.

¹⁰Ama chun thempu pipuihon thangset suma apehdoh-u ahi ti chu ahet ahi.

¹¹Ahivangin thempu pipuihon Barabbas chu alhadoh pehna dingu joh-in mipi chu atilseuvin ahi.

¹²Chuin Pilate'in ajah uva, Achutile Juda te Lengpa ahi natipao hi i-kalo dingba hitam? tin adong kittan ahi.

¹³Chuin amahon, Thingpel'a khenbeh-in, tin asam kit taovin ahi.

¹⁴Chuin Pilate'in ajah uva, Ibolinem? Ipi suhset aneijam? ati. Ahin amahon, Thingpel'a khenbeh tan, tin hasaptah-in asamuvin ahi.

¹⁵Chuphatnin Pilate'in mipi lunglhaina ding chu angaiton, Barabbas alhadohpeh-in, Jesu chu ajep jouvin thingpel'a khetbeh dingin apedohtan ahi.

¹⁶Chuin sepaihon ama chu Pretorium atiu inpi sunga chun apuilutnun, sepaiho jouse akoukhom sohkeijun ahi.

¹⁷Chuin Jesu chu ponsandup asilpeh-un, ling lukhuh aphanun, alu-a chun akhuhpeh-un ahi.

¹⁸Chuin, Vo Juda te Lengpa, tin chibai aboh pantaovin ahi.

¹⁹Chuin amaho chun peng tenggolin alu avo avovin, chule chil asetkhumun, chule adilsuvin chibai aboh-un ahi.

²⁰Chutia chu totnopna-a a-el ela abol jouvun, ponsandup chu ahoh lha uvin ama pon asilpeh-un, thingpel'a khetbeh dingin apuimang taovin ahi.

²¹ Chuin amahon kholjin hiche mun hinjotpa Cyrene gam mi Alexander le Rufus pa Simon chu acham louvin athingpel puding chun amanun ahi.

²²Chutichun Golgotha atiu mun'a chun apuitaove, hichu lugu mun [1] tina ahi.

²³Chuin myrrh toh kihal lengpi theitwi apeuvin, ahinla Ama anom pon ahi.

²⁴ Chuin thingpel'a akhenbeh jouvun, aponsil hochu abonchauva achan cheh nadingun vang aveovin, akihomtaove.

²⁵Jesu akhetbehnao chu nidan thum [2] don ahi.

²⁶Achunga chun ahehnau hetsahna, JUDA TE LENGPA tia kisun aumin ahi.

²⁷Chuin amatoh thakhatnin gucha michom mi ni, khat ajetlamah, khat aveilamah, thingpelah akhenbeh-un ahi.

²⁸ Hichun, Ama michonsehoto akisim thatai, tia Pathen lekhabun asei chu aguilhung tan ahi.

²⁹ Chuin achele, avahle jousen akhasuh khumun, ajah-a, Aha! Nang houin suse-a ni thuma sadohkit,

³⁰Nangma kihuh hingin lang thingpel'a kon chun hung kumlha tangem, atiuvin a-el elin ahouvun ahi.

³¹Chutobangma chun thempu pipuiho jong chun totnopnan abolun, danthu sunho chutoh, Aman midang ahuhhingjin Ama akihuhhing theipoi.

³²Kamuva katahsan theina dingun, Israelte Lengpa Christa chu tutah hin thingpel chunga konin hung kumlha temhen, atiuvin ahi. Chule amatoh thingpel'a kikhetbeh tha teni jong chun ama ahouse lhonin ahi.

³³Chuin nidan gup [3] tah-in gam jouse chunga thim ajingin, nidan ko [4] geijin mu athimtan ahi.

³⁴ Chuin nidan koh lhintah-in Jesu hapenin apengin, Eloi, Eloi lama sabachthani? ati. Hichu, ka Pathen, ka Pathen, ibola neidalhah hitam? tina ahi.

³⁵Chule avela dingho lah-a abang bangin chutia ati chu ajauvin, Ngaijun, Elijah akouve, atiuvin ahi.

³⁶ Chuphatnin mi khat alhaijelin lengpitwi thuh-a twichop phon adelhopmin pengtenggol leh-a atah-in, agah donsah-in, Limsah hih-un; adomlha dinga Elijah hunga hung hih-am veohite, ati.

³⁷Chuin Jesu chu hapenin apengin, alhagao alhatai.

³⁸ Chuin houin'a pondal len chu achunga pat anoi geijin a-ehlha paijin keh ni akisotan ahi.

³⁹Chuin Ama jona ding sepai jalamkai chun chutia apenna alhagao alha chu amutah-in, Hichepa hi Pathen Chapa tahbeh mong ahi, atitai.

⁴⁰ Chukoma chun galkanga pangin numei hon khatnin jong ave jingun ahi; alah uva chun Magdalene Mariam, Jacob neojo le Joses nu Mariam, chule Salome; hiteho cheng chu aumun ahi.

⁴¹Amaho cheng chu Galilee gama aumlaija ajuija ama jenlea pangho chu ahiuve. Chule numei tamtah Jerusalem'a ahinlhon toupiho jong chu ahiuve.

⁴²Nilhah ahi phatnin, kigot ni ahi jeh-in, hichu cholngahni masang ni ahin,

⁴³Arimathea kho-a mi Pathen lenggam ngah jinga um, vaipo ginle ja umtah Joseph chu ahungin, ngampelin Pilate henga achelutnin, Jesu long chu agathumtan ahi.

⁴⁴Pilate'in chutia athivah jeng chu adatmo lheh jengin; chuin aman sepai jalamkai chu akouvin, Athina sottam, tin adongin ahi.

⁴⁵Chuin sepai jalamkaija kona ahetchen phatnin, along chu Joseph apetai.

⁴⁶Chuin tupat ponnem ahin choijin, along chu alalhan, tupat ponnema chun atomin, song kilai lhan sunga chun alupsah-in, chujouvin lhan kotna chun song len khat atanglutnin ahi.

⁴⁷Chule Magdalene Mariam le Joses nu Mariam chun akoinau chu avejing lhonin ahi.