Read Thado Chin Mark 16 Bible Online

Mark 16 - Thado Chin bible

Mark 16

¹Chuin cholngah ni kichai phatnin Magdalene Mariam, Jacob nu Mariam, chule Salome hicheng chun ahunguva thao anu theina dingun, thao namtui ahin choijun ahi.

²Chuin hapta ni masa ni jingpitah-in niso jou jouvin lhan lama chun ahunguvin ahi.

³Chuin amahole amaho akihouvun, Lhankotna song chu kon eitahdoh peh taovinte? akitiuvin ahi.

⁴Ahinla agah vetnule song chu tahdohsa anaum amutaove; asong chu lentah hija ahi.

⁵Chuin lhan sunga alutnun ahile gollhang khat ponbangleh choltah kisila jetlam sanga tou amuvin; chuin amaho chu atija lheh jengun ahi.

⁶Ahivangin ama chun amaho jah-a, Tija hih-un; thingpel'a kithat Nazareth Jesu chu naholu ahi: ama athoudohtai; hikoma aumtapoi: alupna hi hung vetaovin.

⁷ Amavang cheovinlang aseijuite le Peter jah-a gaseijun, Aman najah uva aseibangin Galilee gam lamah namasanguva achei; chukom chu nanghon Ama namu dingu ahi, ati.

⁸Chutichun kidang satah-in akihot hot jengun; gangtah-in ahung potdoh-un, lhanphunga kon chun ajamtaove. Akichat jeh-un, koima jah-a aseipouvin ahi.

⁹Chuin hapta ni masapen ni jingpi-a athodoh jou chun, Magdalene Mariam, asunga kona thilha sagi anodohnu henga chun akilah masapenin ahi.

¹⁰Chuin amanu chun Jesu umpiji teho, ama thi jeh-a kapkaple kingaisese teho henga chun achen agaseijin ahi.

¹¹Ahin athoudoh-in, amanu chun amui ti ajah vanguvin atahsan pouvin ahi.

¹²Chujouvin Aman alah uva mi ni gamlam jona achena lhona limchom beh-in akimusah-in ahi.

¹³Chuin amani ache lhonin seijui dangho agahil lhonle, amahonla amani sei jong chu anatahsan dehpouvin ahi.

¹⁴Chuin chujou kitman ankong aum laitah-un, somlekhat ho hengtah-a akilah-in; athodoh kit nunga amuho thusei atahsan lou jeh-u chun, atahsan louvule alungtah-u chu asosalin ahi.

¹⁵ Chuin Aman ajah uva, Nangho vannoi leiset gam jouse-a cheovinlang, thilsem namkim jah-a hiche Kipana Thupha hi gahil lhang leuvin.

¹⁶Atahsana baptize chang chu sohcha ding ahi; atahsan lou vang chu themmo changa umding ahi.

¹⁷Chule atahsante chu melchihna hicheng hin ajuipeh dingu ahi; keima mina thilha anodoh dingu, paothah paothah-a pao dingu,

¹⁸Gul akhutna adop dingu; thina thei ima donjong leu ima ti lou dingu; chule ana damlou chunga akhut angap diu, ana chu dam ding ahi, ati.

¹⁹ Chuin Pakai Jesu'n ajah uva chucheng asei jouvin, van'ah lahtouvin aumin, Pathen jet lamah atoutai.

²⁰Chuin amaho achedoh-un, muntin-ah ahillhang leuvin, anatohna chanuvah Pakaiyin akitho piuvin, chule melchihna-in ajuisah-in athu chu aphut detpeh-in ahi. Amen.