Read Thado Chin Mark 2 Bible Online

Mark 2 - Thado Chin bible

Mark 2

¹Ni chomkhat jouvin Capernaum'a alut kitnin ahile, in'a aume ti akithang soh jengtan ahi.

²Hiche pettah chun mipi tamtah ahung khomun ahile, aumna dingu mun kotphung jeng jong a-ong tapon; aman amaho chu thu ahiltan ahi.

³Chuin langthi khat mi lin ajongun ahengah ahinpuijui.

⁴Chuin mipi jeh-a akom naija ahung lut theilou jeh-un, in chung chu Ama umna dontah aphet vangun, langthipa chu alupna pumin a-ang sungah agah khailha suh-un ahi.

⁵Chuin Jesu'n atahsanjeu chu amun, langthipa jah-a chun, Chapa, nachonset naho kingaidam ahitai, ati.

⁶Ahinla danthu sunho phabep khat hia chu tou ahiuvin, alungthim uva,

⁷Hichepa hin ibola Pathen taitom na-a hitobang thu aseiham? Pathen tailou chonset koiham angaidam thei ding? atiuve.

⁸Chuin achuti gelu chu Jesu'n alungin ahepai jenin, ajah uva, Ibola nalunguva hicheng chu nagelu ham?

⁹Langthipa jah-a hi, Nachonset naho kingaidama ahitai, kiti le; Thouvin, nalupna kilah-inlang lam jotnin, ti chu hoijoh seibai jo-em?

¹⁰Hijongle leiset chunga Mihem Chapan chonset ngaidamna thahat aneije ti nahetna dingun, atin,

¹¹Langthipa jah-a, Thouvin, nalupna kilah-in lang na-in'a chetan kati ahi, ati.

¹²Chuin ama chu athoudoh pai jengin, alupna akilah-in, japi mitmutah chun achedohtan; chuphatnin ajapiuvin kidang asa lheh jengun, Hitobang himhim kamukha pouve, atiuvin Pathen avahchoi taove.

¹³Chuin apotnin dillen pangah achekit tai; chuin mihonpi chu ahenga acheuvin ahile aman thu ahile.

¹⁴Chuin achena-a Alphaeus chapa Levi kaidonna mun'a atou amun, ajah-a, Kanung hinjuijin, ati. Chuin ama akipatdoh-in anung ajuitai.

¹⁵Chuti chun Levi in'a ankong aumpet chun, kaidongho le michonseho tamtah-in Jesu le aseijuiteho chengse chutoh ankong aum khomun ahi. Ijeh-inem itile amaho tamtah ahiuvin, ama nungjui cheh ahiuve.

¹⁶Chuin Pharisai ho le danthusun hon michonseho le kaidongho toh an aneh khom chu amu phatnun, aseijuite jah-a, Iti dana kaidongho le michonseho toh an aneh khomham? atiuvin ahi.

¹⁷Hichu Jesu'n ajah phatnin, ajah uva, atidamten louthem angaipouve, adamlouten bou angaijui; michonpha te kou-a hung kahipoi; lungheidia michonse te kou-a hungjoh kahibouve, ati.

¹⁸Chule John seijuite le Pharisai hon an angoljiu ahin; amaho ahungun Jesu jah-a, I-atile John seijuite le Pharisai hon an angol jiuva, nangma seijuiten an angolji louham? atiuve.

¹⁹Chuin Jesu'n amaho jah-a, Aloite chu moulang chun aumpi laise-a an angol thei ngaijum? Moulang chun aumpi laiseuva an angol thei louvu ahi.

²⁰Amavang moulang chu akomuva kona kipuimang ni hung lhung ding ahi, chuche nile an angol dingu ahi.

²¹Koiman pon sopnem loulai halin ponlui abeh ngaipoi; chuti bolle athahjoh chun alui chu akaiset ding, akehlai chu kehcheh joding ahi.

²²Chule koiman lengpitwi thah savun peng luija akhum ngaipoi; ichuti bolle alengpitwi chun asavun peng chu tumkeh intin, lengpitwi savun peng akopma mang ding ahi. Lengpitwi thah chu peng thah-a akhumji bouvui, ati.

²³ Chuin ahitin ahi, cholngah nin Jesu'n changlei lai ajotnin ahile, aseijuiten ache pumun changvui chu asih pantaovin ahi.

²⁴Chuin Pharisai hon ajah-a, Vetan, ibola cholngah ni-a bol ngailou aboluham? atiuvin ahi.

²⁵ Jesu'n adonbutnin, David le aloiho alhahsamuva, agilkel petnuva chu ipi abolu nasimkhah louvu ham?

²⁶ Abiathar thempu chungnung ahi laijin Pathen in'a alutnin, thempu tailou adangin aneh ngailou vetsahna changlhah chu anen, aloiho jong apen ahi.

²⁷Chuin Jesu'n ajah uva, Cholngah ni chu mihem dinga kisem ahi, cholngah ni dinga mihem kisemjoh ahipoi.

²⁸Chuti chu ahin Mihem Chapa chu cholngah ni Pakai jong ahi, ati.