Read Thado Chin Mark 4 Bible Online

Mark 4 - Thado Chin bible

Mark 4

¹ Chuin dillen pangah thu ahilpan kittan ahile mihon tamtah akomah ahung kikhomun, chuin dillen chunga kong-ah alutnin atouvin; chule mipi chengse chu vapamah tolah aumuvin ahi.

²Chule amaho chu thulemin thu tamtah ahilin, athuhil lah-a chun aseije,

³Ngaijun, muchi thepa muchi then achen:

⁴chuin ahitin ahi, athe atheleh abang lamsih-a achun, chunga leng vachaten ahung lohgam taove.

⁵Chule abang songlheo chunga leipatna-ah achun, alei asalou jeh-in akehdoh pai jengin:

⁶Ahivangin nisa ahung soh-in ahile asanggon, jung anei lou jeh-in, agoptan ahi.

⁷Chule abang ling lah-a achun, aling chu ahung khangin adeplihtan, aga himhim aumtapoi.

⁸Chuin adangho chu leipha laijah achun, akehdoh-in ahung khangin chule agatan; abang somthum cheng, abang somgup cheng, abang ja khat cheng apungtan ahi, ati.

⁹Chuin Aman ajah uva, Angaina ding na neijan ngaihen, ati.

¹⁰Chuin achanga aum petnin, akimvela umho le somleni chun athulem seiho chu adongun ahi.

¹¹Chuin Aman amaho jah-a, Pathen lenggam thuguh chu nangho kipe-a nahitaove; polama um mite jah dinga vang ijakai thulema kisei ahi.

¹² Chutia chu amahon muvang chu amudingu, ahetdoh lou dingu, jah vang chu ajah dingu, ahetkhen lou dingu ahi; achuti loule hung kihei kitnuntin, chule achonsetnao ngaidamin umgetninte, ati.

¹³Chuin Aman ajah uva, Nanghon hiche thulem hi nahet lou mongu ham? Achutile thulem dang jouse iti nahet dinguham?

¹⁴Muchi thepa chun thu athe ahi.

¹⁵Chule hicheho hi thu kithena lamsih-a chuho chu ahi; amahon thu ajah jah-un, Satan ahung paijin, alung sunguva thu kithe chu alah mang peh tan ahi.

¹⁶Chutobangma chun songlheo chung leipatna-a chua chu hicheho hi ahi; amaho chu thu ajah jah-a thanom tah-a joppai jengho hi ahi;

¹⁷Ahivangin amaho chu jung nei lou ahiuvin, chomcha khat aumjiuvin ahi: chujoule thu jeh-a hesohna ahiloule bolsetna ahung umtengle, alhupaiji taove.

¹⁸Chule hicheho hi linglah-a muchi kithe ho chu ahiuve; amaho chun thu ajauvin,

¹⁹Ahivangin leiset hinkho lungkhamna, lheplhahna dimset haosatna, chule ngaichatna dangdang alutnin, hichun thu chu adeplih jin, ga louvin aumjitai.

²⁰Chule lei pha laija chua chu; athu ja-a, jopteho chu ahiuvin, abang ajat som thumin, abang ajat som gupmin, chule abang ajat ja-in agapungin ahi, ati.

²¹ Chuin Aman ajah uva, meivah khu lo noi, ahiloule jalkhun noija tun dinga kihinchoi ngaijem? Akhom chunga tunding chu angaina hilouham?

²² Ijeh-inem itile kiphong lou ding imacha ki-ima aumpoi; kilangdoh lou ding imacha akiselguh aumpoi.

²³Koi hileh angaina ding na neijan ngaihen, ati.

²⁴ Chuin ajah uva, Najah chengseu hi ipiham, kichihtheijun. Nanghon natebang banguva nangho jong kitepeh ding nahiuve; chule nangho aja chengse hi kipehbe dingbon nahiuve.

²⁵ Ijeh-inem itile aneija chu kipehbentin; chule anei louva chu aneichasun jong chu ama-a kona kilahpeh ding ahi, ati.

²⁶Aman ajah uva, Pathen gam umchan chu, mikhatnin amuchi leija athe-a:

²⁷Amachu sunteng imuji, janteng thouji, muchi chu hung kehdoh-a hung khangdoh, amatah-inla ajeh ahetlou tobang chu ahi

²⁸Ijeh inem itile leisetnin achamin ama-a konin ahin ga sahjin, amasan akung, abanle ado, chujoule avui, chujou kitle avuija aga achanglhing jitai.

²⁹ Ahin aga chu amin phatle, a-at phat ahitah jeh-in, aman koiten a-atpan jitai, ati.

³⁰Chuin hitin asei kitne, Pathen gam hi ipitoh kitekah ding hitam? ahiloule ipi thulema kisei ding hitam?

³¹Ankam mu chang khat tobang ahi, hichu leija akithe-a ahile, vannoi leisetna muchi jouse lah-a aneopen ahin;

³²Ahivangin akithe joule ahung kedoh-a, hung khanga, hampa dang jouse sanga hung lenjo; abah len tahtah hinso-a, chutia chu chunga leng vachate aboh lim noija age theiju tobang ahi, ati.

³³Chuin chutobang thulem tamtah-in amahon ahetthei kham khamun thu ahilin ahi.

³⁴Chule thulem louvin ajah uva imacha aseikhapoi: ahin aseijuite chengse vang chu achanguva aumtengule ijakai ahilchen jin ahi.

³⁵Chuin nilhah-in Aman amaho jah-a, Agal lang khatna galkaiju hite, ati.

³⁶Chutichun mihonpi chu asoldoh jouvun, ama aum bang bang chun kong'a akitolpi taovin, kong dang dangto jong alhonun ahi.

³⁷Chuin khopihui ahung nungin ahile, twikinong chu kong sunga ahung kinong lut matchet jengtan, chuti ahi jeh chun kong chu dimpai ding ahitan ahi.

³⁸Amala kong mei lamah lukhap akhapmin a-imun ahi: chuin asukhangun, ajah-a, Rabbi, kathigam dingu hi na ima lou louham? atiuvin ahi.

³⁹Akhah phatnin huipi chu aphoh-in, dillen jah-a, Umthimin, thipbeh chan umin, ati. Chuin hui chu ahaijin, athip heltai.

⁴⁰Chuin Aman ajah uva, Ibola chuti kichat nahiuvem? Iti dana tahsanna himhim nanei louvu ham? ati.

⁴¹Chuphatnin Ama chu kichat mainan akichata pouvin, Hichepa hi itobang mi hija, huipi leh dillen kinong sanin athu angaiham? tin akihouchut chut taovin ahi.