Read Thado Chin Mark 5 Bible Online

Mark 5 - Thado Chin bible

Mark 5

¹Chutichun dillen gal langkhat agalkaijun, Garesene miho gama alhung taovin ahi.

²Chuin kong'a kona apotdoh doh-in, lhan lah-a kona hung lhagaoboh vop mikhatnin atoh paijenin ahi.

³Ama chu lhan lah jenga chu cheng ahin, koimachan thihkhaova jong akan joulou ahi;

⁴Ajehchu bul atuh jiuva, thihkhao vajong akanjiu ahin; ahivanga thihkhao chu asat tanjin, bul chu atumkehjin, koimachan abol ngoi jou louhel ahitai.

⁵Chule sunle jan-in lhan lah le molchunga aumjin, chule a-aole a-ao lejin, songin ama le ama aki-at chenjin ahi.

⁶Ahin gamlatah-a kona Jesu ahinmu phatnin, ahung lhaijelin a-anga aboh khupmin chibai aboh-in;

⁷Chuin hatah-in asamin, Pathen chungnung pen Chapa Jesu, nangle kei ipi ikimatna umam? Pathen mina nahenga katao ahi, neibolgim hih-in; ati.

⁸Ajehchu Aman ajah-a, Nangma lhagao boh, hiche mipa-a kon chun hung potdoh-in, ati ahi.

⁹Chuin Aman, Namin ipiham? tin adonge. Chuin aman, Tamtah kahi jeh-un kamin Janel ahi, ati.

¹⁰Chuin chuche gamkai sunga kona asoldoh louna dingun Jesu hengah hataovin ataotan ahi.

¹¹Tun akoma molsang panga chu vohcha hon tamtah lha-a ahi.

¹²Chuin lhagaoboh jouse chu ahenga ataovun, Vohcha hon lah-a kalut theina dingun neisolun, ati taove.

¹³Chuin Jesu'n phalna apetai. Chuin lhagao bohho chu apotdoh-un, vohchaho sunga chun alut taovin ahile, vohcha hon chu halhaijin alhaijun, kola alhai lhauvin, dillena chun alhalutnun, (voh honho chu sangni tobang hiuva ahin,) athigam taovin ahi.

¹⁴Chuin vohcha chingho chu ajamun, khopi sung le loujaovah agaseile taovin ahi. Chuin Ipi iti hitam, tia ve dingin ahungun ahi.

¹⁵Chuin Jesu kom ahung lhunun, thilha janel voppa chun pon akisila chule lung lima anatou chu amuvin, akicha lheh jengun ahi.

¹⁶Chuin thilha voppa le vohchaho umchan achen achaija mu-a hetohhon ajah uva aseijun ahi.

¹⁷Hichun amahon agam sunguva kona potdoh dingin ahenga atao pantaovin ahi.

¹⁸Chuin kong'a alut phatnin, masanga thilha voppa chun amatoh thakhatna umna dingin ataotai.

¹⁹Ahivangin Jesu'n ajahdan, ajah-a, Na-in'a chenlang na-in kote hengah Pakaiyin itobang thil loupi nabolpeh-a, iti nakhoto hitam abonchan gaseitan, atijotai.

²⁰Chuin akipat doh-in, Decapolis kho jouse-a Jesu'n thil lentah abolpeh chu lhang phongtah-in asamle pantai; chuin mi jousen kidang asa lheh jengun ahi.

²¹Chuin Jesu kong'a akitola agal lang khat pang akaidoh-in, mihon tamtah ahung kikhomum; ama dillen pangah aumin ahi.

²²Chuin kikhopna in'a vaipoho lah-a mi khat amin Jairus chu ahungin, Jesu amu phatnin akhomuh-ah aboh khupmin;

²³Chule ajah-a, Kachanu chapang neocha khat thi dingin alume; katao ahi, adamdoh nadingin hungin lang achunga nakhut hung ngamin tia katao ahi, tin hangeh-in angehtan ahi.

²⁴Chuin Jesu ama chutoh alhonin achetai, chule mihonpi nasatah-in ajuijun atom lellul jengun ahi.

²⁵Chuin numei khat kum somle kum ni athi longa damlou ahin,

²⁶Louthem tamtah-a kona thohgimna tamtah anatoh-a, anei jouse asuhmang ahitan, imala aphachom pon, ahin akhohcheh cheh jon ahi.

²⁷Amanun Jesu thudol ajah phatnin, anunga mihonpi lah-a chun ahungin, apon chu athamtan ahi.

²⁸Amanu chun, Apon jeng jong hi thamleng kadam ding ahi, ati ahi.

²⁹Chuin chupetah chun athiput chu akangin atangtan; chule amanun kanat thoh lela konin kadamtai ti chu ati chunga akihet tan ahi.

³⁰Chupettah chun Jesu'n ati chunga kona thilboltheina apot chu ahen, mipi lah-a chun akihei kimvelin, Kapon thama chu koiham? atin adong tan ahi.

³¹Chuin aseijuite chun ajah-a, Mipi hijatnin naneh chinto mu jinga, iti dana Koiham eithama, natiham? atiuve.

³²Chuin Aman chuche bola chu muleng tin avelelen ahi.

³³Ahin amanu chun achunga thilsoh chu ahen, akichasasan akihot pumpumin ahungin, a-angah aboh khupmin, ajah-a thutah jouse chu aseidoh tan ahi.

³⁴Chuin Aman ajah-a, Chanu, natahsanin nadamsah ahitai, lung mongin chenlang nanatna-a kon chun damtan, ati.

³⁵Aman hiche thu chu aseina laijin, kikhopna in vaihompa in'a kon chun mi ahungun, ajah-a, Nachanu athitai; ibola houhil hi nacholsah nahlai dingham? ahung ti.

³⁶Jesu'n thukisei chu ajah jah-in, kikhopna in vaihompa jah-a chun, kicha hih-in, tahsana bou neijin, ati.

³⁷Chuin Peter, Jacob, chule Jacob naopa John hicheng tailou chu, midang koiman ajui ding aphalpon ahi.

³⁸Chuin kikhopna in vaihompa in'a chun ahungun ahile, anaboi cheichoi jengu le mihonpi aka le maovu chu amun ahi.

³⁹Chuin Ama insunga alutnin, ajah uva, Ibola poh cheichoi nahiuva chule kapma nahiuvem? Chapangnu chu athi ahipoi, a-imu ahibouve, ati.

⁴⁰Chuin amahon anuisat taovin ahi. Ahivangin abonchauvin anodohsoh-in, chapangnu nule pa toh, chule ama hinkilhonpi chengse toh, chapangnu umna-a chun alutnun ahi.

⁴¹Chuin Aman chapangnu khut chu atuh-in, ajah-a, Talitha cumi, ati: hichu, boinu thouvin tina ahi.

⁴²Chupettah chun chapangnu chu ahung thouvin, adingin lam ajotpai jengin ahi; ajehchu amanu chu kum somle kum ni hia ahitai. Chutah chun amaho chun kidang mainan kidang asapouve.

⁴³Ahin Aman hiche thuhi koima hetsah hih-un tin thupeh khaotah aneijin; chule amanu chu neh ding an apehna diuvin thu apen ahi.