Read Thado Chin Mark 6 Bible Online

Mark 6 - Thado Chin bible

Mark 6

¹Chuin chua konin achedoh-in, Ama gam lamah ahungin; chule aseijuiten ajuijun ahi.

²Chuin cholngah ni ahung hi phatnin, kikhopna in'a thu ahil pantan ahi. Chuin athuhil chu mi tamtah ajaho chun kidang asauvin, Hichepa hin hoija kona hichengpi hi akilah hingana? Ama kipe-a chihna hi ipi chihna hija, akhutnin hitobang bolmo kidang dang abol jeng hitam?

³Ama hi thingthem bol Jacob, Joses, Juda chule Simon sopi, Mariam chapa chu hilou ham? Asopinute jong hikoma ilah uva um hilou hiuvam? atiuvin, chule achunga alung himo taovin ahi.

⁴ Ahivangin Jesu'n adonbutnin, ajah uva, Themgao ama gamsungle ama inkote lah, chule ama insung tailouvah jabol louvin aum ngaipoi, ati.

⁵Chukoma chun ana adamlou phabep khat chunga akhut angapma adamsah tailou chu, thil kidang imacha abol tapoi.

⁶Chule atahsan lou jeh-u chun adatmo lheh jengin ahi. Chuin khonainai dunga ache lelen thu ahil leletai.

⁷Chuin somleni ho chu akouvin, mini nin asoldoh-in; chule lhagaoboh chunga thuneina apen;

⁸ Chule ajin naova dingin tenggol tailou ima, changlhah jong, sakhao jong, dangka dip sunga jong sumthem aken louhel dingun thu apen;

⁹Kengchot vang kiseuvin; sangkhol thoni ki-ah hih-un, ati.

¹⁰Chuin ajah uva, Hoikom hijongle nalhun lhunnau in'a chun, chua kona napotdoh kahseuvin umun.

¹¹ Chule koi hile nalhunsah louvu le nathu seiju ngailou chu, chuche-a kona napotdoh tengule ahettohsah nan nakeng phanguva leivui sanin thinglhau vin. Keiman nangho jah-a tahbeh-a kasei ahi, thupi kitan nile chuche kho thohding sanga chu Sodom le Gomorrah gam thohding chu baijo ding ahi, ati.

¹²Chutichun akipat doh-un, mihem ten lung ahei nadiuvin ahil lhangle uvin;

¹³ Thilha tamtah anodoh-un, ana damlou tamtah thao anuvin, aboldamun ahi.

¹⁴ Chuin Herod lengpan athu chu ajatan, (Ijeh inem itile athu chu gamtina kithanga ahitai.) Chuin aman, John Baptist athia kona thoudoh kit ahi, chuche jeh-a chu chuti thil kidang boltheina chu ama-a uma abol ahi, ati.

¹⁵Akim khatnin, Elijah ahi, atiuvin; adangin, ama hi themgao khat, ahiloule, Themgaoho lah-a khat ahi, atiuve.

¹⁶Herod vang chun chuche thu chu ajah phatnin, Alol katansa John ngei chu ahi: ama athi lah-a kona thou kit ahi, ati.

¹⁷ Ijeh-inem itile Herod'in asopipa Philip jinu Herodias chu akichenpi ahin; amanu jala chu amatah-in mi asola John chu amatsah-a, akana songkul'a akhum ahi.

¹⁸Ijeh inem itile John'in Herod jah-a, Nasopipa jinu ji-a naneija nakichenpi hi dan ngai ahipoi, ati jeh ahi.

¹⁹Chuche jeh-a chu Herodias chun ama chu hahot tah-a ahotna, tha ding atup ahin; ahivanginla abol theipon ahi.

²⁰Ijeh-inem itile Herod chun John chu michondih tah le mithengtah ahi ti chu ahen, akichan, avenbit ahi; chule athuhil ajah teng alung dongjin, hinlah kipahtah-in angaijin ahi.

²¹Chuin nikho agomkom cha khat ahung umin, Herod'in apen nikho ahung hi phatnin agam vaihomte, sepai lamkaite, chule Galilee gama milen milal chengse vahnan golvah abolin ahi.

²²Chuin Herodias chanutah chu ahung lutnin alamin ahile, Herod le atoukhompi chengse chu alung lhaisah sohtan ahi; chuphatnin lengpan nungahnu jah-a chun, Nagotchan kahengah thumin peng kate, atitai.

²³Chuin akihahselin, Nathum chan kagamsung kehkhat geijin peng kate, ati.

²⁴Chuin amanu apotdoh-in anu agadongin, Ipipen kathum dingham? ati. Anun ajah-a, John Baptist luchang thumin, ati.

²⁵Chuphatnin amanu mangang tah-in lengpa hengah ahungloijin, John Baptist luchang tutah-in kong khatnin neipele chun kati, tin athumtai.

²⁶Chuin lengpa alunggimta lheh jengin, ahivanginla athuteple akihahselna, chule a-ankong umpiho jal chun amanu athutepsa chu asukeh nom pon ahi.

²⁷Chupettah chun lengpa chun ama ngah sepai khat John luchang la dingin asoltai. Chuin ama achen, songkul sunga alol agatan dentan ahi.

²⁸Chuin aluchang chu kong khatnin ahindomin nungahnu chu apen, amanun anu agapetai.

²⁹Chuin aseijuiten ajah phatnun, ahungun along chu ahung lauvin, lhana avuitaove.

³⁰Chuin solchah ho Jesu henga ahung kikhomun, athilbol jouseule ami hilu umchan jouse aseijun ahi.

³¹Chuin Aman ajah uva, Nangho chang hungdoh-unlang, munthip mah chomkhat hung kicholngah-un, ati; ijeh-inem itile ahungleh achele mi atambehseh jengin, an nehna ding jeng jong ong man lou ahiuve.

³²Chuin amaho kongin akitolun, gamthipma achomin achedoh taovin ahi.

³³Chule mipichun acheu chu amun, tamtah-in Ama chu aheuvin, khopi ho-a kon chun kengin ahung lhaijun, akhelpauvin, chule ahenga ahung kikhomun ahi.

³⁴ Chuin Jesu ahung potdohle mipi tamtah amun, achingbei kelngoi hontoh abah jeh-u chun alung asen, amaho chu thu tamtah ahil pantan ahi.

³⁵Hichun nilhangkai lam ahitan ahile, aseijuite chu ahungun ahengah, hikom hi gamthip ahin, khomala agei lhehtan ahi;

³⁶Hiteho hi ikimvel uva loujao le kho ho-a acheuva neh ding imathem agakichoh theina dingun soltan, ajehchu amahon nehding imacha aneitapouve, atiuvin ahi.

³⁷Ahin Aman adonbutnin amaho jah-a, Nanghon neh ding peuvin, ati. Amahon ama jah-a, Kacheuva changlhah dangka jakhat man kagachoh uva kapeh dinguham? atiuve.

³⁸Aman ajah uva, Changlhah pheng ijat naneijum? gave temun, ati. Chuin anei jatnu ahet phatnun, pheng nga leh nga ni aume, atiuvin ahi.

³⁹Chuin amaho chu abonchauvin hamhing chungah aloiloijin atousah dingun thu apen;

⁴⁰Chule amaho agol agolin ja khat cheng, somnga chengin atoutaovin ahi.

⁴¹Chuin changlhah pheng ngale nga ni chu alan, vanlam aven, phatthei aboh-in, changlhah chu ahehbal balin, mipi anga aluipeh dingun aseijuite apen; nga ni jong chu ahoppeh sohkeijin ahi.

⁴²Chuin amahon abonchauvin aneuvin, ava sohkeijun ahi.

⁴³Chuin changlhah-a kon le nga-a kon chun aneh valu paipeh somle paipeh ni aloh dimun ahi.

⁴⁴Changlhah ne-a chu mi pasal cheh sangnga tobang ahiuvin ahi.

⁴⁵Chuin Aman mihonpi chu alhadoh lai sung chun, aseijuite chu gal lang khat lama Bethsaida anagalkai masa dingin kong'a chun alutsah-in, asolpaitan ahi.

⁴⁶Chuin amaho chu alhah dohsoh phatnin, tao dingin mol chunga akaltoutai.

⁴⁷Chuin nilhah ahung hi phatnin, kong chu dillen lailunga aumin, Ama achang seh-in tolla aumin ahi.

⁴⁸Chuin huijin ale lama anuh jeh uva, amaho dillena alungdonu chu amun; khovah ding kon lamin akengin twi chunga lam ahinjotnin, amaho henglam ahinjonin, amaho chu kheldin agon ahi.

⁴⁹Ahin amahon twi chunga kenga lam ajotna aheng lamuva ahung amu phatnun, Joumi hinte, atiuvin, a-aosot jengun ahi.

⁵⁰Ijeh-inem itile abonchauva Ama chu amu soh keiju ahin, atija lheh jengun ahi. Ahivangin Aman amaho chu ahinhou paijin, ajah uva, Lungmong tah-in umun; keima kahi, kicha hih-un, ati.

⁵¹Chuin kong sunga amaho henga akalin ahile, hui chu athip jengtan ahi. Hichun amahon seitheilou khophelin kidang asalheh jengun ahi.

⁵²Ajeh chu changlhah thudol jong chu hephata louva, lungtah chehjoa ahitaove.

⁵³Chuin agalkaijun Ganesaret gamsung alhungun, kong chu twipam chinah angataovin ahi.

⁵⁴Chuin kong'a kona apotdoh doh-un ahile, miho chun anahe paitaovin,

⁵⁵Agam sunguva alhai kimvel leuvin, chua aume ti ahetna chanuva ana damlouho chu alupna pumin ahinpuvin ahi.

⁵⁶Akho akhoa, khopiho-a, chule loujaovah alutna chan-ah, ana adamlou ho chu lamlena alupsah-un, apon mongkai beh atham dinguvin ahenga ataovun ahi. Chuin athamkha chan chu adam jengun ahi.