Read Thado Chin Mark 7 Bible Online

Mark 7 - Thado Chin bible

Mark 7

¹Chuin Jerusalem'a kona hunga Pharisaiho le danthu sunho lah-a phabep khat akoma ahung kikhomun ahi.

²Chule hiteho chun aseijuite kimkhatnin khutboh puma, khut sil louva, changlhah aneh-u amutauvin ahile themo achanun ahi.

³Ijeh inem itile Pharisaiho le Juda te jousen upate khanga ahung chonna dan amangun, khut phatecha silngim louva an ne louhel ahiuve.

⁴Kailhang mun'a kona ahung tengu jongle kisil louvin an aneji pouve. Chule khonho, belho, sum-eng belho, chule dokhang ho sopding thudol le adang tamtah jong aneijun, atuhchah kheh-un ahi.

⁵Chuin Pharisai ho le danthu sunhon adongun, Ibola naseijuite hi upate akhang akhanga ahung chonna dan manglouva, khutboh puma changlhah anehjiuham? atiuvin ahi.

⁶ Aman amaho chu adonbutnin, ajah uva, Isaiah themgaovin miphalhem nangho thudol aseije, Hiche phung mite hin akam sunguvin eichoi-anun, alungthimula keija konin gamlatah ahi.

⁷Ahoi hitaleh amahon athu hilu hi mihem thupeh jeng ahilu ahi jeh-in, eihouvu hi moh ahi, tia kisun chu atahbeh ahi.

⁸Ajehchu nanghon Pathen thupeh tahbeh chu nakoi doh-un, mihem akhang akhanga ahung chonnao bel le khonho not theng danjoh naha tuh jouvin, chule hitobang thil adang tamtah nabolun, ahi, ati.

⁹Aman ajah uva, Nanghon nangho akhang akhanga nahung chonnao dan namandet theina dingun, Pathen thupeh chu kichentah-in napai uvin ahi.

¹⁰ Ijeh-inem itile Mosi'n, Nanu le napa jabolun; chule anu le apa hou se-a chu thihel hen, ati ahi.

¹¹Ahinla nanghon nahiti seijiuve, Koi hileh anule apa jah-a, Kavanga naphatchomna dingu jouse chu Corban ahitai, (hichu Pathen henga peh ahitai tina ahi,) atile,

¹²Anu dinga ahin, apa dinga ahin jong ima atohpeh ding najada jiuve.

¹³Nangho chonna thu mi napehsonu chun, Pathen thupeh imalou nasouvin; hitobang thil chu tamtah naboljiuve, ati.

¹⁴Chuin mihonpi chu ahenga akoukitnin, ajah uva, Nabonchaovin kathusei ngai phauvin lang hetoh-un;

¹⁵Mihem polama kona asunga lutna ama suboh thei imacha aumpoi. Asunga kona hungpotdoh chengse chun asuboh joh ahibouve.

¹⁶Angaina ding nakhang neija aumle ngaihen, ati.

¹⁷Chuin Aman mipi adalhah-a insunga alutjouvin, aseijuite chun thulem chu adongchen taovin ahi.

¹⁸Chuin Aman ajah uva, nangho jong hitobang loma hetna neilou nahinah laiju ham? Itobang hijongle pama kona mihem sunga lut chun ama asuhboh theipoi.

¹⁹Ijeh-inem itile alungsunga lut louva a-oisunga lutna, hitia chu a-anneh jouse asuthengji-a, aposona ah ahungdoh ji ahi nahet louvu ham?

²⁰Chuin Aman, Mihem lung sunga kon hungpot chun, hichetah chun mi asuboh ahi.

²¹Ijeh inem itile mihem sung, alung sunga kon lung gilou, jonthanhoi, guchat, toltha,

²²Miji toh jon, papsetna, gitlou engsetna, mi dohabol, huhna, kimit thipna, kitaitom, hoitho, ngolna;

²³hicheng thilphalou hi mi sunga kona hungpot doh-a, mihem asubohji ahi, ati.

²⁴Chuin akipatdoh-in chukom mun chu adalhan, Tyre le Sidon gamkol sunga achen, hikoma chun in khatna alutnin, koima ahetsah nompon, ahinla akisel theitapon ahi.

²⁵Chutichun numei khat achanu lhagao boh vop ahin, ama chungchang thu chu ajan, ahenga ahungin, akeng khopimuh-a abohkhup paijenin ahi.

²⁶Numeinu chu Greek mi ahin, anam lama chun Syro-Phoinicia mi ahi. Amanu chun achanu sunga kona thilha deldoh dingin ataovin ahi.

²⁷Ahin Jesu'n amanu jah-a, Chate cheng vamasa tadihen; chate changlhah lahpeh-a uichate koma selhah aphapoi, ati.

²⁸Ahin amanun ajah-a, Ahinai, Pakai, hijongle dokhang noija um uichan jong, chate changlhah neh hal anehkhahji khula-em, tin adonbutnin ahi.

²⁹Chuin Aman ajah-a, Nathusei jeh chun chetan; thilha chu nachanu sunga konin apotdohtai, ati.

³⁰Chuin amanu a-in lamah achen ahile, thilha anapot doh-a, achanu jalkhuna analup agatoh-in ahi.

³¹Chuin Tyre gamkol sung chu adalhan, Sidon ajotnin, Decapolis gam ajotpeh-in, Galilee dillen alhungtai.

³²Chuin mi na-ngong pao jong paochen thei lou khat hi ahenga ahinpuijun, achunga akhut angap dingin ataovun ahi.

³³Chuin Aman mipi lah-a konin achangin apuidoh-in, akhutchalin anasung akhoijin; chuin achil asetnin, alei athamin;

³⁴Chuin vanlam aven akhoisan, ajah-a, Ephphatha, ati. Hichu, Kihongin, tina ahi.

³⁵Chuphatnin ana avangin, aleigui jong akilhamtan, kichentah-in apao theitai.

³⁶Chuin Aman amaho chun koima jah-a asei louna dingun akhamin ahi; ahinla Aman ahakham chehle, amahon ahaseiphong cheh-un;

³⁷Chule kidang asabeh seh-un, Aman ijakai abolpha sohtai: na-ngongla kho ajahsah-in, paomola apaosah theije, atiuvin ahi.