Read Thado Chin Mark 8 Bible Online

Mark 8 - Thado Chin bible

Mark 8

¹Hichelai chun mihonpi chu atamlheh jengtan, chule nehding ima aneilou jeh-un, Jesu'n aseijuite chu ahenga akouvin, ajah uva;

²Mihonpi hi kakoma aumnao ni thum alhingtan, neh dingla anei hih-un, kalung ase lheh-e;

³Chule an ne louvin a-inlam cheh uva sollengla lhasampa ding ahiuve; ajehchu akimkhat hi gamlatah-a kona hung ahiuve, ati.

⁴Chuin aseijuiten adonbutnun, ajah-a, Hiche kom gamthip laija mi hichengpi ninglhinga vahna ding changlhah kon hoija kona alah dingham? atiuvin ahi.

⁵Chuin Aman mipi chu adongin, ajah uva, Changlhah pheng ijat naneijum? ati. Chuin amahon, Pheng sagi, atiuve.

⁶Chuin Aman mipi chu tolla tou dingin thu ape-in; chuin Aman changlhah pheng sagi chu alan, athangvah in, chujouvin ahehbal balin, a-anguva luipeh dingin aseijuite chu apen, amahon mipi anga chun aluipeh-un ahi.

⁷Chule nga neocha cha phabep khat jong aneijun; hi jong chu phatthei aboh-in, a-anguva luipeh dingin asoltan ahi.

⁸Chuin amahon aneuvin, ava sohkeijun, aneh moh-u ahal chu longkai sagi alohdoh-un ahi.

⁹Chule hiche an neho chu mi sangli tobang ahiuvin ahi. Chuin amaho chu asol tan ahi.

¹⁰Chule Ama aseijuite toh kong'a alutpaijun, Dalmanutha gam alhung taovin ahi.

¹¹ Chuin Pharisai ho chu ahungdoh-un, apatepnan thu adongun, van'a kona melchihna aholtauvin ahi.

¹² Chuin Ama alung sunga akhoisan, Tukhang mite hin ibola melchihna aholuham? Tahbeh-a kasei ahi, Hiche tukhang mite hi imacha melchihna kipe lou ding ahi, ati.

¹³Chuin amaho chu adalhan, kong'a alut kitnin, lang khat panga dingin akipatdoh tai.

¹⁴Chuin amahon changlhah akeng haijun; kong'a chunla pheng khat tailou adang aumhih helin ahi.

¹⁵ Chuin Aman amaho chu ahilchah-in, ajah uva, Chingtheijun; Pharisai ho chol le Herod chol lah-a kihong phaovin, ati.

¹⁶Chuin amahon, Hiche hi changlhah ineilou jeh-u ahi, tin akihou lhiuvin ahi.

¹⁷Hichu Jesu'n ahetdoh phatnin, ajah uva, Changlhah nanei loujeh uva ibola kihouhou nahiuvem? Tugeija nalunguva hedoh loulai nahiuvem? Nalungu tahsah jing nalai nahiuvem?

¹⁸ Mit neijuva mu theilou nahiuva, nakhang neijuva ja thei lou nahiuvem? Gel jong nagel doh lou mongu ham?

¹⁹Mi sangnga lah-a changlhah pheng nga kahop peh-a chu nehmoh ahal longkai ijat nalo dimum? atile, amahon, Somleni, atiuvin ahi.

²⁰Mi sangli lah-a pheng sagi kahop peh-a chu nehmoh hal longkai ijat nalo dimum? atile, amahon, Longkai sagi atiuve.

²¹Chuin Aman ajah uva, Iti dana tu-a jong hedoh loulai nahiuvem? ati.

²²Chuin Bethsaida'a ahungin; hikoma chun mitcho khat ahenga ahinpuijun, atham dingin Ama henga ataovun ahi.

²³Chuin Aman mitchopa chu akhutnin atuh-in, khosunga kon chun apuidoh-in; chuin amitna achil asetnin, achunga khut angamin, Kho namu-em, tin adongin ahi.

²⁴Ama adahdoh-in, Mihem chu thing tobangin kamun, avahleuve, ati.

²⁵Chujouvin amit akhutnin atham kitnin, chuin adadoh sah-in ahile adamhel jengin, chule mi jouse kichentah-in amu theitan ahi.

²⁶Chuin Aman ajah-a, khopisunga jong lut hih-in, khopi sunga koima cha jong hetsah hih-in, tin a-in lama asolmang tai.

²⁷Chuin Jesu le aseijuite apotdoh-un, Caesaria Philippi'a khoneo dunga acheuvin; lam dunga aseijuite jah-a, Mihon keima hi koi ahi eitiuvem? tin adongin ahi.

²⁸ Chuin amahon, John Baptist ahi atiuvin; ahin abangin Elijah ahi atiuvin; adangsen Themgaoho lah-a khat ahi atiuve, tin aseijun ahi.

²⁹ Chuin Aman amaho adongin, Nanghonla koi ahi neitiuvem? ati. Chuin Peter'in adonbutnin, Nangma Christa chu nahi, ati.

³⁰Chuin Aman ama thudol koimacha jah-a asei louna dingun hakhamin akhamin ahi.

³¹Chuin Aman amaho chu, Mihem Chapan thil tamtah athoh-a, vaipo upa hole thempu pipuiho chule danthu sunho pampaija umding, kithatna chule ni thum joule thoudoh kit tei ding ahichu ahil pantan ahi.

³²Aman hichu phongtah-a asei ahi. Hiche chun Peter'in ama apuidoh-in ahousetan ahi.

³³Ahin Ama akiheijin, aseijuite aven, Peter chu aphoh-in, Kanung lama chen, Satan; nangman Pathen thulam gel louvin, mihem thulam jeng nagele, ati.

³⁴Chuin Aman aseijuite le mihonpi chu ahenga akouvin, ajah uva, Koi hile kanung eijui noma chun ama kingaitom henlang athingpel kiput hen chule kanung hinjuihen.

³⁵ Ijeh-inem itile koi hile ahinna huhhing noma chun achan ding; amavang koi hile keima jal leh Kipana Thupha jala ahinna chana chun ahuhhing ding ahi.

³⁶Ijeh-inem itile mihemin vannoi leiset apumpin neihenlang ahinna chantale, ipi phatchomna anei dingham?

³⁷Min ahinna khela ipi apeh dingham?

³⁸Koi hijongle tulai khang jonthanhoina le chonsetpan lah-a keima le kathu jachat chan chu, Mihem Chapan jong a-Pa loupina-a avantil thengtetoh ahung nile ama chu ajachatpi ding ahi, ati.