Read Thado Chin Mark 9 Bible Online

Mark 9 - Thado Chin bible

Mark 9

¹Chuin Aman ajah uva, Tahbeh-a kaseipeh nahiuve, Hikoma dingho kimkhat hi Pathen lenggam thanei tah-a ahung lhun amu kahseuva thina tepkha lou ding aumuve, ati.

² Chuin ni gup jouvin Jesu'n Peter toh, Jacob toh, chule John atumin apuijin, molsang chung khatna apuitouvin, chuin Ama amaho ang sungah avou akikhelin ahi.

³Chule aponsil chu koimachan chutobang tah-a asopbang joulou ding khopmin abanglah lah jengin, buhbang sangin jong abangjon ahi.

⁴Chuin Elijah leh Mosi ahengah ahung kilah lhonin, Jesu toh akihouvun ahi.

⁵Chuin Peter'in Jesu jah-a, Rabbi, hikoma i-umu hi eiho dingin anome; lhambuh thum songung kate, khat nangma ding, khat Mosi ding, chule khat Elijah ding, ati.

⁶Ajehchu akichat behseh jeh-a seiding hetmoa asei ahi.

⁷ Chuin meilhang khatnin amaho chu ahinlekhun; mei lah-a kon chun aw ahung gingin, Hiche hi Ka-Chapa deitah ahi; athu ngaijun, ati.

⁸Chuin phulou helouvin akimvelu avetnuva ahile, koimacha amuta hih-un, Jesu changsehle amaho changbou aumtaovin ahi.

⁹Chuin molsanga kona ahung kumsuh phatnun, amaho chu hakhamin akhamin, Mihem Chapa athia kona athodoh kit kahsen koima jah-a seidoh hih-un, ati.

¹⁰Athusei chu alunguvah aching jingun, athia kona athodoh kit chu ipi aseina ahidem, tin akidongto jiuvin ahi.

¹¹ Chuin amahon adongun, Ibola danthu sunhon Elijah hung masa ding ahi atiuham? atiuve.

¹²Aman adonbutnin, Elijah chu tahbeh-a hung masa-a, ijakai ahung semphat dingmong ahi; chule itidana Mihem Chapa thudol, Aman hesoh genthei tintang athoh-a chule mi nahsahmo-a aumding ahi, tia kisuna ham.

¹³Hijongle keiman nangho kaseipeh nahiuve, Elijah chu ahungsa ahitai, chule akhanchan dingthu asut bangtah-u chun achunga anopnop aboltauvin ahi, ati.

¹⁴Chuin aseijuite henga ahungin ahile akimveluva mi tamtah auma, chule danthu sunho chun thu adoh uva anakinelpiu amun ahi.

¹⁵Chuin mipi chun Ama amu mu-un kidang asa lheh-un, aheng lamah ahung lhaipaijun Ama chu alamtouvin ahi.

¹⁶Chuin Aman danthu sunho jah-a, Amaho khutoh ipi kinela nahiuvem? tin adonge.

¹⁷Chuin mipi lah-a khatnin ahindonbut nin, Pakai, kachapa nahenga kahinpui ahi, ama lhagao paomon avopmin;

¹⁸Chule hoikom hijongle aman amat matna-a aheh lhujin; chule achilphon alhan, aha ageljin, chule apumin akangjin; chule einodohpeh nadiuvin naseijuite henga kaseijin; amahon ajou pouvin ahi, ati.

¹⁹Chuin Aman adonbutnin, ajah uva, Vo tahsanna neilou khang mite, nakom uva itihchan kaumpi ding nahiuvem? Itihchan kakhongai ding nahiuvem? kahenga hinpuijun, ati.

²⁰Chuin amahon ahenga ahinpuijun ahi. Chuin Aman ama chu amu phatnin, lhagaoboh chun amapa chu nasatah-in aveingoi paijenin ahile tolla alhun, achilphon alhalet lutnin akilihlelen ahi.

²¹Chuin Jesu'n apa jah-a, Ahiti nahi itihchan hitam? ati. Hichun aman, Achapan laija pat ahitai.

²²Chule suhmang dingin abangle meijah, abangle twijah aleh lut lhoijin ahi: hijongle nangman alonaje nahetle, neilungset in neihutan, ati.

²³Jesu'n adonbutnin, Natahsan photle! Atahsan ding chun ijakai ahi thei sohkeije, ati.

²⁴Chutah chun chapangpa pa chun, amitlhi pumin, Pakai, katahsane; katahsan lelna-a neihun, tin asamtai.

²⁵Chuin Jesu'n mihonpi hung lhaikhom chu amun, lhagao boh chu aphoh-in, ajah-a, Nang lhagao paomole na-ngong, thu kapeh nahi, asunga kon chun hung potdoh-in, chule lutkit tahih-in, ati.

²⁶Hichun lhagao chu apengin, hatah-in avei ngoijin, ama-a konchun ahung pottan ahi. Hichun chapangpa chu athi bangin aumtan, chuphatnin mi atamjopi chun, Athi hita khu, atiuve.

²⁷Ahin Jesu'n akhutnin amanin, akaithouvin ahile, ahung thoudoh jengtan ahi.

²⁸Chuin Jesu insung agalut phatnin, aseijuiten guhthimin, I-atile keihon kanodohjou louvu ham? tin adongun ahi.

²⁹Aman adonbut-in, Hitobang hi an ngola taona tailouvin akinodoh theipoi, ati.

³⁰Chuin chua kon chun achedoh-un, Galilee gam ajotnun, hichu min ahet ding Ama anompon ahi.

³¹Ijeh-inem itile Aman aseijuite ahilpeh jin, ajah uva, Mihem Chapa chu mihemte khutna kipedoh ahitan, amahon atha dingu; chule akitha jouteng, ni thum nile Ama hingdoh kit ding ahi, ati.

³²Ahivangin athusei chu ahethei pouvin, Ama doh dingla akichauvin ahi.

³³Chutichun Ama Capernaum ahung lhungtan ahi. Chuin in sunga aumpetnin amaho chu adongin, Lampi'a chu ipi nakinel piu ham? ati.

³⁴ Ahivangin amaho lampi'a chu, Ilah uva hin koi hi alenpen ahidem? tia akinel jeh-u chun athipchet jengun ahi.

³⁵ Hichun atouvin, somleni ho chu akouvin ajah uva, Koi hijongle amasapen hinom chu nukhah pen ding ahi, chule mi jouse jenlea pang hi ding ahi, ati.

³⁶Chuin chapang neocha khat akouvin, alaijuva adinsah-in; chuin apomin, ajah uva,

³⁷ Koi hijongle keima mina hitobang chapangcha khat sanga chun keima eisan ahi; chule koi hileh keima eisang chan chun keima eisan hilouvin, eihinsolpa asanjoh ahi, ati.

³⁸John'in adonbutnin ajah-a, houhil namina thilha nodoh mikhat kamuvin, eijui pouvin ahi: chule eijuilou jeh uvin kakham taove, ati.

³⁹Ahin Jesu'n, Kham hih-un; kamina thil kidang bola, keima eiseiseloi theija koima aumpoi.

⁴⁰ Ijeh-inem itile koi hijongle eiho eidou lou tapou chu eiho lama pang ahi.

⁴¹ Koi hijongle Christa mi ahi tia ama mina twi khon khat don ding napechanu chu, tahbeh-a kaseipeh nahiuve, iti nama jongle kipaman asan ding chu achanlou ding ahi.

⁴²Chule koi hijongle keima eitahsanna hiche aneochaho lah-a khat kipal lhuhsah chan chu, angonga sumhei song lentah kikhai henlang, twikhanglen'a kileh lutle ama dingin aphajoi.

⁴³ Chule nakhutnin nakipal lhuhsah-a ahile tanbong jengin, khut ni neija damun meikong mitthei louva nache sangin, tibukim louva hinna-a lut nangma dingin aphajoi.

⁴⁴Damun chu Alungla thimo ameikongla mitmo ahi.

⁴⁵Chule nakengin nakipal lhuhsah-a ahile, tanbong jengin; keng ni neija imatih-a mittheilou damun meikonga nakilelut sangin, kengbaija hinna-a lut nangma dingin aphajoi.

⁴⁶Damun chu alungla thimo ameikongla mitmo ahi.

⁴⁷ Chule namitnin nakipal lhuhsah-a ahile kaldoh jengin; mit ni neija damuna nakilelut sangin, mitlang cho-a Pathen lenggama lut nangma dingin aphajoi.

⁴⁸ Damun chu alungla thimo ameikongla mitmo ahi.

⁴⁹Ijeh-inem itile mijouse meija chisoa kiso ding, chule ganlhaina jouse chi kiso-al ding ahi.

⁵⁰ Chi hi aphai: ahivangin chi jong hi a-al hi tamtahen lang hileh ipi-a na-alsah kit dinguham? Nasunguva chi neicheh-un, khat le khat kichamdel cheh-in umuvin, ati.