Read Thado Chin Luke 1 Bible Online

Luke 1 - Thado Chin bible

Luke 1

¹I-lah uva tahsan umtah-a guilhung hiche thilho chu adungjui tah-a sun dinga mi tahtah-in akhut apat tah banguvin,

²Atil abula patna amit tah-a muho le athu seiphonga panghon eihil bangun,

³Michung nung Theophilus, ijakai abula patna chamkim keija hetna kaneito lhonin, nangma henga adungjui tah-a hin sutding pha kasan ahi;

⁴Nangma nakihilsa thilho chengse chu adihtah ahi ti nahetna dingin.

⁵ Judah gam lengpa Herod lal laijin, Abia loi lah-a thempu khat amin Zachariah kiti aumin; chule a-inneipi chu Aaron chilhah ahin, amin Elizabeth ahi.

⁶Ani lhona Pathen mitmu-a chonphatah, themona neilou Pakai thupeh jousele chonna danthu jouse jui kimkeija ahi lhone.

⁷Hinlah Elizabeth chu achiin jeh-in cha aneilhon pon, chule ani lhonin hateh-in ateh gel lhontan ahi.

⁸Chuin ahitin ahi, aloite aban bana akilhah dungjuija Pathen anga thempu na atoh petnin,

⁹Thempu chonna ngaija Pakai houin'a alutchun thil namtui halding chu achang khatan ahi.

¹⁰Chule thil namtui ahal pet chun mipi chu polama ataovun ahi.

¹¹Hiche pettah chun Pakai vantil khat ahengah ahung kilah in, thil namtui kihalna maicham jet lama chun ahung dingin ahi.

¹²Zachariah'in ama chu amu phatnin, alungkhamin, chule ki jong akichan ahi.

¹³Amavang vantil chun ama jah-a, Zachariah, kicha hih-in, nataona akisangtai; chule na-inneipi Elizabeth chun chapa khat ahin ding, chule nangman amin John nasah ding ahi.

¹⁴Chule nangma dingin thanopna le hapa kipana hintin, ama pena chu mi tamtah kipah ding ahi.

¹⁵ Ijeh-inem itile ama chu Pakai mitmu-a lentah hiding ahin, chule ama chun lengpiga twile ju adon louhel ding ahi; chule anu oisunga auma patna Lhagao Theng dimset ding ahi.

¹⁶Chule aman Israel chate tamtah a-Pakai Pathen'u henga alehei ding ahi.

¹⁷ Chule kigosa dema umho chu Pakaiya dinga kigotsah dinga, apate lung achate lama heija, michonpha ho chihna thua nungloute chonsah dinga, aman Elijah lhagao le thahat akena ama masang sanga che ding ahi, ati.

¹⁸Chuin Zachariah'in vantil jah achun, Keila katehtan, kaji jongla atehtan, hiche thuhi iti kahet them thei dingham? tin adongin ahi.

¹⁹ Chuin vantil chun adonbutnin, Keima Pathen anga ding jing Gabriel chu kahi, nangma jah-a thusei dingle hiche thupha hi seipeh dinga hungkisol kahi.

²⁰Chule ven, aphatcha guilhung ding kasei thu natahsan lou jeh-a, athu guilhun ni kahse-a thusei thei louva paomo-a naum ding ahi, ati.

²¹Chule miho chun Zachariah chu angah-un, Pathen houin sunga aum sotden chu adatmo lheh jengun ahi.

²²Chuin ahungdoh phatnin ajah uva thu asei theitapon ahi; hichun amahon intheng sunga mu khat anei ahi ti ahetauve; ijeh inem itile amaho chu akhutnin ahoupi thon, paolouvin aumin ahi.

²³Chuin athempu kin natohna nikho achai phatnin, a-in lama achetan ahi.

²⁴Hiche jou chun a-inneipi Elizabeth agaitan, chule amanu lha nga akiselin,

²⁵Aman mi lah-a mi i-sah lou kachan hi suhmangna dinga, Pakaiyin keima eivetna hitia hi eibol ahi, ati.

²⁶Chuin alha gupna-in Pathen'a konin Gabriel vantil chu Galilee gama khopi khat Nazareth atiuva chun,

²⁷ David son amin Joseph kitipa jihol nungah theng khat henga akisolin; nungah theng min chu Mariam ahi.

²⁸Chuin vantil chu amanu hengah alut-in, Chibai, sah chungnungnu, Pakaiyin naumpi; numei lah-a anunnoma nahi, ati.

²⁹Chuin amanun ama amuphatnin, alunggim lheh jengin, alungthimin, Itobang phatthei bohna ahitadem, atin ahi.

³⁰Chuin vantil chun amanu jah-a, Kicha hih-in, Mariam, ijeh-inem itile Pathen lungdeilam nahi.

³¹ Chule ven, gaijin natin, chapa khat nahin ding, chule amin JESU nasah ding ahi.

³² Ama chu hung len ding, chule Chungnung pen Chapa kiti ding ahi: chule Pakai Pathen'in ama chu apu David laltouna apeh ding ahi.

³³Ama Jacob sonho chunga leng changa, atonsot atonsot geija vai apoh ding, agamin itihchan hijongle kichaitih anei lou ding ahi, ati.

³⁴Chuin Mariam'in vantil jah-a chun, Hichu iti hi dingham, Pasal la kaneipon? ati.

³⁵Chuin vantil chun adonbutnin, ajah-a, Lhagao Theng nachungah hung chuntin, chule Chungnung pen thilbol theinan nahin lekhu ding ahi: chule hiche jeh-a chu ahung peng ding athenga chu Pathen Chapa kiti ding ahi.

³⁶Chule, ven, nasopinu Elizabeth'in jong ateh nungin chapa khat avoptai; achinga aseinu-u chu agaijin, tun lha gup ahitai.

³⁷ Ijeh-inem itile Pathen na dinga ahitheilou imacha umlou ding ahi, ati.

³⁸Hichun Mariam'in, Ven, keima Pakai sohnu kahi, kachungah nasei bangbang chun lhunghen, ati. Chuphatnin vantil chu amanu koma konin achemang tan ahi.

³⁹Hiche jou chun Mariam akipatnin, thinglhang gama Juda khopi khatnah acheloitan ahi.

⁴⁰Chuin Zachariah in'a alutnin, Elizabeth chibai aboh tan ahi.

⁴¹Chuin ahitin ahi, Elizabet'in Mariam'in achibai boh ajah phatnin, a-oi sunga naocha chu ahung kichomin, chule Elizabeth amatah Lhagao Theng adimin;

⁴²Chule aw sangtah-in asamin, Numei lah-a nunnoma nahin, nalai gil ga jong nunnoma ahi.

⁴³Chule ka pakai nu kahenga ahung hi, hoilam ipi thu hitam?

⁴⁴Ijeh-inem itile ven, nei chibai boh aw gin kanakhangin ajahjah-in, ka-oi sunga naocha athanomin ahung kichomin ahi.

⁴⁵Chule atahsan nu chu anunnom ahi; ijeh inem itile Pakaiyin ajah-a thu asei chengse chu hung guilhun ding ahi, ati.

⁴⁶ Chuin Mariam'in, Kalungin Pakai achoi-anin,

⁴⁷Chule kalhagao jong eihuh hinga Pathen'ah akipah-in ahi.

⁴⁸Ijeh-inem itile aman asohnu dinmun nemcha hi akhohsah-in; Hijeh chun vetan, tu-a lhah-a akhang akhanga mi jousen anunnom eiti dingu ahi.

⁴⁹Ijeh-inem itile Hatchung nungin keima thil loupitah eibol pehtan; Amin jong athenge.

⁵⁰Chule Ama gingte chunga akhang akhangin Alungset aumpeh jinge.

⁵¹Aman abanin athahatje avetsahtan; Aman ama lungela kiletsah hoithoteho asuchehtai.

⁵² Aman ahat apaoho atouna mun uva kon in asonlhan, namchom chagate atungdohtai.

⁵³Agilkelteho thil phaphan avahvan, mihaote ho khut gohkeovin asolmangtai.

⁵⁴Alungsetje chu ahetdoh jingnan, asoh Israel akithopin,

⁵⁵ Tonsotna dingin Ipu ipateu Abraham, chule achilhahte henga athutep bang chun, ati.

⁵⁶Chuin Mariam amanu koma chun lha thum jen aumin, a-in lamah akiletan ahi.

⁵⁷Chuin Elizabeth aso phat ahung lhingtan ahile, chapa khat ahingin ahi.

⁵⁸Chuin a-inhengho le a-inkoho chengsen Pakaiyin aha lungset behseh jeng chu ajah phatnun, amanu chu akipa athanop piuvin ahi.

⁵⁹ Chuin ani get nin naosen cheptan ding chun ahungun; amaho chun apa min bangin Zachariah sah dingin agouvin ahi.

⁶⁰Ahin naosen nu chun, Ahipoi, naosen min hi John sah ding ahi, tin amaho jah-a aseijin ahi.

⁶¹Chuin amahon, Naphung lah uva koima min chutobang um louva, atiuvin ahi.

⁶²Chuphatnin amahon, Amin ipi nasah nom em tin mit heijin apa adongun ahi.

⁶³Chuin aman lekhasutna pheng athumin, Amin John ahi, tin asuntan ahi. Hichun ami jouse chun adatmo lheh jengun ahi.

⁶⁴Chuin chupettah chun akam akihongin, alei akilhamin, Pathen avahchoi tan ahi.

⁶⁵Hichun akimvela cheng chengse chungah kichat achutan, chule Juda gam thinglhang jouse-ah hicheng thusoh thu chu akiseithang tan ahi.

⁶⁶Chule aja jousen hichu alungin aching cheh-un, Hiche chapang hi ipi ahungsoh tadem! atiuvin ahi. Chule Pakai khutnin ama aumpin ahi.

⁶⁷Chule apa Zachariah chu Lhagao Theng adimsetnin, gaothu aseijin, hitin ahi;

⁶⁸Pakai Israel Pathen chu vahchoijin umhen; Ijeh-inem itile Aman amite avilin, alhatdoh tan,

⁶⁹Chule asoh David insung mite lah-a, Eiho dingin huhhingna ki khat eitun dohpeh taove;

⁷⁰Leiset kisemtila pat Aman athemgao thengho kama anasei bangin;

⁷¹Imelma teova konle, eihoteu khutna kona huhdoh-a i-um theina diuvin;

⁷²Iputeu ipateu henga anatep akhotona chu tohdohna dingle, akitepna theng chu geldoh nadingin;

⁷³Ipuluiju Abraham jah-a akihahselna bangtah-in,

⁷⁴Igalteu khutna kona huhdoh-a i-umuto lhona, kichalou hela ama kin iboluva,

⁷⁵Thengtah le chonphatah-a, Ihinlai sungseuva a-angsunga akin ibolna diuvin.

⁷⁶ Chule nangma, naosen, chungnung pen themgao kiti ding nahi; ajeh chu alampi sem dinga nangma Pakai masang sanga che ding nahin;

⁷⁷achonsetnao suhbeija auma kona, amite chu huhhingna hetna pedingin,

⁷⁸I-Pathen'u nemheuva mikhotona vangin, chungnunga kona nisa soh chun ihungvil taovin;

⁷⁹ Muthim le thina lima touho salvah dingle, Ikengu lungmonna lampia chesah dingin, ati.

⁸⁰Chuin chapang chu ahung seilenin, lhagaova hattah ahitan; chule Israelte henga akiphondoh ni gei chun gamthipmah aumin ahi.