Read Thado Chin Luke 10 Bible Online

Luke 10 - Thado Chin bible

Luke 10

¹Chucheng jou chun Pakaiyin midang somsagi alhendoh ben, ama chena ding khopi chengsele muntina chun amasang sang-ah mi ninin asolin ahi.

² Chuin ajah uva, Chang at ding atam lheh-in, ahivangin natonga alhome; hiche jeh chun achang atna-a dinga natongho ahinsoldohna dingin, chang neipu henga taovun.

³ Cheovin; veuvin, ngeihon lah-a kelngoi nou banga nangho kasol nahiuve.

⁴ Nanghon sumbom ahin, sakhao ahin, kengchot ahin, keng hih-un; chule lampia koima chibai boh hih-un.

⁵Chule in nalutna ding chanuva, amasatah-in, hiche in'a hin lungmon lhunghen, tiuvin.

⁶Chukoma chu lungmon umtah mi auma ahile, nalungmon chu achunga umding ahi; aum lou vangle nangho henga hung kile kit ding ahi.

⁷ Chule ipi hijongle amahon napeh peh-u chu neuvin donun, hiche in'a chun umun; ijeh-inem itile natongan athaman asana lom ahi. In khatna konin in khatna kichon hih-un.

⁸Chule ipi kho hijongle nalutnaova chu min nanasan uva ahile, na-ang uva akoi chanu chu neuvin.

⁹Chukoma um anaho chu boldamun; chule amaho jah-a chun, Pathen gam chu nakomu alhungtai, tiuvin.

¹⁰Amavang ipi kho hijongle nalutna uva chu min nana lhunsah louvangule, chedoh-unlang akho sung lamlenuvah,

¹¹Kakeng phanguva beh nakho sunguva leivui sana katheh lhah khum nahiuve; hijongle Pathen gam ahung naitai ti hi heuvin, tin seijun.

¹² Najah uva kasei ahi, chunileh chuche khopi thoh sanga chu Sodom thoh oljo ding ahi.

¹³ Ohe Chorazin! nada ahi, ohe Bethsaida! nada ahi; ijeh-inem itile nalah uva thilbol thahatna kidang kibol chengse chu, Tyre le Sidon khopi-a kibol hile, sotna pat chun achenghon khaodip pon kisilin vut lah-a touvuntin, alungu heitauvinte.

¹⁴Ahinla thupi tan nile nangni thoh sanga Tyre le Sidon thoh oljo ding ahi.

¹⁵ Chule vangeija choisanga uma nang Capernaum, damuna sotlhah-a umding nahi jobouve.

¹⁶ Koi hile nangho thu ngai chan chun keima thu jong angai ahi; koi hile nangho pampaija chun keima jong eipampai ahi; chule keima eipampaija chun eisolpa jong apampai ahi, ati.

¹⁷Chuin chuche somsagi ho chu kipahtah-in ahung kileuvin, Pakai, nangma minin thilhaho jong kathu-uvin anunge, atiuvin ahi.

¹⁸Aman amaho jah-a, Van'a kona kolphe banga Satan ahunglhah kamui.

¹⁹ Veuvin, gulle aipi chonpeh dingle, melmapa thilboltheina jouse chunga chu thuneina kapeh nahiuve; hitia chu imachan nangho nasuhset lou dingu ahi.

²⁰Ahivangin lhagaoho nathuva anun jeh chun kipah hih-un, amavang naminu van'a akisut jeh chun kipah jouvin ati.

²¹Chuin hiche pettah chun Jesu Lhagao Thengah hapan akipah-in, hitin ati, Ka Pa, vanle lei Pakai, nangman mi chingtele lungthim themho henga hicheng thuhi na-ima, naocha ho henga naphon doh jeh hin nangma kathangvah-e; Pa, hiti chu nangma lunglhaina lam ahi.

²² Imajouse ka Pan keima eipehdohsoh ahitai, chule Chapa chu koi ahi Pa tailouvin ahepoi; chule Pa chu koi ahi Chapa le Chapan Ama aphondoh aphondohna miho tailou koiman ahepoi, ati.

²³Chuin seijuiteho lama chun akiheijin atumbeh-in ahenguva, Nathilmu chengseu namunao mit chu avangphai:

²⁴ijeh-inem itile kaseipeh nahiuve, nangho thil mu hi themgaoho tamtah le lenghon mu atup lheh-u ahin, ahivangin amupouvin ahi; chule nathu jah chengseu hi jah atupmun, ahinla ajapouvin ahi, ati.

²⁵ Chuin veuvin, danthu them khat adingdoh-in, apatep-in, Houhil, tonsot hin kemlou kanei theina dinga ipi kabol dingham, ati.

²⁶Chuin aman ajah-a, danthua ipi kisunem? Nangman iti nasimem? ati.

²⁷ Chuin aman adonbutnin, Nangman nalung pumpin, nalhagao pumpin, nathanei apumpin, chule nalungthim pumpin Pakai na-Pathen chu ngailun; chule nangma naki ngailut bangin naheng nakoma ngailun, ati.

²⁸ Chuin aman ajah-a, Nadonbut dih tangeije; hiti chun bolin, chutile nahin ding ahi, ati.

²⁹Ahivangin ama them kichan agon, Jesu jah-a, Ahile kaheng kakom chu koiham? ati.

³⁰Jesu'n adonbutnin, Mi koiham khat Jerusalem'a konin Jericho'a achesuh-in, gucha michomho lah atohkhatan, amaho chun apon alahpeh-un, avovin, athi konin adalha taovin ahi.

³¹Chuin thempu khat chuche lampia chun achesuh-in; chuin amachu amu phatnin, lamsih lang khatna apeltan ahi.

³²Chuin chutima chun Levi mi khatma chukom mun chu aphah phatnin, ahungin ama chu aven, lamsih lang khatna apeltai.

³³ Ahin Samaria mi khat vang chu akholchena lamah aumna mun chu ahinphan; chuin ama chu amun ahile alung asen,

³⁴Akoma achen, avohnao mahaho chu thaole lengpitwi asunkhumin, amahaho chu atomin, chuin amatah gancha chungah atousah-in, jinlhun in'ah apuilutnin, ajentan ahi.

³⁵Chuin ajingin apotdoh ding konin, sumnong ni aladoh-in, inneipu chu apen, Ama hi phatechan anajenin, hiche kalval ijat hijongle nasuhmang jat chu keima kahung kile kit teng nangma sanange, ati.

³⁶Hicheng thum lah-a koipen chu gucha michom lah tohkhapa hengle kom nahisah-em? ati.

³⁷Chuin aman, ama akhotopa chu, ati. Chuin Jesu'n ajah-a, Chenlang nangman jong chutobang chun gabolin, ati.

³⁸ Chuin acheuva ahile ama kho khatna alutnin; chuin amin Martha atiu numei khatnin a-in'a alhunsah-in ahi.

³⁹Chule amanu chun Mariam kiti sopi khat aneijin, amanu jong chu Pakai keng khophang bulah atouvin, athu angaijin ahi.

⁴⁰Martha vang chu lhachalen apangin akisalel lheh jengin, chuin ama henga ahungin, Pakai, kasopi nun keima jeng lhachale-a eichanglha hi ima nagel louham? Hijeh chun eikithopi dingin solin, ati.

⁴¹Ahin Jesu'n adonbutnin, amanu jah-a, Martha, Martha, nangma thil tamtah ngaito-a lungkhama lunggim nahi;

⁴²Ahinla ngaichat akhoh chu khatsehbou ahin, chule Mariam'in chuche aphalai chu akilhen ahitai; hichu ama-a kona kilahpeh lou ding ahi, ati.