Read Thado Chin Luke 11 Bible Online

Luke 11 - Thado Chin bible

Luke 11

¹Chuin ama mun khatnah ataovin, ajo phatnin aseijuiteho khatnin ajah-a, Pakai, John'in aseijuite taoje ahil bang chun nangman jong keiho neihilun, ati.

²Chuin aman amaho jah-a, nangho natao tengule, Van'a um ka Pau, namin kijahen, nagam hunglhung hen, van'a nalung chan akim bangin, leija jong nalungchan kimhen,

³Tunin kaneh khop dingu anneh neipeuvin.

⁴Kalei bateu kangaidam bangun, keiho batjong ngaidamin. Chule lhepna-a neipuilut hih-un, agilouva konin neihuh doh jouvin; tiuvin ati.

⁵Chuin aman amaho jah-a, Nalah uva, koipen nahiuvem khatnin jol neihen, chule jankhang kimin ahenga chehen ajah-a, Jol, changlhah pheng thum apan neipen;

⁶Ijeh-inem itile kajol khat kholjin kahenga ahung lhunge; ahin keiman a-anga luipeh ding imacha kaneipoi, gatile:

⁷Insunga pangin, Neisugim hih-in; tun kot akikhahtai, chule kachatetoh jalkhuna kalum khomui; nangma pe dingin kathou theipoi, tia donbut dinga?

⁸Keiman nangho jah-a kasei ahi, ajol ahi jeh chun thouhen gape hih jongle, athum lunlun jeh chun thouvintin adei jat chu gapente.

⁹Chule keiman nangho kaseipeh nahiuve, Thumun, kipe ding nahiuve; holun, namu dingu ahi; kiuvun, kihonpeh ding nahiuve.

¹⁰Ijeh-inem itile athumchan achangin; chule aholan amun; chule akiuva chu kihonpeh ding ahi.

¹¹Chule nalah uva koipen nahiuvem, mipa hija achapan changlhah athumle song pe dinga? Ahiloule nga athumle nga khela gul pe dinga?

¹²Ahiloule ahtui athumle aipi pe dinga?

¹³Hijeh chun nanghobon migiloutah hiuva, nachateo thilpha pehje nahet ule; hiche sanga chu gam chenga van'a Pa chun ahenga thumte chu Lhagao Theng apeh lou ding ham? ati.

¹⁴Chuin aman thilha paomo khat anodoh-in, chuin thilha chu apotdoh phatnin, mipaomopa chun thu aseitan ahi; hichun mipi ho chun kidang asa lheh jengun ahi.

¹⁵ Ahivangin alah uva mi kimkhat chun, thilhaho lengpa Beelzabul vanga thilhaho anodoh ahi, atiuve.

¹⁶ Adang kimkhatsen ama patepnan van'a kona melchihna athumun ahi.

¹⁷Ahivangin aman amaho lung ngaito chu ahen, amaho jah-a, Gamsung khat amale ama kidoutoa kichom khen chan chu amang thahjin, insung khat kidou chu alhujin ahi.

¹⁸Satan jong amale ama akidoule agam iti dindoh ding ham? Beelzabul vanga thilhaho anodoh ahi neitiula ahin,

¹⁹Keima Beelzabul vanga thilhaho nodoh kahile, nachateovin koi vanga anodohjiu hintem? Hijeh-a chu amaho cheng chu nangho thutana pang ding ahiuve.

²⁰Ahin keima Pathen khutjunga thilhaho nodohji-a kahi vangle, Pathen gam chu nahengu hung lhunga ahitai.

²¹Mihat in manchah kimkeija akipatna a-in angalai chansen, anei bitkeijin aumji;

²²Amavang ama sang hatjon abulu-a, ajo tengle, akigina agalvon chu asutlhah pehjin, anei alahpeh chu ahomcheh jitan ati.

²³ Koi hile keima lama pang lou chu eidouva ahi; chule eikhop khompi lou chu athecheh ahi.

²⁴Lhagao boh chu mi sunga kona apotdoh tengle, twi beina muntin-ah avahle avahlen, cholngahna aholin; chule amu jou hih-in, Kahung potdohna ka-in mama-a chun chekit tange, ati.

²⁵Chuin ahungleh akitheh ngim le akijephoi amun,

²⁶Chutengle achen ama sanga giloujo lhagao dang sagi agapuijin; chule amaho chua chun alutnun achengji taove; chule mipa umchan chu amasa sangin anununga akhohjoji tan ahi, ati.

²⁷Chuin ahitin ahi, aman thu chucheng asei chun, numei khat mipi lah-a kon chun aw sangtah-in ajah-a, Navopma naobu le nangman nachep noi chu anunnoma ahiuve, ati.

²⁸Ahinla aman, Ahinai, ahivangin Pathen thu ja-a jopteho chu anunnomjo ahiuve, ati.

²⁹ Chuin mipi ho ahenga ahung kikhopkhop phatnun, aman, Tulai hiche khang hi khanggilou ahin; melchihna aholun, ahinla Jonah themgao melchihna tailou adang kipe lou ding ahi.

³⁰ Ijeh-inem itile Jonah Nineveh mite dinga melchihna ahi banga chu, Mihem Chapa jong tulai khanga ding ahi.

³¹ Lhanglam gam lengnun thupi tanna-a hiche tulai khang mite toh hung thoudoh khoma, amaho hi themmo ahinchan ding ahi; ijeh-inem itile aman kolmonga konin Solomon chih thu ngai dingin ahungin ahi; ahin, veuvin, Solomon sanga chungnungjo hikoma aume.

³² Nineveh khopi-a miho chun thupi tanna-a tulai khang mite toh hung ding khoma, tulai khang hi themmo ahinchansah dingu ahi; ijeh-inem itile amahon Jonah thuhil chun alung aheijun ahi; ahin, veuvin, Jonah sanga chungnungjo hikoma aume.

³³ Mi koiman meivah avah-in ningchonga guhthimin akoi ngaipoi, lo jong akhukhum ngaipoi, mi aluttehon avah amu theina dingun atunna chunga atungji bouvui.

³⁴Namit chu natahsa vah ahi; namit achima ahile, nati apumpia vah ahi; aphat lou vangle nati pumpi-a thima ahi.

³⁵Hijeh chun nasunga vah um chu athim louna dingin kivet phatnin.

³⁶Hiche jeh chun natahsa apumpia avah sohkeija, athimkom aum louva ahile, meivah vahtah-in nasalvah banga vah sohkei ding ahi, ati.

³⁷Chuin thu aseipet chun Pharisai khatnin an nehpi dingin akouvin; chuin ama alutnin, an nedingin atoutan ahi.

³⁸Chuin Pharisai pa chun an aneh masanga akisil lou chu amun adatmo lheh jengin ahi.

³⁹Chuin Pakai chun ajah-a, Tun Pharisai ho, nanghon khonle lheng apolam nasil ngim naovin; ahin nasung lamu vang hunama lahle kiloset adimsetne.

⁴⁰Vo lungthim beiho, apolam sema chun asung lam jong asem hilou ham?

⁴¹Hijongle thil nanei kham khamu chu vaicha gentheite tona dingin peuvin: chutile, veuvin; nangho dinga imajouse athenga ahi.

⁴² Ahinla, ohe Pharisai ho nadau ahi! ijeh-inem itile nanghon pudina le lounakha chule anche louhing jouse somakhat natoh jiuvin; ahinla vaihom dihle Pathen ngailut nadonpouve; ahinla chutiho jong chu donda deh louva hicheng hi nabol dingu ahi.

⁴³Ohe Pharisai ho nangho nadau ahi! ijeh-inem itile nanghon kikhopna in'a touna pipenle, kailhanga min chibai naboh dingu nadeijun ahi.

⁴⁴Ohe, danthusun ho, Pharisai ho le miphalhem ho nadau ahi! ijeh-inem itile nangho buikhuh kimu lou, mihon he louva achung ajotlejiu tobang nahiuve ati.

⁴⁵Chuin danthu them ho khatnin adonbutnin ajah-a, Houhil, nangman chutia nasei chu keiho jong neihoutomu ahi, ati.

⁴⁶Chuin aman, Ohe, danthu themho nangho jong nadau ahi! ijeh-inem itile nanghon poh-a kilom lou pohgih mi napohsah-un, nanghonla pohgih chu nakhut jung khatchan jong nakhoiji pouve.

⁴⁷Nangho nadau ahi! ijeh-inem itile naputeu napateu vin themgaoho athatnun, nanghon alhanu nasempeh jiuvin ahi.

⁴⁸Chutichu ahi jeh-in hichu ahetoh nangho nahiuvin, napu napateu thilbol chu naphasah uve; ijeh-inem itile amahon amaho chu athatnun, nanghon alhan natungun ahi.

⁴⁹Hijeh chun Pathen chihna-in jong ahiti seije, Keiman ahenguva themgaoho le solchah ho soling ting; chule amahon abang athaova abang abolset dingu ahi;

⁵⁰Chutia chu Abel thisan kiso-a pat, maicham le Pathen houin kikah-a Zachariah athaova athisan kisogei, vannoi leiset bul kiphu tila patna themgaoho jouse thisan kiso chu, hiche tulai khang mite chunga aphu kila ding ahi.

⁵¹ Ahi, nangho jah-a kasei ahi, tulai mite chungabou kila ding ahi.

⁵²Ohe, danthu themho nadau ahi! ijeh-inem itile nanghon hetna kot-heh nalamangun, nanghola nalutpouvin, mi alut dingla nakhamun ahi, ati.

⁵³Chuin ajah uva thu chucheng asei phat chun, danthu sunho le Pharisai hon lunghan sah-a thu tamtah seisah din, hachang phinin aphin pan taovin ahi.

⁵⁴Amoso theina diuvin akama kona phabep khat jahdingin aholun, chule achangun ahi.