Read Thado Chin Luke 12 Bible Online

Luke 12 - Thado Chin bible

Luke 12

¹ Hiche pet chun mipi atama tam, khat chunga khat kal leuva ahung kikhop phat chun, aman amasa penin aseijuite jah-a, Pharisai ho chola chun kihong phaovin; hichu phatlhem ahi.

² Ahinla akiphongdoh lou ding akisela imacha aumpoi, chule hetdoh lou ding imacha aki-ima jong aumpoi.

³Hiche jeh-a chu muthima naseichanu chu khovah-a kija ding ahi; chule indan sungnunga nabenga guhthima naseiju chu, in chunga kisam ding ahi.

⁴Chule kajol kagol nangho kaseipeh nahiuve, tahsa thattheija akal ima lo thei lou chu kicha hih-un.

⁵Keiman nakichat dingu hilunge; atha nunga damuna lelutna ding thaneina neija ama chu kichauvin, najah uva kasei ahi; ama chu kichauvin.

⁶Vasilih nga khu paisa ni manna kilhaji louham? Ahin, alah uva khat jengcha jong Pathen angah suhmilin aumkhapon ahi.

⁷Ahin nalu chunguva nasamjang jouseu sana kisim sohkeija ahi. Kicha hih-un; vasilih tamtah sanga nangho lujo nahiuve.

⁸Chule najah uva kasei ahi, Koi hile miho anga keima eiseidoh chan chu, Mihem Chapan jong ama chu Pathen vantil teho anga aseidoh ding ahi:

⁹Amavang miho anga keima eiseileppa vang chu, Pathen vantil teho anga ama jong kiseilep ding ahi.

¹⁰ Chule Mihem Chapa chunga thuse sei jouse chu kingaidam ding ahi; Lhagao Theng taitoma vang chu kingaidam lou ding ahi.

¹¹ Chule amahon nangho kikhopna-a vaipoho hengle thunei ho henga nakai tengule, Ipi-a iti kadonbut dingham, ipi kasei dingham tin lungkham hih-un;

¹²Ijeh-inem itile apettah chule Lhagao Thengin nasei dingu nahil dingu ahinai, ati.

¹³Chuin mipi lah-a kon chun mikhatnin, Mihil, nei le gou eikihoppi dingin ka-u jah-a seijin, ati.

¹⁴Ahivangin aman ajah-a, Mihem, kon nangho chunga vaihomle neile gou hoppeh-a eisemem? ati.

¹⁵Chuin ajah uvah, Ching theijun, neipap kiloset jouse-a konin kikangseuvin; ijeh-inem itile mihem khat hinkho hi anei le gou haona-a chu uma ahipoi, ati.

¹⁶Chuin aman ajah uva thulem khat aseijin, Mihao khat gam sungah neh aput behseh jengin;

¹⁷Hichun aman alungthimin, Kalousoh chengse kakoikhomna ding munla aumpon; i-kalo ding hitam? ati.

¹⁸Chuin aman, hitin bolinge: kachangsal chengse phelhang ting, asanga lenjo cheh-in sangkate; chule kalousoh jousele kathil jouse chua chun koikhom inge.

¹⁹Chutengle kalhagao jah-a, Lhagao, nangman kum sottah-a dinga thil tamtah nakikhol khom ahitai; kicholdon, nenlang donin, nomsa tah-in umin tinge, ati.

²⁰Ahinla Pathen'in ama jah-a, Vo lungthimbei, tujana hi nahinna nanga kona kiladoh ding ahitai; chule nathil kholkhom chengse chu koija hitantem? ati.

²¹Pathen'a dinga haolouva ama dinga sum kikhola chu chutobang chu ahi, ati.

²²Chuin aman aseijuite jah-a, Hijeh-a chu nangho jah-a kasei ahi, I-kaneh ding hitam tin nahinna dingule, i-kasila kachen ding hitam tin natahsa dingun lungkham hih-un.

²³Ijeh-inem itile anneh sanga hinkho, nihchen ponsil sanga tahsa thupijo ahi.

²⁴Va-ah hokhu ngaitouvin; amahon tula atupouvin, atla a-at pouvin; pang le changsal la aneipouvin; ahivangin Pathen'in amaho khu avahnai. Nangho vacha sanga iti nalutjoh-u hitam?

²⁵Chule nangho lah-a lungkham hatna ahinkho tongkhat jopsaobe thei koi nahiuvem?

²⁶Hijeh chun nanghon aneopenbon nabol thei louvule, adangdang dinga ibola lungkhama nahiuvem?

²⁷ Molhoipah khu iti khanham ngaitouvin: hiche ho khun tongla atonggim pouvin, patla akheh pouvin; ahivanginla keiman kaseipeh nahiuve, Solomon jeng jong aloupina jouse-a akivon chun, hiche molhoipah khattoh kibangin akijem hoi pon ahi.

²⁸Chule jaova hampa tunia uma jinga lhum sunga kileh lutta ding jengbon Pathen'in achuti jeple, Vo tahsan lhomho, chusanga chu aman nangho najepjoh lou dinguham?

²⁹Chule ipi naneh dingu, ipi nadon dingu, hichu hol hih-un, chule lung dongin jong um hih-un.

³⁰Ijeh-inem itile vannoi namtinin hitiho jouse chu aholjiuve: ahin hitiho chu nanghon nangai chaove ti na-Pau vin ahenai.

³¹Ahivangin nanghon Pathen lenggam joh chu holun, chutengle hicheng jouse hi naki pehbe dingu ahi.

³²Hon lhomho, kicha hih-un; ijeh-inem itile nangho lenggam pehding hi na-Pau lungdei ahi lheh jenge.

³³Naneichan-u joh-unlang mivaicha gentheiho peuvin; chule guchan amaiphah louna, nget nin jong anehset louna, van'ah sumbom lui thei lou kisemun, kemlou sum kikholun.

³⁴Ijeh-inem itile nagou umna-a chu nalungu jong umding ahi.

³⁵ Natai kigeh-un, chule nathaomei vahsah jingun;

³⁶ Chule moupui na-a kona ahunga, kot ahin kiu phat phatle hongpai jeng dinga a-pakai lam kat jinga um mitoh bangun.

³⁷Pakai ahunga soh kiging jinga um ahungtoho chu anunnom ahiuve; keiman nangho tahbeh-a kaseipeh nahiuve, Aman atai akigeh-a, amaho chu ankong aumsah-a, ahenguva hunga amatah ajenleuva pang ding ahi.

³⁸Chule ama jan dan nina ahim, jan dan thumna ahima ahunga, chuto banga chu ahung to-a ahile, hitobang soh ho chu anunnom ahiuve.

³⁹ Chule itih phatna gucha ahung ding inneipun ahet hile, kiging jingintin, phetvang dinga a-in chu adalhah louhel ding ahi, hichu nanghon heuvin.

⁴⁰Nangho phasademin umum; ijeh-inem itile nagel lou pettah-ule Mihem Chapa chu hung ding ahi, ati.

⁴¹Chuin Peter'in, Pakai, hiche thulem chu keiho chang dinga naseiha, mi jouse dinga naseiham? ati.

⁴²Chuin Pakaiyin, Neiching tahsan umtah le chingtah, aphatcha achan cheh-u an hoppeh dinga a-pakaipan a-insunga jouse chunga apipua apansah ding chu koiham?

⁴³Apakai ahung tenga chutia bol ahungto soh chu anunnom ahi.

⁴⁴Nangho tahbeh-a kaseipeh nahiuve, Ama chu anei jouse chunga apipua apansah ding ahi.

⁴⁵Amavang sohpa chun, Ka pakai ahung geije tihen, soh numei ho le soh pasal ho deng pan tahen, chule nehen, donhen khamtale,

⁴⁶Hiche sohpa chun aginchat lou nitahle, ahetlou pettah-a a-pakaipa chu hunga; ama chu tum ni asoa, achan chu tahsan louho lah-a akoi ding ahi.

⁴⁷Chule soh a-pakai lung lam he-a, phasadema umlou, chule alunggot banga bol lou chu tamtah vei kivo ding ahi:

⁴⁸Ahin hetlouva voh ding dola thilbola vang chu kivo lhom ding ahi. Ijeh inem itile tamtah kipe henga chu tamtah kibeng ding; chule koi hile atamjocheh kivopsah henga chu atamjo cheh kingeh ding ahi.

⁴⁹Keima vannoi leiset chunga mei lehlha dinga hunga kahi; tutah jeng jong hin kadohtale katinave!

⁵⁰ Ahivangin baptize chan ding kaneijin, chuche kamolso masangse-a iti kaningnoh hitam!

⁵¹Lei chunga chamna lensah dinga hunga neingai touvem? Ahipoi, kaseipeh nahiuve, asukhen dingjoh-a hung kahibouve:

⁵²Ijeh-inem itile tukal insung khatna mi nga umchu ni-a kikhen diu, nin thum adouva, thumin ni adou ding ahi.

⁵³ Pan achapa adou ding, chapan apa adou ding, nun achanu adou ding; chanun anu adouding, teh-in amounu adou ding, mouvin atehpi adouva kikhento diu ahi, ati.

⁵⁴Chuin aman mipi ho jah-a jong chun, Nanghon lhum lama mei soh namu tengule, go ju ding ahi nati paijen jiuvin; chule ahitahbeh jin ahi.

⁵⁵Chule lhang lama kona hui anunle, sa lheh ding ahi natiji uvin; hi jong chu achutijin ahi.

⁵⁶Nangho miphalhem ho, nanghon leiset chungle van umjela nasuto thei naovin, tulai hiti thil umchan iti nasuhto thei lou uham?

⁵⁷Chule ibola nanghon adihlam chu nakingaito lou uham?

⁵⁸Ijeh-inem itile naheh patoh thutan vaipo henga nache tengule, lampia ama-a kona kiteldohna dingin kihabolin, achuti loule aman nang thutan vaipo henga nacham louva nakai ding ahi; chule thutan vaihom chun sottol miman khutna pen natin, sottol miman chun songkul'a nakhum ding ahi.

⁵⁹Kaseipeh nahi, nangman paisa san khat geija nasahsoh masangse-a, iti jongle chua kona napotdoh louhel ding ahi.