Read Thado Chin Luke 14 Bible Online

Luke 14 - Thado Chin bible

Luke 14

¹Chuin ahitin ahi, cholngah nin Pharisai ho pipu khat in'a an nedingin achen, amahon avelhi jingun ahi.

²Chuin veuvin, amasanga chun akhut akeng pom khat aumin.

³Chuin Jesu'n adonbutnin danthu themho le Pharisai ho jah-a thu aseijin, Cholngah ni-a boldam danngai ham? ati.

⁴Amahola athipbeh-un ahi. Chuin aman ama chu alan aboldamin, chuin achesahtan ahi.

⁵ Chuin aman ajah uva, Nalah uva koi nahiuvem, asangan ahim abongchal ahim twikul'a lhalut tale, cholngah ni-a agaloidoh paijeng lou dinga? ati.

⁶Chuin amahon hicheng chu adonbut thei kit tapouve.

⁷Chuin akikouhon touna phapha alhenu amu phatnin, thulem khat aseijin ajah uva,

⁸ Nangho mi khattouvin moupui golvahna-a nakou tengule touna pipen-ah tou hih-un; ajole nangho sanga ja umjo akou umkhantin;

⁹Akoupa le ahungpa chu anilhonin hungintin najah-a, Hichepa hi mun otnin ati ding; chutengle nangma jahcha puma anoinung pena natou ding ahi.

¹⁰Amavang nangma nakikou tengle, chenlang anempena touvin; hitichu hile nakoupa ahung tengle najah-a, Jol, sangjep-ah toutango tikhat nintin; hiteng chule ankonga natoupi jouse maija chu choi-atna naum ding ahi.

¹¹ Ijeh-inem itile ama kichoisang jouse chu kisunem ding; chule ama kineosah-a chu choisanga umding ahi, ati.

¹²Chuin aman akoupa jah-a, Nangman sun hijongle jan hijongle golvah nabol tengle, najol, nagol jong, nasopi ho jong kou hih-in, nainkote le naheng nakom mihaoho jong kou hih-in; ajole amahon jong nangma kouvin natin sadoh getnun nate.

¹³Ahin golvah nabol tengle, mivaicha, mi tikimlou, elbai, mitcho koujo bouvin;

¹⁴Chule nangma nanun nom ding ahi; ijeh-inem itile amaho chun lesahna ding ima aneipouve: ajeh chu mi chondihho tho kit tengle nangma nakisa ding ahi, ati.

¹⁵Chuin ankonga atoupiho khatnin hitiho chu ajan, ajah uva, Pathen lenggama changlhah ne dingpa chu anunnoma ahi, ati.

¹⁶Ahin aman ajah-a, Mi koiham khatnin jan golvah loupitah abolin; chule mi tamtah akouvin;

¹⁷Chuin anneh phatnin aman akouho chu, Hungun, tun ijakai aphasadem cheh ahitai ti dingin asohpa asolin ahi.

¹⁸Chuin amaho chu thakhat tah-in ana thuphaove. Amasapenpan ajah-a, Keiman lou kachon, kache-a kagavet lou akhoh-e; katao ahi, neilha ongin, ati.

¹⁹Chuin khatpan, Keiman bongchal to nga kachon, aphat aset patep dinga che ding kahi; katao ahi, neilha ongin, ati.

²⁰Chuin khatpan, Keiman ji kaneijin, hijeh chun hung theiponge, ati.

²¹Hijeh chun sohpa chu ahungin hitiho chu a-pakaipa henga alhutnin ahi. Chutah-in inneipu chu alunghangin asohpa jah-a chun, Chedoh loijin khosung lamlen le khopi sung thokah juija gachen, chule mi vaicha, mi tibukimlou, chule mitcho, elbai hikoma gapuilutnin ati.

²²Chuin sohpa chun, Pakai, neithupeh bangin kabolin, ahivangin mun a-ong nalaije, ati.

²³Chuin pakai chun sohpa jah-a chun, Nangma lamlhongle daipamah chen, chule ka-in adimna dingin, miho gajollut teiteijin.

²⁴Kaseipeh nahi, Kami kouho chu khatchan jong kagolvah an atepkhahlou dingu ahi, ati.

²⁵Hichun mipi hon tamtah amatoh alhonun; chuin ama akiheijin ajah uva,

²⁶ Koi hijongle kahenga hunga apa, anu, aji, achate, asopipaho, asopinuho chule ama hinkho jeng jong itcha louhela bollou chu kaseijui hi thei lou ding ahi.

²⁷ Koi hile athingpel kiputle-a kanung hin jui lou chu kaseijui hi thei lou ding ahi.

²⁸Ijeh-inem itile insang sah ding go-an touva ijat lut dingham, chule ajojou ding hina ajo joulou dingham, tia sutoh masa lou nalah uva koi nahiuvem?

²⁹Ama chun abul phutdoh hen jouta hihle, ija kihe-am, amuho jousen ama chu nuisat untin,

³⁰Hichepan asapanin, ajou joutapoi, ti getnunte.

³¹Ahiloule leng khat leng chom khattoh kisatto dingan, asat dinga hung mi sangsomni chu mi sang soma ajo ding hina ajolou dingham, ti touva geltoh masa lou dinga koiham?

³²Ajo lou dinga ahile, khat chu gamla tah-a aum petna kichamna thutep thum dinga palai asol ding ahi.

³³Hitobanga chu nangho lah-a jong anei chengse dalha louva chu kaseijui hi thei lou ding ahi.

³⁴Chi hi aphai, ahivangin chi jeng jong tamta henlang hile ipi-a ki-alsah dingham?

³⁵Leining dinla aphapon, bong-eh din jongla aphatna umlou ahitan; min hichu pam lama apaidohjin ahi. Angaina ding na neijan ngaihen, ati.