Read Thado Chin Luke 15 Bible Online

Luke 15 - Thado Chin bible

Luke 15

¹ Hichun kaidongho jousele michonseho jouse athu ngai dingin ahengah ahung naijun ahi.

²Chuin Pharisaiho le danthu sunhon, Hichepan michonseho aloijin, amahotoh an ane khome atiuvin aphun gel taovin ahi.

³Chuin aman amaho jah-a thulem hiche hi aseije,

⁴Nangho lah-a koi nahiuvem, kelngoi jakhat neija, alah-a khat amanle amanglou somko le ko chu gama dalha-a, avahmang khat chu amudoh kahse-a hol louva?

⁵Chule amudoh tengle kipahtah-in alengkouva apujin;

⁶Chule in ahung lhun tengle agolho le a-inhengho akou khomin, ajah uva, Neikipa piuvin; ijeh-inem itile kakelngoi manga chu kamutai, ati.

⁷Kaseipeh nahiuve, chutobang chun alung hei ding khoh lou michonpha somko le ko chunga sanga, michonse khat lungheija van'a kipana umding ahi.

⁸Ahiloule numei koiham dangka som neija, khat amansahle meivah dea, chule in theh-a amudoh kahse-a gunchu tah-a hol lou dinga?

⁹Chule amanun amudoh tengle agolhole a-inhengho akou khomin, Neikipa piuvin; ijeh-inem itile kadangka mansah chu kamutai, atijin ahi.

¹⁰Kaseipeh nahiuve, chutobang chun Pathen vantilte angah michonse khat lunghei chungah kipana aumjin ahi, ati.

¹¹Chuin aman, Mikhatnin chapa ni aneijin:

¹²Chule aneojopa chun apa jah-a, Hepa, kagou chan ding chu neipen, ati. Chuin aman anei chu ahop pehtan ahi.

¹³Chuin ni chomkhat jouvin aneojopa chun abonchan achom khomin, khol gamlatah khatnah achen; chuin aman chukoma chun anei chengse chu kinomsahnan asumang sohtan ahi.

¹⁴Chuin aboncha asuhmang phatnin, chuche gama chun kel nasatah alhatan ahile, hichun ama chu alhasam pantan ahi.

¹⁵Chuin ama achen, chuche gam miho khat agabelin; chuin amapa chun avoh vah dingin alou lama asolin ahi.

¹⁶Chuin voh neh imahoh hochu neh-a oiva ding ago lheh jengin, koimanla apepon ahi.

¹⁷Chuin akhahdoh phatnin, Kapa in'a asoh thalah ho khujatpi nehkhop le nehval changlhah neija, keimala gilkela thiding kahi!

¹⁸Keima kipat ingting kapa henga chengting, ajah-a, Pa, van douna le nangma mitmun kachonse tai;

¹⁹Kei nachapa tihoi kahitapoi; nasoh thalah ho khat bangin neisemin gatitange, ati.

²⁰Chuin ama akipatnin, apa henga ahungtai. Ahin ama gamlatah agei nalaijin, apan amun, alung asen, alhaijelin, angonga achun, achopchuh chuh jengin ahi.

²¹Chuin achapa chun ajah-a, Hepa, keima van douna le nangma mitmun kachonse tai: nachapa tihoi kahitapoi; nasoh thalah ho khat bangin neisemin, ati.

²²Ahivangin apan asohho jah-a, Pon phapentah galadoh loijunlang silpeh-un, chule khutjem akhutna bupeh-un, chule kengchot sepeh-un.

²³Chule bongnou kivah thao chu hinlaovin lang thatnun, chule neuhitin, nomsa tah-in umu hite:

²⁴Ijeh-inem itile hiche kachapa hi athisa hing kit ahin; chule amangsa kimu kit ahi, ati. Hitichun nop abol pantaove.

²⁵Hiche petna chun achapa lenjo chu louva um ahin; chuin ahunga in kom ahung naijin, ima kitum ginle lam gin ajan;

²⁶Chuin aman asohho khat akouvin, Hikhu ipi bola hiuvam? tin adongin ahi.

²⁷Chuin aman ajah-a, Nanaopa hunga ahile napan damsela amu kit jeh-a bongnou kivah thao chu atha ahi, ati.

²⁸Hichun ama alunghangin, in'a che ding anomtapon ahi. Hijeh chun apa apotdoh-in, agajolin ahi.

²⁹Ahivangin aman apa adonbutnin, Ven, keiman kum hijat hi nangma kajenin, khatveicha jong nathu kapal lhahna aumpoi; ahivanginla kagol hotoh golnop kabolna dingin kelnou khatcha jong imatih-in neipekhapoi.

³⁰Ahin hiche nachapa notiho koma nanei chengse nemanga sumanghela hi ahung hungin bongnou kivah thao nathapeh-e, ati.

³¹Chuin apan ajah-a, Chapa, nangma kakoma umjing nahin, chule kanei jouse nanga ahi.

³²Hiche nanaopa vanghi athisa hing kit ahin; amangsa kimu kit ahi; hijeh-a chu nom satah leh kipahtah-a i-um dingu ahi, ati.