Read Thado Chin Luke 17 Bible Online

Luke 17 - Thado Chin bible

Luke 17

¹Chuin aman aseijuite jah-a, kipal lhuh umlou thei ahipoi, ahinla kipal lhuh sahpa chu ada ahi!

²Hichepa chun hiche aneochaho lah-a khat akipal lhuhsah sangin, angonga sumhei song kikhaihen, twikhanglen'ah kileh lutle ama dinga phajo ahi.

³ Nangho kichih theijun, nasopi nangdouna-a achonsetle phoh-un; chua alung aheija ahile ngaidamun.

⁴Chule ama nachunga ni khat sunga sagivei achonsetna, chule sagivei nahenga ahung kiheija, Kakisih-e, atile, ngaidamin ati.

⁵Chuin solchah hon Pakai jah-a chun, Pakai, katahsanu khansahben atiuve.

⁶Chuin Pakaiyin, Nanghon tahsan na ankam-mu te beh nanei uva ahile, hiche thingtheimi phung jah-a hin, Kibotdoh inlang twikhanglen'a kiphut in tileu chun, nathuva nung ding ahi.

⁷Ahinla nangho lah-a koi nahiuvem, asohpan lou kaija, ahiloule gan chinga louva kona ahungleh henga, tule tuhin hungin, an nedingin touvin tia sei dinga?

⁸Chutia titah sanga, Kaneh ding an neigot peh-in, keiman kaneh jou kadon jou kahsen natai kigeh-inlang neijenin; chujoule nangin naneh-a nadon dingbou ahi, atijoh lou dingham?

⁹Chuche sohpa chun thupeh dungjuija abol jeh-a chu a-pakaipan apachat ngaijem? Katahsanpoi.

¹⁰Chutobanga chu nanghon jong nakithupeh chengseu nabol jousoh tengule, Soh phachom lou kahiuve, kabol dingdol bep kabolu ahi, tiuvin, ati.

¹¹Chuin ahitin ahi, Jerusalem jonin achen ahile, Samaria le Galilee gam ajotpan ahi.

¹²Chuin ama kho khatna alutnin ahile, miphah somin anakimutopin, amaho chu gamlata-a adingun,

¹³Pipu Jesu, neilungsetnun, tin hasaptah-in asamun ahi.

¹⁴ Chuin aman amaho chu amu phatnin, ajah uvah, Cheovinlang thempuho gakivetsah uvin, ati. Chuin ahitin ahi, acheuva ahile adam thengpa taove.

¹⁵Chuin alah uva khat chun adamthengtah chu ahet phatnin, akinunglen, aw sangtah-in Pathen avahchoijin;

¹⁶Chuin akengphang bulah aboh khupmin, athangvah tai; ama chu Samaria mi ahi.

¹⁷Jesu'n adonbutnin, Som kisutheng hi louham? Mi ko hoibaham?

¹⁸Hiche chidang namdangpa tailou adangho Pathen vahchoi dinga hung kinungle-a akimupoi, ati.

¹⁹Chuin aman ajah-a, Thouvin, chetan; natahsanin nadamsah ahitai, ati.

²⁰Chuin, Pathen lenggam itih-a ahung lhun ding Pharisai hon adongun ahile, aman adonbutnin, Pathen lenggam chu mu theijin ahungpoi.

²¹Veuvin, hikomah, ahiloule khukomah kiti lou ding ahi; ijeh-inem itile veuvin, Pathen lenggam nalah uva aume, ati.

²²Chuin aman aseijuite jah-a, Nanghon Mihem Chapa hinlai nikhoho khat beh namu nom dingu, ahivanga namu lou dingu nikho chu hung lhung ding ahi.

²³Chutengle, veuvin, khukomah; veuvin, hikomah tia najah uva asei dingu ahi; ahivangin nangho che hih-un, amaho nung jong jui hih-un;

²⁴Ijeh-inem itile kolphe vannoi kolmong lang khat lama aphetna, kolmong lang khat geija asalvahji banga, Mihem Chapa hung ni jong chutobang ding ahi.

²⁵Ahivangin hiche masanga chu thil tamtah athoh ding, chule hiche khang mite paija umtei ding ahi.

²⁶ Chule Noah hinlai thilsoh umchan bang chu, Mihem Chapa nikho jongle hi ding ahi.

²⁷ Noah kong'a alut ni gei chun amahon aneuvin, adonun, akichengun, chule akichensah-un; chuin twisang ahung lenin, abonchauvin asumang heltan ahi.

²⁸ Chutobangma chun Lot hin laijin jong asoh-in: mihon aneuvin, adonun, thil ajoh-un, thil achouvin, aphutnun, chule in asauvin;

²⁹Ahivangin Sodom kho-a kona Lot apotdoh nitah-in van'a konin mei le kath ahung lhan, abonchauvin asumanghel tan ahi.

³⁰Hiche tobanga chu Mihem Chapa hung kiphondoh ni jongle hi ding ahi.

³¹ Hiche ni chule in chunga uma chu insunga athil um kilah dingin hungkum hihhen; chutima chun loujaova uma jong hung kinungle kit dahen.

³² Lot inneipi chu geldoh-un.

³³ Koihile ahinna huhdoh nading hola chun achan ding ahi; chule ahinna chana chun akihuhbit ding ahi.

³⁴Kaseipeh nahiuve, chuche jan chule mi ni jalkhun khatna lumding; khat chu kila-a, khat chu kidalha ding ahi.

³⁵Numei nin sumhei khatna agoi khom ding; khat kila-a, khat kidalha ding ahi.

³⁶Mi ni louva umding; khat kila-a, khat kidalha ding ahi, ati.

³⁷Chuin amahon adonbutnun, ajah-a, Hoija-em, Pakai? atiuve. Chuin aman, Thilong umna-a chu muthong kikhom ding ahi, ati.