Read Thado Chin Luke 19 Bible Online

Luke 19 - Thado Chin bible

Luke 19

¹Chuin Jesu alutnin Jericho lailung ajotnin ahi.

²Hichun veuvin, amin Zacchaeus atiu mi khat aumin; chule ama chu kaidong pipu ahin, mihao ahi.

³Ama chun hoipen khu Jesu ahidem tin mu tei agon, ahivangin ama minem ahi jeh-in mipi jeh chun amu theipon ahi.

⁴Chuin ama masang lama analhai jel-in, ama anave dingin theiba chungah anakale; ijeh-inem itile aman hilam chu aho ding ahi.

⁵Chuin Jesu chukom mun chu ageijin, chunglam agahven ahile ama chu amun, ajah-a, Zacchaeus, hung kum loijin; ijeh inem itile tunia na-in'a kalhun ding ahi, ati.

⁶Chuin ama ahung kum loijin, kipahtah-in a-in'a alhunsah tan ahi.

⁷Chuin hichu amu phatnun, Michonse in'a lhungin acheta getne atiuvin, abonchauvin aphuntaove.

⁸Chuin Zacchaeus adingdoh-in, Pakai jah-a chun, Ven, Pakai, kanei jouse akeh khat mivaicha genthei pengkate; mi koija hile lepthol-a kalah aumle ajat li-in lenge, ati.

⁹Chuin Jesu'n ajah-a, Tunin hiche in'a hin huhhingna alhungtai, ijeh-inem itile ama jong hi Abraham son ahi.

¹⁰ Ijeh-inem itile amangsa chu holdoh-a huhhing dinga Mihem Chapa hung ahi, ati.

¹¹ Chuin mihon hicheng thu chu angai pettah-u chun, Jerusalem anaitah jeh-ule Pathen lenggam chu chupet tah-a chu kilangdoh paijeng dinga angaito jeh-u chun, aman aseibeben thulem khat aseijin.

¹²Hijeh chun aman ahiti seije, Miluntah khat lenggam gakilah-a chule hung kile kit dingin khol gamlatah-a achen ahi.

¹³Chule ache kon chun asohte mi som akou khomin, talent som apen ajah uva, Kahung kahsen hiche-a hin ana kiveijun, ati.

¹⁴Ahivangin agam miten ama ahotbolun, anunga palai asolun, kachunguva leng changa vaipo dingin hichepa hi kanompouve, agah ti sahtaove.

¹⁵Chuin ahitin ahi, ama alengchana ahung kit phatnin, sum apeh asohteho chun ipipi ijat aveikan um ti hetna dingin, amaho kouna ding thu apetan ahi.

¹⁶Chuin amasapa chu ahungin a-angah, Pakai, na sana sum chun talent som kaveikane, ati.

¹⁷Chuin aman ajah-a, Nabol aphai, sohpha; nangma themcha khat chunga tahsan naum jeh chun, kho som chungah vaipon pangin, ati.

¹⁸Chuin abanapa chu ahungin ajah-a, Pakai, na sana sum chun talent nga kaveikane, ati.

¹⁹Ama jah-a jong chun, Nang jong kho nga chunga vaipon pangin, ati.

²⁰Chuin khatpa ahungin, Pakai, ven, na sana sumchu hiche hi ahi, ultheh pona kachuna, kakoihe ahi:

²¹Ajeh chu nangma mikhel nahin, nakoina lou pouvah naladoh jin, natuna lou pouvah na-atjin ahile nang kakichan ahi, ati.

²²Aman, Vo nang soh gilou, nakama thupot dungjuija nathu katan ding ahi: kakoina louva kalahjia, katuna louva ka-atji nahet ahi.

²³Chuti an kasum chu ibola sumkhol pungna-a nanakoida ham? Chutile keiman kasum athoitoh kilahtha tadinga, ati.

²⁴Chuin aman akoma dingho jah-a chun, Talent chu lahpeh unlang talent som neipa chu petaovin.

²⁵(Chuin amahon ajah-a, Pakai, aman talent som aneinai, atiuve.)

²⁶ Najah uva kasei ahi, aneichana chu kipe ding ahi; anei lou vang chu aneichasun jong chu ama-a kona kilahmang pehding ahi.

²⁷Hiche achunguva kavaipoh ding nomlou ho eimelmaho vanghi hikoma hinpuijun, ka-ang sunga thatnun, ati.

²⁸Chuin chucheng asei jou chun, Jerusalem lam jonin ama alamkaijin achetou taove.

²⁹Chuin ahitin ahi, Olivet atiu molsang Bethphage le Bethany ahungnai phatnin, aseijuiho mi ni asolin,

³⁰Namasang jon lhona khosunga khun lut lhonin; nalut lut lhonle sangan nou kihen koima touna khahlou laihel namu paijen lhon ding ahi; hichu sut lhonin lang hinkai lhonin.

³¹Chule, Ibola nasut lhonham tia khattou nadong lhona aumle, Pakaiyin manna nom aneije, ti lhonin, ati.

³²Chuin akisolte ni chu ache lhonin ahile, ajah lhona aseibang bang chun agamu lhonin.

³³Chuin asut lhonle aneiten ajah lhona, Sangan nou chu ibola nasut lhonham? ati.

³⁴Chuin amanin, Pakaiyin manna nom aneije, ati lhone.

³⁵Hichun Jesu henga ahinkai lhonin; chuin amahon aponu sangan nou chunga chun aphaovin, achunga Jesu atousah-un ahi.

³⁶Chuin achen ahile, amahon aponu lam dunga aphaovin ahi.

³⁷Chuin ama ahung naija, Olive molsang kumlhahna ageijin, aseijuite mipi chu hapan akipah athanom un, thilbol kidang dang abol amu chengseu jal chun aw sangtah-in Pathen avahchoijun,

³⁸ Pakai mina hunga lengpa anun nome, van'ah cham lenghen, chungnung penah loupina hihen, atiuvin ahi.

³⁹Chuin mipi lah-a kon chun Pharisai ho kimkhatnin ajah-a, Houhil, naseijuite phoh-in, ati.

⁴⁰Chuin aman adonbutnin; Najah uvah kasei ahi, Hiteho thipleu, songho ao doh ding ahi, ati.

⁴¹Chuin ahung naija khopi chu amu phatnin, akachamin,

⁴²Ohe, nangma tah-in tuni hin lungmonna thuhi kihet tave le chun! Tunla nahet louna dinga ki-ima ahitai.

⁴³Ijeh inem itile nagalteuvin nakimvela kul aset sanga, naum kimvela, naum chah dingu nikho hunglhung ding ahi,

⁴⁴Nasunga nachatetoh nangma leiset toh kibanga abola, nalah-a song khat chunga khat um louhela alha dingu ahi; hichu nakivil laiju nahet lou jeh ahi, ati.

⁴⁵Chuin ama houin'ah alutnin, chuche sunga thil johho le thilchoho chu anodoh panin,

⁴⁶ Ajah uva, Ka-in chu taona in hi ding ahi, tin akisune; ahin nanghon gucha michom kokhuh-in nasemtaove, ati.

⁴⁷ Chuin nisehle houin'a chun ahiljin ahi. Ahin thempu pipuiho le danthu sunho, chule miho pipuho chun ama suhmangna ding aholun;

⁴⁸Ahivangin mipi chengse chun aboncha ama thu angaijuva, ama jenga akai jing jeh-u chun alonaje ding aholmovin ahi.