Read Thado Chin Luke 2 Bible Online

Luke 2 - Thado Chin bible

Luke 2

¹Chuin ahitin ahi, hiche nikholai chun Caesar Augustus'in leiset chunga cheng jouse min sut ding thu apen ahi.

²Hichu Syria gama Cyrenius gamvaipo ahilaija min kisutna amasapen ahi.

³Hichun mi jouse chu amin sun dingin ama ama khopi cheh-a acheuvin ahi.

⁴Chule Joseph jong chu David inko le aphung ahi jeh chun, Galilee gama Nazareth kho-a konin, Juda gama David khopi Bethlehem atiuva chun,

⁵Ajihol Mariam gaihamset chutoh amin sun dingin achetan ahi.

⁶Chuin amani chukoma aumpet lhonin, Mariam aso phat alhingtan ahi.

⁷Hichun achapa masapen ahingin; chuin ponin ajelin, jinlhun ina mun a-on lou jeh chun, gan ankong sunga alupsahtan ahi.

⁸Chule hiche gama chun lou jaova tol lhanga geh kelngoi chingho aumun, jan-in akelngoi honu angah-un ahi.

⁹Chuin, veuvin, Pakai vantil khat akomuvah ahung dingin, chule Pakai loupi chun akimvelu asalvah jengtan ahi: hichun amaho akichatangei jengun ahi.

¹⁰Chuin vantil chun ajah uva, Kicha hih-un, ijeh-inem itile, veuvin, keiman mijouse-a dinga hachangpa kipana thupha chu nangho kahin pohpeh nahiuve.

¹¹Ajeh chu tunin nangho dingin David khopi-ah Huhhing-a khat apengtai, ama chu Pakai Christa ahi.

¹²Chule hiche hi nangho dinga amelchihna ding ahi: Nanghon naosen pona kijela gan ankong sunga lum nagamu dingu ahi, ati.

¹³Chuin phulou helouvin vantil chutoh vanmi janel honpi ahung umun, Pathen avahchoijun,

¹⁴Chungnung pena Pathen loupi hen, chule leichunga miholah-a chamna le alunglhaina umhen, atiuvin ahi.

¹⁵Chuin ahitin ahi, vantil ho chu amaho koma kona van'a achemang phatnun, kelngoi chingho chun, Cheovin, Bethlehem'a cheohitin, tu-a Pakaiyin eihetsah-u thusoh hi gaveo hite, akitiuvin ahi.

¹⁶Chuin amaho acheloijun ahile, Mariam le Joseph toh gan ankong sunga lum naosen chu agamudoh taovin ahi.

¹⁷Chuin hichu amu phatnun, hiche naosen thudol ajah uva kisei chu ahetsah sonle taovin ahi.

¹⁸Chuin ajah uva kelngoi chingho thusei chu ajapha jousen kidang asauvin ahi.

¹⁹Mariam vang chun thu kisei jouse chu alungin angaiton, aching jingin ahi.

²⁰Chuin kelngoi chingho chun ajah uva kisei bang banga thil amu chengseu le athil jah chengseu jal chun, Pathen choi-at le vahchoi tothon akiletaove.

²¹ Chuin ani get nin cheptan ding nikho alhingtan, amin Jesu asahtaove, hichu naobu-a aum masanga vantil chun asahsa ahi.

²² Chuin Mosi thupeh dungjuija akisuhtheng nikho alhin phatnin, ama chu Pakai henga peh dingin Jerusalem'a ahin puijun,

²³ (Pakai danthu bu-a, Naobu phukeh-a hung pengdoh pasal jouse chu, Pakaiya dinga atheng kiti ding ahi; ati banga chu;)

²⁴Chule Pakai danthua, vakhu kop khat hijongle vapal nou ni hijongle tia kisei bangin, ganlhaina toh dingin ahungun ahi.

²⁵Chuin, veuvin, Jerusalem'a chun amin Simeon kiti mi khat aumin; amapa chu chonpha tahle Pathen ngaisahtah, Israelte lungmon nading chu ngah jinga ahin; achunga Lhagao Theng uma ahi.

²⁶Chule Pakai thaonu Christa chu amu masanga ama athi lou ding chu, Lhagao Thengin ahetsah-a aphondoh ahi.

²⁷Chuin ama chun Lhagao puijin houin sunga chun ahung lutnin; chuin achung changa chonna dan ngaija bol dinga anule apan naosen Jesu chu apui phatnun,

²⁸Amapan naosen chu akhutnin alan, chule Pathen avahchoijin,

²⁹Pakai, tun nangma thu dungjuija Nasoh hi lungmonga neilhahdoh ahi.

³⁰Ijeh-inem itile nami huhhingna kamit nin amutai,

³¹Miho jouse mitmu-a Nangman nagot

³² Chidang namdangte henga vah kilangdoh dingle, Nami Israelte loupina ding chu, ati.

³³Chuin naosen umchan ding thudol kisei chu anu le Joseph'in kidang asa lheh lhonin ahi.

³⁴Chuin Simeon chun phatthei achunguva aboh-in, anu Mariam jah-a, Ven, hiche chapang hi Israelte lah-a mi tamtah lhuhna le dindohna hung hiding, chule seiset kihetna melchih na-a kitung ahi.

³⁵Henge, mi tamtah lunggel kiphon dohna dinga, nangma lung jong chemjamin asutpai ding ahi, ati.

³⁶Chule Asher phung mi Phanuel chanu Hanna kiti themgao numei khat aumin, amanu chu hatah-a teh ahitan, anungah jineija patna ajitoh kum sagi chengkhom ahin,

³⁷Chule amanu chu kum somget le kumli geija meithaija uma ahin, amanu chu houin'a kona potdoh louhela, an ngol le taona puma Pathen houva asun ajana um ahi.

³⁸Chuin hiche nidan tah chun ahungin Pathen athangvah-in, Jerusalem lhatdoh ding kat jinga umteho jouse jah-a chun Jesu umchan thu aseijin ahi.

³⁹ Chuin Pakai danthu dungjuija thil abol chaisoh phatnun, Galilee gama akhopiu Nazareth kho-a akilekit taovin ahi.

⁴⁰Chuin chapang chu akhangin, chule lhagaovin ahatdoh-in, chihna adimset tan; chule Pathen lungsetna achunga aumtan ahi.

⁴¹ Chuin anule apa chu kumseh-in kalchuh kut tengle Jerusalem'a acheji lhonin ahi.

⁴²Chuin ama kum somle kum ni ahi-in, kalchuh kut chonna ngaijin Jerusalem'a achetouvun;

⁴³Chuin kut achaijuva akile kit phatnun chapang Jesu anunguvah Jerusalem'ah aumdentan; chule hichu anule Joseph'in ahelhon hih-in;

⁴⁴Mihon lah-a chu uma ahi tin angaito lhonin, ni khat lam achetauvin; chuin amanin a-inkoteho le akihetpiho lah ahol lhonin ahi.

⁴⁵Chuin amudoh lhonlou phatnin, Jerusalem lamah akile kit lhonin, aholpeh lhontan ahi.

⁴⁶Chuin ahitin ahi, ni thum jouvin ama chu houin sungah agamudoh lhonin, houhil ho lah-a anatouvin, thu anangaijin dong jong ana dongin;

⁴⁷Chule athu jachan chun ahetjele athu donbut chu kidang asa lheh jengun ahi.

⁴⁸Chuin amu phat lhonin alungdongleu lhonin; chuin anun ajah-a, Chapa, ibola neihiti bol lhonham? Vetan napale keiman lungdong tah-in kahol lhone, ati.

⁴⁹Chuin aman amani jah-a, Ibola neihol lhonham? Keima ka-Pa in'a akin bola umding mong kahi helhon lou nahim? ati.

⁵⁰Ahin ajah uva athusei chu amahon ipi kiseina ham ahepouvin ahi.

⁵¹Chuin amanitoh alhonin, Nazareth kho-ah achesuh-un; athu thu lhonin anungin; chule anun hicheng thu kisei jouse chu alungin achingtan ahi.

⁵² Chuin Jesu chihna le tahsa-a akhangtou touvin; chule Pathen le mihem deisah-in aumtan ahi.