Read Thado Chin Luke 20 Bible Online

Luke 20 - Thado Chin bible

Luke 20

¹Chuin ahitin ahi, chulai chun ni khat aman houin'a thupha ahil lhanga, miho thu ahil petnin, thempu pipuiho le danthu sunho toh upaho ahenga ahungun,

²Ajah-a, Ipi thunei na-a hitiho hi nabolham? Koiham hiche thuneina nape-a hi? neisei peh-un, atiuve.

³Chuin aman adonbutnin, ajah uva, Keiman jong nangho thu khat donging kate; neisei peh-un;

⁴John baptize chansah chu van'a konham, mihem'a konham? ati.

⁵Chuin amaho akingai touvin, Van'a kon ahi tileuhenla, ibola ama natahsan lou uham tintin;

⁶Mihem'a kon ahi tileuhenla, miho jousen songa eise dingu ahin; ijeh-inem itile amahon John chu themgao ahi tia ajopsoh-u ahi, akitiuvin ahi.

⁷Chuin amahon, Hoija konham kahepouve, tin adonbut taove.

⁸Chuin Jesu'n amaho jah-a achutile ipi thuneija hicheng kabol ahi, keiman jong seipehdeh pouvinge, ati.

⁹ Chuin aman miho jah-a hiche thulem hi asei pantan ahi. Mikhatnin lengpilei abolin, leilhouho khutna apedoh-in, sottah gatham dingin mi gam danga achetan ahi.

¹⁰Chuin aga lhun phatnin aman asoh khat aleilhouho henga, amahon lengpi leija ga chu ama ahinpeh dingun asolin; ahinla leilhouho chun ama chu avovin, khutgoh keuvin akilesah taovin ahi.

¹¹Chuin aman soh khat asol nalaijin, ama jong chu avovin jachat umtah-in abolun, agoh keuvin asolmang taove.

¹²Chuin athumna asol kittan ahile, ama jong chu ana vovin, po lama apaidoh taovin ahi.

¹³Chuin lengpilei neipa chun, I kalo ding hitam? Kachapa deitah hi solinge: ama hi anajabol khatnunte, ati.

¹⁴Ahivangin leilhou hon amu phatnun, amahole amaho akihouvun, Ama hi agou lo dinga chu ahi; hungun agou lo ding chu eihoa ahina dingin, ama hi thatnu hite, akitiuvin.

¹⁵Chuin lengpilei po lama akaidoh-un, athat taovin ahi. Hijeh chun lengpilei neipa chun amaho chu ilontem?

¹⁶Ama hungintin aleilhouho chu sugamintin, lengpilei chu mi dang petante, ati. Chuin amahon hichu ajah phatnun, Chuti hihhen, atiuve.

¹⁷ Ahin aman amaho chu aven, Achutile, Insahon adeimoa apaiju song chu Aninga songpipenin apangtai, tia kisun hi ibaham?

¹⁸Koi hijongle chuche song chunga lhu chan chu ahal hala chip ding ahi; chule koi hile achunga chuche song chua chu leivui banga kithejal ding ahi, ati.

¹⁹Chuin danthu sunho le thempu pipuihon, hiche thulem asei chu amaho gotna-a asei ahi chu aheuvin, chupet tah-a chu achunga khut lhah ding agouvin; ahinla miho chu akichauvin ahi.

²⁰Chuin amahon achanglhi jingun, athuseija themmo chana gam vaipo thuneina le thunoija pehdoh theina dingin, chonpha limlhemin changlhi phabep khat asolun ahi.

²¹Chuin amahon ajah-a, Houhil, nangman dihtah-a naseija mi nahil ahi, chule koima mai ve louhela dihtah-a Pathen lampi chu nahil ahi, hichu kaheuve.

²²Caesar kai kapeh-u hi dan ngai hina, hilouham? tin adongun ahi.

²³Ahivangin aman alungthim bolu chu ahen, amaho jah-a, Ibola neipatepmu ham?

²⁴Denarius khat neivet sah-un. Koi lim le koi min chongam? ati. Amahon adonbutnun, Ceasar'a, atiuve.

²⁵Chuin aman ajah uva, achutile Caesar'a chu Caesar peuvinlang, Pathen'a chu Pathen petangu, ati.

²⁶Chuin amahon miho ang sunga athu seijin aman theita pouvin, athu donbut chu adatmo lheh jengun, athipbeh taovin ahi.

²⁷ Chuin, mithi thokitna aumpoi tia Saddukai ho phabep ahenga ahungun ajah-a,

²⁸Houhil, koi hile sopi nei khattouvin ji aneija cha nei louva athile, asopipa chun ajinu chu kichenpi henlang asopipa ding chun chi khaipehhen tin Mosi'n lekha eisutpeh-un ahi.

²⁹Aphai, ucha pasal sagite khat aumun, amasa penpa chun ji aneijin chabeijin athitai.

³⁰Chuin ani channapan amanu chu jin aneijin, amapa chabeijin athitai. Chuin athumnapan numeinu chu jin aneijin; chuti chun asagi uvin aneijun, chabeijin athi taovin ahi.

³¹Akhonna-in numeinu jong chu athitan ahi.

³²Ahile thokitna-a amanu chu alah uva koipen ji hitantem?

³³Ijeh-inem itile asagiuva amanu chu ji-a anei sohkeiju ahi, atiuve.

³⁴Chuin Jesu'n ajah uva, Hiche vannoi leiset chate hi akichengun, chule chen jong akichensah-un;

³⁵Ahin chuche gam lodinga kilomho le athia kona thoudoh ho vang chu akicheng tapouve, chen jong akichensah tapouve.

³⁶Chule amaho thi kit thei talou ahiuve; ijeh-inem itile amaho chu vantilte tobang ahiuvin; chule thoukit chate ahi jeh-u chun Pathen chate ahiuve.

³⁷ Mosi'n jong hamboh thua chun, Pakai chu Abraham Pathen, Isaac Pathen, chule Jacob Pathen, ati chun mithiho kaithouvin aumui ti aphongdoh-e.

³⁸Ama athiho Pathen hilouvin, ahingho Pathen ahijo bouve; ijeh-inem itile mi jouse ama mitmu-a ahing ahicheh-e, ati.

³⁹Hichun danthu sunho abang bangin adonbutnun, Houhil, nasei apha lheh jenge, atiuve.

⁴⁰Ijeh-inem itile amahon ama hiche kal chu ima adong ngam tapouvin ahi.

⁴¹Chuin aman amaho jah-a, Christa chu David chapa ahi iti kitiham?

⁴² Ijeh-inem itile David amatah-in a-Labua, Pakaiyin ka Pakai jah-a, Nangma kajet lamah touvin,

⁴³Keiman namelmate chengse nakeng chotpha-a kaneisah masangsen, ati.

⁴⁴Hitichun David'in ama chu Pakai ati; achutile achapa iti hi thei dingham? ati.

⁴⁵Chuin mi jouse jah dingin aseijuite jah-a,

⁴⁶Sangkhol choltah kiah-a vale noma, chule kailhanga min chibai aboh ding deija, chule kikhopna in le golvahna-a touna pipen deija danthu sunho-a konin kihong phaovin;

⁴⁷Amahon Meithaiho in abahgamun, chule alhema sot tahtah taojia ahiuve; amaho chu themmo chang chungnung ding ahiuve, ati.