Read Thado Chin Luke 21 Bible Online

Luke 21 - Thado Chin bible

Luke 21

¹Chuin ama akhodah-in ahile, mihao hon sumdolna boma athilto alelutnu amun.

²Chule hia chun meithai vaicha khatman jong sumsan nongsi peh ni alelut amun ahi.

³Chuin aman, Nangho jah-a tahbeh-a kasei ahi, amaho dang jouse sangin hiche meithai vaichanun atam lelut pene;

⁴Ijeh-inem itile amahon aneivalu Pathen'a atouva alelutnu ahin, amanu vang hin ahinpi aneisun alelut jeng ahi, ati.

⁵Chuin mi phabep khatnin houin chu song phatahtah le thilto khomho-a akijephoi chu aseijun ahile, aman,

⁶Nanghon namu-u hicheng hi kisusuchim louva song khat chunga khat kisethop himhim aum louhel ding nikhoho chu hunglhung ding ahi, ati.

⁷Chuin amahon adongun, Ahile, houhil, hicheng chu itihle hi dingham? Chule hiho chu ahung sodoh ding phat amelchihna ipi hintem? atiuve.

⁸Chuin aman hitin aseije, Lheplhah-a puimanga naum louna dingun kichih theijun; ijeh-inem itile mi tamtah keima minin hunguntin, keima Christa kahi; chule phat anaije, ahung ti dingu ahi; hijongle amaho nung chu jui hih-un.

⁹Chule nanghon gal kisatle thunoh najah tengule tija hih-un; ijeh-inem itile hicheng chu hungsoh masa tei ding ahi; hijongle akichaina chu hunglhung pai louding ahi, ati.

¹⁰Chuin aman ajah uva, Vai khatle vai khat, gam khatle gam khat hung kidou vintin;

¹¹Chule mun chom mun choma ling nasatahtah hung kihot intin, kel lhantin, gamna hise leng ding, chule van'a kona kichat tijat umtahle melchihna nasatah hung umding ahi.

¹²Amavang thil hicheng chu ahung sodoh masanga amahon nachung uva akhut alhah uva, nabolset dingu, akikhopnao le songkul'a dinga napehdoh dingu, chule keima min jala lengho le gamvaipoho anga nahin kailut dingu ahi.

¹³Hettohsahna naneina dinguva hicheng chu hung sohdoh ding ahi.

¹⁴ Hiche jeh chun iti donbut ding nagel masah louna dingun nalunguvah kisetnun.

¹⁵Ijeh-inem itile namelmaho jouseuvin nadoudal thei lounaole, nanel lhah thei louna dingu kamle lungthim themna kapeh dingu nahiuve.

¹⁶Ahivangin nanu napau, nasopiu, na-inko, chule najol nagolu chu napedoh uva hung pang ding ahi; chule nalah uva abang bang ahin thasah dingu ahi.

¹⁷Chule keima min jala nangho mi jouse hotna nahung umdingu ahi.

¹⁸Ahivangin nalu chunguva nasamjang khatchao jong mangthah lou ding ahi.

¹⁹Nanghon thohhatna nahinnao nakihuh doh dingu ahi.

²⁰Amavang Jerusalem galmin aum kimvel teng vangle, amanthah nading anaitai ti heuvin.

²¹Chutengle Juda gama um chengse thinglhang lamah jamuhen; chule khopi sunga uma chu potdoh hen; chule gama umho chu asunga lutdauhen.

²² Ijeh-inem itile thu kisun jouse guilhun sohna dinga, hichu phulah nikho hija ahi.

²³Ahin, ohe, hichelai chule agaija le naonoi chepsahho ada nadinguve! Ijeh-inem itile gam leiset chunga hesoh genthei khohtah le hiche mite chunga hi lunghanna chu ding ahi.

²⁴Chule amaho chemhema lou ding, chule chitin namtin lah-a gal hinga kikaimang gam dingu; chule chidang namdangte nikho lhin kahse-a Jerusalem hi chidang namdangte chotpha-a umding ahi.

²⁵ Chule nisa, lhathah, chule ahsihoa melchihna hung umding; chule twikhanglen kitum le kinon jeh-a lei chunga namtin lungdonga umteho chunga hesohna hung umding;

²⁶Mihemte chu kichatna jehle vannoi leiset chunga thil soh dingho ngaitona jeh-a haisam dingu ahi: ijeh-inem itile van thahatna ho chengse kihotling soh ding ahi.

²⁷ Chutahle Mihem Chapa chu thuneitah le loupi chungnung tah-a meibola ahung amu dingu ahi.

²⁸Ahivangin thil chucheng ahung so kipat tengle, khodah unlang chunglam veuvin; ijeh-inem itile nakilhatdoh nadingu anaije, ati.

²⁹Chuin aman amaho jah-a thulem khat aseijin: Theichang le thing dang jouse khu veuvin;

³⁰Ajih adotdoh namu tengule, nipi anaitai ti naheuve.

³¹Chutobang chun nanghon jong hicheng chu aguilhun namu tengule, Pathen lenggam anaitai ti heuvin.

³²Tahbeh-a kaseipeh nahiuve, aboncha aguilhun masangse-a, hiche khangguija mite hi mang lou dingu ahi.

³³Vanle lei mang ding ahin; keima thu vang mang lou ding ahi.

³⁴Amavang kihong phaovin, achuti loule an mohneh nehle jukham, chule hinlai khankho ding thu ngaitonan nalungu lontin, chuche ni chu thang bangin phulou helouvin nachung uva hung chu phung getninte.

³⁵Chuche ni chu thang banga vannoi leiset gam jouse-a cheng mi jouse chunga chu ding ahi.

³⁶Hijongle thil hung soh ding jouse-a kona sohcha dinga lom le Mihem Chapa anga ding dinga lom nahina dingun, imatih chanin kiging jingin umun, chule tao jingun, ati.

³⁷ Hichelai chun aman sun tengle houin'a thu ahiljin; chule janle apotdoh jin Olivet atiu molsanga agageh jin ahi.

³⁸Chule miho jouse chu athu ngai dingin jingkah matah le houin'a ahung hungjiuvin ahi.